Mukesh Ambani: मुकेश अंबानी यांना धमकी देणाऱ्याला बिहारमध्ये अटक, रिलायन्स फाऊंडेशन हॉस्पिटलमध्ये फोन करून दिली होती धमकी
Mukesh Ambani Threat: मुकेश अंबानी धमकी प्रकरणी आरोपीला बिहारमधून अटक करण्यात आली आहे.
मुंबई : रिलायन्स उद्योग समुहाचे (Reliance) सर्वेसर्वा मुकेश अंबानी (Mukesh Ambani) आणि त्यांच्या पत्नी नीता अंबानी (Nita Ambani) यांना धमकी देणाऱ्याला बिहारमध्ये अटक करण्यात आले आहे. बिहारमधील दरबंगा शहरातून आरोपी राकेश कुमार मिश्राला अटक करण्यात आली असून रिलायन्स फाऊंडेशन हॉस्पिटलमध्ये फोन करून धमकी दिली होती.
मुकेश अंबानी धमकी प्रकरणी आरोपीला बिहारमधून अटक करण्यात आली आहे. आरोपीवर आयपीएसच्या कलम 506(2),507 अंतर्गत गुन्हा दाखल करत अटक करण्यात आली आहे. आरोपी बेरोजगार असून त्याने धमकी का दिली? याबाबत अद्याप कोणतीही माहिती समोर आलेली नाही. मुंबई पोलिसांनी त्याला पुढील तपासासाठी मुंबईत आणले आहे.
बिहारच्या ब्रह्मपुरा गावात राहणाऱ्या राकेश कुमारला बुधवारी संध्याकाळी अटक करण्यात आली आहे. बुधवारी संध्याकाळी 4 च्या दरम्यान साध्या वेशात पोलिस राकेशच्या घरी पोहचली. पहिल्यांदा पोलिसांनी राकेशच्या मोबाईलवर कॉल केला. त्यानंतर राकेशने कॉल रिसिव्ह केला. राकेशच्या मोबाईलचे लोकेशन कन्फर्म झाल्यानंतर पोलिसांनी राकेशला अटक केली.
बुधवारी दुपारी 1 वाजण्याच्या सुमारास रिलायन्स फाउंडेशनच्या (Reliance) सर एचएन हॉस्पिटलच्या (HN Reliance Foundation Hospital) लॅंडलाईनवर एक अज्ञात नंबरवरुन कॉल आला होता. हे हॉस्पिटल बॉंबने उडवून देण्याची धमकी या कॉलच्या माध्यमातून देण्यात आली. तसेच मुकेश अंबानी (Mukesh Ambani) आणि नीता अंबानी (Nita Ambani) यांनाही जीवे मारण्याची धमकी यावेळी देण्यात आली आहे. पुढील तपास सुरू आहे.
रिलायन्स इंडस्ट्रिजचे अध्यक्ष मुकेश अंबानी आणि त्यांच्या कुटुंबीयांना ठार मारण्याची धमकीचा फोन हा पहिल्यांदा आला नसून या अगोदर देखील त्यांना धमकी देण्यात आली आहे. ऑगस्ट महिन्यात रिलायन्स फाउंडेशन हॉस्पिटलच्या सार्वजनिक दूरध्वनी क्रमांकावर एका अनोळखी नंबरवरून धमकी देणारा एक फोन कॉल आला होता. मुकेश अंबानी आणि नीता अंबानी यांना जीवे मारण्याची धमकी आल्यानंतर रिलायन्स हॉस्पिटल (Reliance Hospital) आणि त्यांचे निवासस्थान असलेल्या अँटिलिया या ठिकाणी पोलिस सुरक्षा वाढवण्यात आली आहे. पोलिसांनी या प्रकरणी सर्व बाजूने तपास सुरू केला आहे.
इतर महत्त्वाच्या बातम्या :
महत्त्वाच्या बातम्या
ट्रेंडिंग न्यूज
