MHADA : म्हाडाच्या गिरणी कामगार सोडतीतील बॉम्बे डाईंग आणि श्रीनिवास मिलमधील 160 लाभधारकांना सदनिकांच्या चाव्यांचे वाटप
MHADA Mill Worker Lottery : 15 जुलैपासून आजतागायत 1 470 यशस्वी पात्र गिरणी कामगार आणि त्यांच्या वारसांना सदनिकांच्या चाव्यांचे वाटप करण्यात आलं आहे.
मुंबई : म्हाडाच्या मुंबई मंडळातर्फे सन 2020 मध्ये बॉम्बे डाईंग मिल आणि श्रीनिवास मिलमधील (Bombay Dyeing and Srinivas Mills) गिरणी कामगारांसाठी जाहीर केलेल्या सोडतीतील यशस्वी पात्र 160 गिरणी कामगार आणि त्यांच्या वारसांना आठव्या टप्प्यांतर्गत नुकतेच सदनिकांच्या चाव्यांचे वाटप करण्यात आले.
वांद्रे पूर्व येथील म्हाडा मुख्यालयात महाराष्ट्र गृहनिर्माण आणि क्षेत्रविकास प्राधिकरण (MHADA) आणि गिरणी कामगार घर संनियंत्रण समिती यांच्या संयुक्त विद्यमाने आयोजित या कार्यक्रमाला गिरणी कामगार घर संनियंत्रण समितीचे अध्यक्ष आमदारसुनील राणे, आमदार कालिदास कोळंबकर, उपमुख्य अधिकारी योगेश महाजन आदी उपस्थित होते.
आमदार सुनील राणे म्हणाले की, आतापर्यंत सन 2020 मध्ये गिरणी कामगारांसाठी काढण्यात आलेल्या सोडतीतील यशस्वी पात्र आणि सदनिकेच्या विक्री किंमतीचा, मुद्रांक शुल्काचा भरणा केलेल्या 1470 गिरणी कामगारांना 15 जुलै, 2023 पासून आठ टप्प्यांत सदनिकांच्या चावीचे वाटप करण्यात आले आहे. मुंबई मंडळ आणि कामगार विभाग यांच्यातर्फे सोडतीतील उर्वरित गिरणी कामगार, वारसांची पात्रता निश्चित करण्याचे काम वेगात सुरू आहे. या गिरणी कामगार आणि वारसांची पात्रता लवकर निश्चित करून त्यांना सदनिकांच्या चाव्या देण्याचा प्रयत्न असल्याचे आमदार सुनील राणे यांनी सांगितले.
बृहन्मुंबईतील 58 बंद किंवा आजारी गिरण्यांमधील यापूर्वी झालेल्या सोडतीमध्ये यशस्वी न झालेल्या एकूण 1,50,484 गिरणी कामगार आणि त्यांच्या वारसांची पात्रता निश्चिती करण्याकरिता कालबद्ध विशेष अभियान सुरू आहे. या अभियानाला गिरणी कामगार, वारसांचा वाढता प्रतिसाद बघता या अभियानाला 14 जानेवारी 2024 पर्यंत मुदतवाढ देण्यात आली आहे.
गिरणी कामगार, वारसांनी या संधीचा लाभ घेण्याचे आवाहन सुनील राणे यांनी यावेळी केले. या अभियानांतर्गत ऑफलाइन कागदपत्रे वांद्रे पूर्व येथील समाज मंदिर हॉल येथे सुरू आहे. तसेच ऑनलाइन पद्धतीने www.millworkereligibility.mhada.gov.in या संकेतस्थळावर कागदपत्रे अपलोड करण्याची सुविधा विनामूल्य उपलब्ध आहे.
ॲन्ड्रॉईड व्हर्जनच्या मोबाईलमध्ये गूगल ड्राइव्हच्या प्ले स्टोअर आणि आयओएस व्हर्जन ॲप स्टोअरमध्ये mill workers eligibility या नावाने ॲप उपलब्ध करून देण्यात आले आहे. यापूर्वी ऑफलाईन अथवा ऑनलाईन पद्धतीने कागदपत्रे सादर केलेल्या गिरणी कामगार, वारसांना नव्याने कागदपत्रे सादर करण्याची आवश्यकता नसल्याचे मंडळातर्फे कळविण्यात आले आहे.
गेल्या तीन महिन्यांपासून सुरू असलेल्या या विशेष अभियानात ऑफलाईन आणि ऑनलाईन पद्धतीने एकूण 95,812 अर्ज प्राप्त झाले आहेत. त्यापैकी 72,041 अर्जदार पात्र ठरले असून उर्वरित अर्जांची छाननी करून पात्र/ अपात्र निश्चितीची कार्यवाही सुरू असल्याचे सुनील राणे यांनी सांगितले.
ही बातमी वाचा:
महत्त्वाच्या बातम्या
