गणेश नाईक यांना हायकोर्टानं दिलासा; 25 हजारांच्या जातमुचलक्यावर अटकपूर्व जामीन मंजूर
Ganesh Naik : गणेश नाईक यांना हायकोर्टानं दिलासा; 25 हजारांच्या जातमुचलक्यावर अटकपूर्व जामीन मंजूर
Ganesh Naik : भाजप आमदार गणेश नाईक यांना मुंबई हायकोर्टानं दिलासा दिला आहे. 25 हजार रुपयांच्या जातमुचलक्यावर नाईकांना अटकपूर्व जामीन मंजूर करण्यात आला. एका महिलेनं बलात्कार, आणि फसवणुकीचे आरोप केल्यानंतर गणेश नाईक यांच्यावर गुन्हा दाखल करण्यात आला होता. या प्रकरणात ठाणे न्यायालयानं अटकपूर्व जामीन फेटाळल्यानंतर गणेश नाईक यांनी हायकोर्टात धाव घेतली होती. आता त्यांना हायकोर्टात दिलासा दिला आहे.
एका महिलेनं केलेल्या बलात्काराच्या आरोपांनंतर भाजप नेते गणेश नाईकांच्या अडचणी वाढल्या आहेत. ठाणे सत्र न्यायालयानं (Thane District & Sessions Court) नाईक यांच्या विरोधातील दोन्ही गुन्ह्यात अटकपूर्व जामीन नाकारल्यानंतर त्यांच्यावर अटकेची टांगती तलवार होती. त्यानंतर ठाणे सत्र न्यायालयाच्या निर्णयाविरोधात गणेश नाईक यांनी मुंबई उच्च न्यायालयात धाव घेतली होती. नवी मुंबईतील बेलापूर आणि नेरुळ इथे दाखल झालेल्या गुन्ह्यात अटकपूर्व जामीन मिळावा, अशी याचिका गणेश नाईक यांनी दाखल केली होती. या प्रकरणी सुनावणी करताना उच्च न्यायालयानं गणेश नाईक यांना जामीन मंजूर केला आहे.
नेमकं प्रकरण काय?
गणेश नाईक यांच्यासोबत प्रेमसंबंध असणाऱ्या एका महिलेनं तब्बल 27 वर्षांनी बलात्काराचा आरोप केला आहे. याबाबत नेरुळ पोलीस ठाण्यात कलम 376 अन्वये गुन्हा दाखल आहे. तर रिव्हॉल्व्हर दाखवून धमकावल्याप्रकरणी सीबीडी बेलापूर पोलीस ठाण्यातही नाईक यांच्याविरुद्ध याच महिलेनं स्वतंत्र गुन्हा दाखल केला आहे. नेरुळच्या गुन्ह्यासंदर्भात अनेकदा आपल्या इच्छेविरोधात शरीरसंबंध ठेवले गेल्याचे या महिलेनं तक्रारीमध्ये म्हटलं आहे. नवी मुंबई पोलिसांनी पुरावे गोळा करण्यासही सुरुवात करुन या महिलेची वैद्यकीय चाचणीही केली. त्यानंतर नाईक यांनी ठाणे न्यायालयात अटकपूर्व जामीनाचा अर्ज दाखल केला होता. ही सुनावणी न्यायमूर्ती एन. के. ब्रम्हे यांच्या न्यायालयात घेण्यात आली.
माझ्या जीवाला धोका; गणेश नाईकांवर आरोप करणाऱ्या महिलेचा आरोप
माझ्याह मुलाच्या जीवाला धोका असल्याचं वक्तव्य पीडित महिलेने केलं आहे. गणेश नाईक यांच्या विरोधात तक्रार करणाऱ्या पीडित महिलेचा आपल्या जीवाला धोका असल्याचा एक व्हिडीओ सध्या सोशल मीडियावर व्हायरल झाला होता. पीडित महिला आपल्या व्हायरल व्हिडीओमध्ये म्हणाल्या, माझ्यासह मुलाच्या जीवाला धोका आहे. माझ्या जीवाचे कधीही बरे वाईट होऊ शकते. माझ्या अपहरणाची किंवा कधीही माझ्या हत्येचा कट रचण्याची शक्यता आहे. मला सर्वांनी सहकार्य करावे अशी विनंती मी करत आहे. मला सरकारकडून जे सहकार्य मिळाले त्यासाठी मी सरकारची आभारी आहे. मला आणि माझ्या मुलाला न्याय मिळेपर्यंत सर्वांनी मला असेच सहकार्य करा, अशी विनंती नाईकांवर आरोप करणाऱ्या महिलेनं केली होती.
महत्त्वाच्या बातम्या
