बोगस डॉक्टरची शस्त्रक्रिया महिलेचे दोन्ही गुडघे निकामी, आठ रुग्णांना कायमचे अपंगत्त्व

वसईमध्ये बोगस डॉक्टरांची अनेक प्रकरणं समोर येत आहेत. आतातर मसाला विक्री करणारा एकजण स्वत:ला अस्थिरोगतज्ञ म्हणून आपला दवाखाना थाटून रुग्णांवर उपचार करत असल्याचं समोर आलं आहे.

doctor

वसई : मसाले विक्री करणाऱ्या बोगस अस्थिरोगतज्ञ डॉक्टरचे प्रकरण मागील काही दिवसांपूर्वी समोर आले होते. आता या बोगस डॉक्टरने केलेले काही भयानक प्रकार उजेडात आले आहेत. चुकीच्या पध्दतीने ऑपरेशन केल्यामुळे वसईतील 8 रुग्णांना कायमचं अंपगत्त्व आल्याचं समोर आलं आहे. या सर्वांनी वसई पोलीस ठाण्यात बोगस डॉक्टरविरोधात गुन्हा दाखल केला आला आहे. वसईतील माया केनिया या महिलेशी बातचीत केल्यानंतर या बोगस डॉक्टराकडून उपचार केल्यामुळे तिला कशाप्रकारे त्रास सहन करावा लागत आहे. हे तिने सांगितले आहे.

माया केनिया या वसईच्या साई नगर येथे राहतात. मागील दोन वर्षापासून त्यांना घरातील बेडरुमच्या चार भिंतीतच रहावं लागत आहे. त्यांची ही अवस्था या मसाले विक्री करणाऱ्या बोगस डॉक्टर हेंमत पाटील याने केली आहे. माया यांनी गुडघेदुखीच्या उपचारासाठी हेमंत याच्याकडे उपचार घेतला आणि त्यांना कायमचं अपंगत्तव आलं. माया यांना 5 ते 6 वर्षांपासून गुडघेदुखीचा ञास सुरु झाला होता. मुंबईच्या नामांकित डॉक्टरांनी त्यांना 10 लाख खर्च येईल असं सांगितलं. तर वसईच्या या बोगस डॉक्टर हेमंत पाटील यांने नव्या अद्ययावत टेक्नॉलजी द्वारे अवघ्या दोन लाखात ऑपरेशन करण्याची हमी भरली. बोगस डॉक्टराने माया केनियावर दिनांक 10 फेब्रुवारी 2020 रोजी ऑपरेशन केलं. माञ चुकीच्या ऑपरेशनमुळे त्यांचे आता दोन्ही गुडघे निकामी झाले आहेत. त्यांना आता चालता ही येत नाही.  त्यामुळे या बोगस डॉक्टरची तक्रार माय यांच्या मुलाने केली होती. पण प्रशासनाने त्याकडे अजूनही काहीच लक्ष दिलेलं नाही.

बोगस डॉक्टरमुळे अजूनही रुग्णांना त्रास

या बोगस डॉक्टर हेमंत पाटीलच्या चुकीच्या उपचार पध्दतीमुळे बिछान्यात पडून असणाऱ्या माया या एकमेव महिला नाहीत तर अशा आणखी सात जणांवर ही या बोगस डॉक्टरने अशी वेळ आणली आहे.  हेमंत पाटीलवर  गुन्हा दाखल होताच आठही जणांनी वसई पोलीस ठाण्यात बोगस डॉक्टरविरोधात गुन्हा दाखल केला आहे. वसई पोलिसांनी माया केनियाच्या फिर्यादीवरुन बोगस डॉक्टरवर 307 कलमाअन्वये गुन्हा दाखल केला आहे. 

हे ही वाचा- 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha