एक्स्प्लोर

शिवस्मारक जगात सर्वात उंच, 210 मीटरपर्यंत उंची वाढवण्याचा प्रस्ताव

Written By : एबीपी माझा वेब टीम | Updated at : 25 Mar 2017 12:36 PM (IST)

मुंबई : मुंबईतील समुद्रात होणारं शिवस्मारक जगातील सर्वाधिक उंचीचा पुतळा ठरणार आहे. शिवस्मारकाची उंची 192 मीटरऐवजी 210 मीटर करावी, असा प्रस्ताव राज्य सरकार केंद्रीय पर्यावरण विभागाकडे पाठवणार आहे. या प्रस्तावाला मंजुरी मिळाल्यास चीनमधील बुद्धाच्या पुतळ्यापेक्षाही शिवस्मारक सर्वात उचं ठरणार आहे. चीनच्या लुशान कौंटीमधील स्प्रिंग टेम्पल बुद्धा हा जगातील सर्वाधिक उंचीचा पुतळा आहे. डोंगरावर असलेला हा पुतळा 2008 मध्ये पूर्ण झाला. याची मूळ उंची 153 मी होती. पण ज्या डोंगरावर हा पुतळा बांधण्यात आला आहे, त्याला पुनर्आकार देऊन चौथरा बनवला. त्यामुळे पुतळ्याची उंची 208 मीटर झाली. "आम्हाला शिवस्मारक उंच हवं आहे. याची निविदा निघाल्यानंतर स्मारकाच्या 210 मीटर उंचीचा प्रस्ताव पर्यावरण मंत्रालयाच्या मंजुरीसाठी पाठवला जाईल, असं शिवस्मारक समितीचे चेअरमन विनायक मेटे यांनी सांगितलं. शिवाजी महाराज हे महाराष्ट्राचं आराध्य दैवत आहे. शिवाय आमच्यासाठी आणि पुढील पीढीसाठी प्रेरणास्थान आहेत. स्मारक बनवण्यासाठी शक्य आहे ते सगळं करु," असंही मेटे यांनी सांगितलं. शिवस्मारक हा महापालिका निवडणुकीत अनेक पक्षांच्या जाहीरनाम्यातील महत्त्वाचा होता. राज्य सरकारने यासाठी 3600 कोटी रुपयांची तरतूद केली आहे. त्यापैकी 2500 कोटी पहिल्या टप्प्यातील निविदांसाठी राखीव ठेवले आहेत. या स्मारकामध्ये मंदिर, संग्रहालय, रुग्णालय, रायगड किल्ल्याच्या प्रवेशद्वाराची प्रतिकृती आणि शिवाजी महाराजांचं जीवनपट उलगडण्यासाठी थिएटर असेल. आणखी एक वैशिष्ट्य म्हणजे यामध्ये पर्यटकांना शिवस्मारक पाहता यावं, यासाठी 180 मीटर उंचीवर जाणारी लिफ्ट असेल. स्मारकाच्या पहिल्या टप्प्यातील 2500 कोटी रुपयांपैकी 1200 कोटी रुपये हे शिवाजी महाराजांच्या ब्रॉन्झच्या पुतळ्यासाठी असतील. मात्र प्रकल्पाच्या दुसऱ्या टप्प्याचा प्लॅन अजून निश्चित झालेला नाही. या टप्प्यात हेलिपॅड आणि आयमॅक्स थिएटर यांसारख्या सुविधा असाव्यात, असा प्रस्ताव आहे. या वर्षअखेरिस प्रकल्पाचं काम सुरु होणार असून काम पूर्ण होण्यासाठी 36 महिन्यांची मुदत देण्यात आली आहे. शिवाजी महाराजांचा अश्वारुढ पुतळा प्रसिद्ध शिल्पकार राम सुतार बनवणार आहेत.

16 एकर जमीन

शिवस्मारकासाठी मुंबईतील मरीन ड्राईव्हजवळ अरबी समुद्रात 16 एकर जमीन निवडली आहे. हे स्मारक सुमारे 309 फूट उंच असेल. समुद्रात तीन एकर क्षेत्रावर भर घालून चबुतरा उभारण्यात येणार आहे. त्या परिसरात येणाऱ्या पर्यटकांना शिवाजी महाराजांबाबतची माहिती देणारी दालने, पुस्तक प्रदर्शन, चित्रफीत दाखविण्यासाठी दालन, वस्तुसंग्रहालय आणि उद्यान असा आराखडा आहे. स्मारकाची जागा राजभवनपासून दक्षिण-पश्चिम बाजूस 1.2 कि.मी अंतरावर, गिरगाव चौपाटीवरील एच.टु. ओ जेट्टीपासून दक्षिण-पश्चिम दिशेने 3.60 कि.मी अंतरावर आणि नरिमन पाँईटपासून पश्चिमेस 2.60 कि.मी अंतरावर आहे. स्मारकासाठी 15.96 हेक्टर आकारमानाचा खडक निवडण्यात आला आहे. याचे क्षेत्रफळ अंदाजे 650 मी 325 मी. एवढे आहे. सभोवताली 17.67 हेक्टर जागा उथळ खडकाची आहे. संबंधित बातम्या पंतप्रधान मोदींच्या हस्ते शिवस्मारकाचं भूमिपूजन संपन्न