'पुणे, मुंबईतील गॅंगवॉरमार्फत तुम्हाला संपवू अशा धमक्या देताहेत, पोलिस संरक्षण द्या'; आमदारपुत्राची मागणी
बार्शीचे आमदार राजेंद्र राऊत (Rajendra Raut) यांची सध्या चर्चा राज्यभर होतेय. याचं कारण आहे काल विधानसभेत गाजलेली चर्चा. यावर त्यांचे पुत्र रणवीर राऊतांनी प्रतिक्रिया दिली आहे.
मुंबई: बार्शीचे आमदार राजेंद्र राऊत (Rajendra Raut) यांची सध्या चर्चा राज्यभर होतेय. याचं कारण आहे काल विधानसभेत गाजलेली चर्चा. विरोधी पक्षनेते देवेंद्र फडणवीस (Devendra Fadnavis) यांनी विधानसभेत आरोप करताना म्हटलं की, राऊत आमच्यासोबत आले म्हणून त्यांना फसवण्याचा प्रयत्न केला जातोय, सोलापुरातही एक 'सचिन वाझे' आहे जो महिन्याला लाखोंची वसुली करतोय असा घणाघाती आरोप विरोधी पक्षनेते देवेंद्र फडणवीस यांनी केला होता. या सभागृहात सदस्यांनी बोलल्यानंतर त्यांच्यावर प्रशासन डूख धरणार असेल तर सदस्यांनी बोलायचं की नाही असा प्रश्न उपस्थित होतोय असंही ते म्हणाले होते. या प्रकरणावर बार्शीचे आमदार राजेंद्र राऊत यांचे पुत्र रणवीर राऊतांनी प्रतिक्रिया दिली आहे.
फेसबुक लाईव्हद्वारे दिल्या जात आहेत धमक्या- रणवीर राऊत
बार्शी कृषी उत्पन्न बाजार समितीचे सभापती रणवीर राऊत यांनी म्हटलं आहे की, बार्शीतील माजी आमदार दिलीप सोपल यांचे समर्थक भाऊसाहेब आंधळकर यांनी फेसबुक लाईव्हद्वारे धमकावलं. फेसबुक लाईव्ह येत पुणे, मुंबईतील गॅंगवॉर यांच्यामार्फत तुम्हाला संपवू अशा वारंवार धमक्या शिवसेना नेते भाऊसाहेब आंधळकर यांनी दिल्याचा आरोप रणवीर यांनी केलाय. याचे सर्व पुरावे आम्ही पेन ड्राईवद्वारे पोलिस अधिक्षक कार्यालय, पोलिस निरीक्षक कार्यालय यांना वारंवार पत्रव्यवहार केल्याचा दावा देखील रणवीर राऊत यांनी केला आहे. मात्र माझ्या मागणीचा गंभीरपणे विचार केला जात नसल्याचा देखील आरोप राऊतांनी केला आहे षडयंत्र रचून माझ्यावर हल्ला करुन मला 302 किंवा 307 सारख्या कलमांतर्गत गुंतवण्याचा प्रयत्न करत आहेत. त्यामुळे तात्काळ सशुल्क पोलिस संरक्षण द्यावे, अशी मागणी रणवीर राऊत यांनी केली आहे.
आमदार विधानसभेत काय म्हणाले...
काल विधानसभेत बोलताना आमदार राजेंद्र राऊत म्हणाले होते की, अवैध धंदे करणाऱ्या लोकांना सोलापूर पोलिस संरक्षण देत आहे. आम्ही आवाज उठवला तर आम्हाला खोट्या गुन्ह्यात अडकवण्याच्या धमक्या दिल्या जातात. माझ्या मुलांना धमक्या दिल्या जात आहेत, ते दोघेही लॉ करत आहेत. त्यांना पोलिस संरक्षणाची मागणी करुन देखील दिलं जात नाही. या प्रकरणी सोलापूर जिल्ह्यातील लोक प्रतिनिधींनी वरिष्ठ अधिकाऱ्यांसह गृहमंत्र्यांकडे तक्रार केली असल्याचं ते म्हणाले.
महत्त्वाच्या बातम्या:
महत्त्वाच्या बातम्या
