टाटा हॉस्पिटलच्या डॉक्टरांचं नवं संशोधन, ब्रेस्ट कॅन्सरच्या उपचाराचा कालावधी आणि खर्च कमी होणार

टाटा मेमोरियल हॉस्पिटलच्या डॉक्टरांच्या नवीन संशोधनामुळे जे उपचार एक वर्ष घ्यावे लागत होते ते केवळ तीन ते सहा महिने जरी घेतले तरी त्याचा तेवढाच परिणाम होतो असे समोर आले आहे. शिवाय उपचारांचा खर्चही कमी होणार आहे.

मुंबई : भारत एक असा देश आहे या देशात कॅन्सरग्रस्त गरीब रुग्णांची संख्या दिवसेंदिवस वाढत जात आहे. कॅन्सरचे निदान झाल्यानंतर उपचार आणि औषधांचा खर्च प्रचंड असल्याने अनेकांना ते परवडत नाही. त्यासाठी टाटा मेमोरियल हॉस्पिटलकडे असे रुग्ण धाव घेतात. आता हॉस्पिटलमधील डॉक्टरांनी केलेल्या संशोधनामुळे रुग्णांच्या उपचाराच्या कालावधीत आणि उपचारावरील खर्चात प्रचंड बचत होणार आहे.

टाटा मेमोरिअल हॉस्पिटलच्या डॉक्टरांनी ब्रेस्ट कॅन्सरच्या एका प्रकारावर संशोधन करुन त्यावरील उपचाराचा कालावधी आणि खर्च अर्ध्याहून जास्त कमी होईल, असे संशोधन केले आहे. त्यांचे हे संशोधन अमेरिकन मेडिकल असोसिएशनचे जर्नल असलेल्या जामा नेटवर्क ओपनमध्ये मंगळवारी (25 ऑगस्ट) प्रसिद्ध करण्यात आले आहे. या नवीन संशोधनामुळे जे उपचार एक वर्ष घ्यावे लागत होते ते केवळ तीन ते सहा महिने जरी घेतले तरी त्याचा तेवढाच परिणाम होतो असे समोर आले आहे. यामुळे या उपचारासाठी लागणाऱ्या पाच ते सहा लाख रुपयांच्या खर्चाऐवजी आता केवळ एक ते दोन लाख रुपये खर्च औषधांवर करावा लागणार आहे. तसेच एक वर्ष हे उपचार घेतल्याने जे साईड इफेक्ट होतात ते देखील कमी होऊन ब्रेस्ट कॅन्सर असलेल्या रुग्णाला कमी त्रास होणार आहे.

टाटा मेमोरिअल सेंटरचे डायरेक्टर डॉक्टर राजेंद्र बडवे आणि टाटा हॉस्पिटलचा भाग असलेल्या खारघर येथील अक्ट्रेकचे डायरेक्टर डॉक्टर सुदीप गुप्ता यांच्या मार्गदर्शनाखाली टाटा मेमोरियल हॉस्पिटलमधील डॉक्टरांनी आणि कर्मचाऱ्यांनी हे महत्त्वपूर्ण संशोधन केले आहे. त्यासाठी दीड ते दोन वर्ष कालावधी लागला असून 12 हजार ब्रेस्ट कॅन्सरच्या रुग्णांचा अभ्यास यादरम्यान करण्यात आला आहे.

ब्रेस्ट कॅन्सरच्या अनेक प्रकारांपैकी HER2-Positive कॅन्सर एक प्रकार आहे. "या रुग्णांना Trastuzumab हे औषध 12 महिने द्यावे लागते. त्याचा खर्च 4 ते 5 लाख असतो. गेली 15 वर्षे हीच उपचारपद्धती सर्वत्र अवलंबिली जात आहे. या औषधामुळे हृदयाचे आजार देखील होण्याची शक्यता असते. मात्र आम्ही केलेल्या संशोधनात, 3 ते 6 महिने जरी हे औषध दिले तरी त्याचा परिणाम दिसून येतो असे आढळले आहे. त्यामुळे रुग्णांना कमी कालावधी आणि 1 ते 2 लाख रुपये खर्च येणार आहे", असे डॉ. सुदीप गुप्ता म्हणाले. "या संशोधनाचा फायदा भारतात दरवर्षी नवीन आढळणाऱ्या दीड ते पावणेदोन लाख ब्रेस्ट कॅन्सरच्या रुग्णांना पैकी अंदाजे 45 हजार रुग्णांना होईल", असेही डॉ. गुप्ता म्हणाले.

हे संशोधन प्रसिद्ध झाल्यापासून जगभरातून टाटा मेमोरियल हॉस्पिटलच्या या टीमला प्रतिक्रिया येत आहेत. या नवीन संसोधनामुळे केवळ भारतात नाही तर जगभरात असलेल्या ब्रेस्ट कॅन्सरच्या रुग्णांना फायदा होणार आहे.

Tata Memorial Hospital | ब्रेस्ट कॅन्सरच्या उपचाराचा कालावधी कमी होणार!