Mark Zuckerberg | अॅपलच्या iOS 14 प्रायव्हसी बदलाचा फायदा फेसबुकलाच; मार्क झुकरबर्गचा दावा

Facebook vs. Apple : अॅपलमधील iOS 14 च्या प्रायव्हसी बदलावरुन फेसबुक (Facebook ) आणि अॅपल (Apple) आमने-सामने आले आहेत. अॅपलच्या या पॉलिसीचा फटका फेसबुकला बसणार असल्याची चर्चा असताना मार्क झुकरबर्गने (Mark Zuckerberg)  मात्र हे फेटाळून लावलंय. 

Mark Zuckerberg

Facebook vs. Apple : अॅपलच्या iOS 14 मध्ये करण्यात येणाऱ्या प्रायव्हसी बदलाचा फायदा हा फेसबुकलाच होणार असून आम्ही या बाबतीत 'चांगल्या स्थितीत' असल्याचा दावा फेसबुकचा सीईओ मार्क झुकरबर्गने केला आहे. गेल्या काही दिवसापासून फेसबुक आणि अॅपलमध्ये प्रायव्हसी पॉलिसीवरुन वाद रंगला आहे.

मार्क झुकरबर्गला एका कार्यक्रमात अॅपलच्या iOS 14 मध्ये करण्यात येणाऱ्या प्रायव्हसी बदलाबाबत विचारलं असता तो म्हणाला की, "अॅपलने त्याच्या iOS 14 मध्ये काही प्रायव्हसी बदल केले आहेत. त्याचा फायदा फेसबुकला होणार आहे. यामुळे जगातल्या अनेक कंपन्या त्यांचा व्यापार आणि व्यवहार करण्यासाठी फेसबुकच्या प्लॅटफॉर्मचा वापर करतील. कारण या कंपन्यांना अॅपलच्या नव्या पॉलिसीमुळे त्यांच्या ग्राहकांचा डेटा शोधणं आणि त्याचा वापर करणं अवघड होणार आहे." 

लहान  व्यावसायिकांच्या व्यवहारावर लक्ष केंद्रीत करणे आणि त्यांच्या व्यवहारांना अपडेट्स करण्यावर फेसबुक काम करतंय असंही मार्क झुकरबर्गनं सांगितलं.

फेसबुक आणि अॅपलचा वाद गेल्या काही दिवसापासून सुरु आहे. आपल्या युजर्सना त्यांच्या डेटावर अधिक नियंत्रण मिळावं, त्यांच्या परवानगीशिवाय त्यांच्या डेटाचा वापर कोणी करु नये आणि त्यामध्ये अधिक पारदर्शकता असावी यासाठी अॅपलने त्याच्या iOS 14 मध्ये काही बदल केले आहेत. त्यामुळे फेसबुकला आता युजर्सच्या परवानगीशिवाय त्यांचा डेटा वापरता येणार नाही. त्यावरून फेसबुकने अॅपलवर टीका केली होती. 

यूजर्सचा डेटा गोळा करुन त्याचा फायदा जाहिरातींसाठी करणाऱ्या फेसबुकवर अॅपलने या आधी अनेकवेळा टीका केली आहे. अॅपलने त्यांच्या यूजर्सच्या खासगी डेटाचा दुरुपयोग होऊ नये म्हणून एक खास फिचर आणलं आहे. याचा परिणाम थेट फेसबुकच्या महसुलावर होणार असल्याने फेसबुकने त्यावर नाराजी व्यक्त केली होती.

या आधी अॅपलने एक नवीन फिचर iOS 14 मार्केटमध्ये आणणार असल्याची घोषणा केली होती. यूजर्सचा खासगी डेटा अधिक सुरक्षित रहावा हा या फिचरचा उद्देश आहे. त्यानुसार फेसबुक बरोबरच इतर कोणत्याही अॅपला आता अॅपलमधील डेटा वापरण्यापूर्वी यूजर्सची परवानगी घ्यावी लागणार आहे. फेसबुक हे व्हॉट्स अप, इन्स्टाग्राम आणि फेसबुक मेसेंजरच्या माध्यमातून अशा प्रकारे यूजर्सचा डेटाचा त्यांना न विचारता वापर करते, त्या डेटाच्या माध्यमातून यूजर्सवर जाहिरातींचा मारा करते आणि त्या माध्यमातून बक्कळ महसूल कमवते असा फेसबुकवर नेहमीच आरोप होतोय.

फेसबुक गोपनीयतेचा भंग करते
अॅपलचा महसूल हा जाहिरातींवर अवलंबून नाही. तो त्यांच्या अॅप स्टोअर आणि डिव्हाइस प्रोडक्टच्या माध्यमातून येतो. फेसबुकचा महसूल त्याच्या जाहिरातींवर अवलंबून आहे. त्यामुळे या कंपनीकडून यूजर्सचा मोठ्या प्रमाणावर खासगी डेटा गोळा केला जातोय. त्याला अॅपलने अनेकदा आक्षेप घेतलाय. फेसबुक आपल्या यूजर्सच्या गोपनियतेशी खेळत असल्याचं अॅपलने या आधीही आरोप केले आहेत.

फेसबुक केवळ त्यांच्या अॅपच्या माध्यमातून यूजर्सचा डेटा गोळा करत असतं तर ठिक आहे, पण फेसबुक फोन, कॉम्यूटर्स, टीव्ही आणि इतर माध्यमातून डेटा गोळा करतो यावर अॅपलचा आक्षेप आहे. तसेच फेसबुक आपल्या यूजर्सना विचारता, त्यांची परवानगी न घेता डेटा वापरते असाही आरोप अॅपलने या आधी केलाय.

फेसबुकने अॅपलच्या या नवीन फिचरवर जाहीर नाराजी व्यक्त केली आहे. यामुळे छोट्या व्यावसायिकांचं हित धोक्यात येण्याची शक्यता आहे असं फेसबुकनं म्हटलं आहे.

अॅपलचं मत या विरुध्द आहे. आपल्यासाठी आपल्या यूजर्सचा खासगी डेटा महत्वाचा आहे. वेगवेगळे अॅप आणि वेबसाइटवरुन त्यांचा खासगी डेटा कशा प्रकारे एकत्रित केला जातो आणि त्याचा वापर कशा पध्दतीनं करण्यात येतोय हे यूजर्सला माहित हवं असं अॅपलंने स्पष्ट केलंय.

iOS 14 मधील नव्या 'अॅप ट्रॅकिंग ट्रान्स्पेरंसी' मुळे फेसबुकला आता यूजर्सना ट्रॅक करणे आणि टारगेटेड जाहिराती करणे सहज शक्य होणार नाही. तसं करायचं असेल तर फेसबुकला पहिल्यांदा यूजर्सची परवानगी घेणं आवश्यक आहे.