नाशिकमध्ये थरार! उड्डाण पुलावर धावत्या एसटी बसला भीषण आग,क्षणार्धात धुराचे काळे लोट; मोठा अनर्थ टळला

अग्निशमन कर्मचाऱ्यांनी तत्काळ कारवाई करत आगीवर नियंत्रण मिळवले. मात्र, तोपर्यंत बसचे मोठ्या प्रमाणावर नुकसान झाले होते.

Nashik Bus Fire

नाशिकच्या पाथर्डी फाटा परिसरातील उड्डाण पुलावर एसटी महामंडळाच्या बसला अचानक आग लागल्याची घटना मंगळवारी घडली.

नंदुरबार जिल्ह्यातील शहादा आगाराची ही बस असून, सुदैवाने या घटनेत कोणतीही जीवितहानी झाली नाही.

मिळालेल्या माहितीनुसार, संबंधित बसमध्ये तांत्रिक बिघाड आढळून आला होता. त्यामुळे बसमधील सर्व प्रवाशांना आधीच सुरक्षित ठिकाणी उतरवण्यात आले होते.

त्यानंतर ही बस दुरुस्तीसाठी वर्कशॉपकडे नेत असताना नाशिकच्या पाथर्डी फाटा येथील उड्डाण पुलावर अचानक बसच्या मागील भागातून धूर निघू लागला.

काही क्षणांतच या धुराने आगीचे स्वरूप घेतले आणि संपूर्ण बस आगीच्या भक्ष्यस्थानी सापडली.

आग लागल्याची माहिती मिळताच चालकाने तत्काळ बस रस्त्याच्या कडेला थांबवली आणि वाहतूक पोलिसांना व अग्निशमन दलाला याची माहिती दिली. घटनेनंतर काही वेळातच अग्निशमन दलाचे बंब घटनास्थळी दाखल झाले.

अग्निशमन कर्मचाऱ्यांनी तत्काळ कारवाई करत आगीवर नियंत्रण मिळवले. मात्र, तोपर्यंत बसचे मोठ्या प्रमाणावर नुकसान झाले होते.