बाळासाहेबांच्या निर्णयावर तुम्ही बोट ठेवत आहात का?, देवेंद्र फडणवीसांचा उद्धव ठाकरेंना सवाल 

शिवसेनेची 25 वर्ष भाजपसोबत युतीत सडलो, असं मुख्यमंत्री उद्धव ठाकरे (CM Uddhav Thackeray) यांनी म्हटलं होतं. यावर विरोधी पक्षनेते देवेंद्र फडणवीस (Devendra fadnavis) यांनी जोरदार टीका केलीय. 

Devendra Fadnavis allegation on CM Uddhav Thackeray

मुंबई : शिवसेनेचे पक्षप्रमुख आणि राज्याचे मुख्यमंत्री उद्धव ठाकरे (CM Uddhav Thackeray) यांनी काल पुन्हा भाजपवर (BJP) हल्लाबोल केला. शिवसेनाप्रमुख बाळासाहेब ठाकरे यांच्या जयंतीनिमित्त संवाद साधताना त्यांनी पुन्हा शिवसेनेची 25 वर्ष भाजपसोबत युतीत सडलो असा पुनरुच्चार केला होता. यावर राज्य विधानसभेचे विरोधी पक्षनेते देवेंद्र फडणवीस (Devendra fadnavis) यांनी भाष्य केलं असून त्यांनी उद्धव ठाकरेंवर जोरदार टीका केलीय. 

फडणवीस म्हणाले की,  काल उद्धव ठाकरे यांनी युतीत सडलो असं वक्तव्य केलं. 2012 पर्यंत बाळासाहेब ठाकरे युतीत होते.  त्यांच्या हयातीत युती कायम ठेवली. बाळासाहेबांच्या निर्णयावर तुम्ही बोट ठेवत आहात का? असा संशय आमच्या मनात येतोय, असं फडणवीस म्हणाले. 
 
तुमचा पक्ष जन्माला यायच्या आधी आमचा मुंबईत नगरसेवक होता, आमदार होते

फडणवीस म्हणाले की, तुमचा पक्ष जन्माला यायच्या आधी आमचा मुंबईत नगरसेवक होता, आमदार होते. भाजपच्या चिन्हावर लोकसभेची निवडणुक शिवसेनेने लढवली. मनोहर जोशी भाजपच्या चिन्हावर लढले होते.  भाजपच्या सोबत असताना एक नंबर वर होते आणि आता चार नंबरवर आले.  म्हणजे लक्षात घ्या कुणाबरोबर कोण सडलं, असं फडणवीस म्हणाले. 

तुमचं हिंदुत्व हे भाषणातलं कागदावरचं
फडणवीस म्हणाले की राम जन्मभूमीच्या आंदोलनात लाठ्या काठ्या खाणारे आम्ही होतो तुम्ही तोंडाच्या वाफा घालवत आहेत.  राम मंदिर मोदींनी करून दाखवला.  तुम्ही दुर्गाडीचा प्रश्न तरी सोडवा. तुमचं हिंदुत्व हे भाषणातलं कागदावरचं आहे. औरंगाबाद, उस्मानाबादचं नाव बदललं नाही, प्रयागराज नाव बदलून दाखवलं असं ते म्हणाले. ते म्हणाले की, काल आम्ही बाळासाहेबांना अभिवादन करण्यासाठी ट्वीट केलं, पण गांधी कुटुंबियांनी हे ट्वीट केलं का? याला लाचारी म्हणतात, असं फडणवीस म्हणाले. 

त्यांनी पुढं म्हटलं की, उद्धव ठाकरे यांच्या संपूर्ण भाषणांमध्ये राज्याचं हित काही नाही. त्यांच्याकडे बोलायला काही नाही. भारतीय जनता पार्टी आपलं सरकार बनवेल, आम्ही अजुनही एक नंबर आहेत, असंही ते म्हणाले. ते म्हणाले की, ते असं म्हणताहेत की, बाबरीनंतर शिवसेनेची लाट होती. त्यावेळी उत्तर प्रदेशात शिवसेनेचे 180 उमेदवार लढले होते त्यापैकी 179 उमेदवारांचं डिपॅाजिट जप्त झालं होतं.  तुम्हाला जनतेनं तेव्हाही नाकारलं होतं. कारण राम मंदिराच्या आंदोलनात कारसेवक होते, असं ते म्हणाले. 

इतर महत्वाच्या बातम्या

हे देखील वाचा- 
LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha