Shivshahi Bus : शिवशाही बस बंद होणार की सुरुच राहणार? एसटी महामंडळाकडून पहिल्यांदाच मोठा खुलासा

Shivshahi Bus and ST mahamandal : शिवशाही बस बाबत एसटी महामंडळाने मोठा खुलासा केलाय.

Photo Credit - abp majha reporter

Source : ABPLIVE AI

Shivshahi Bus and ST mahamandal : "गेल्या काही दिवसांपासून सुरु असलेल्या अपघाताच्या बातम्या येत असताना राज्याभरात वेगाने धावणारी शिवशाही बस बंद होणार अशा चर्चा रंगल्या होत्या. दरम्यान, सातत्याने पसरत असलेल्या अफवांवर अखेर एसटी महामंडळाने पडदा टाकलाय. "एसटी महामंडळाकडे सध्या 792 शिवशाही(वातानुकूलित )बसेस सुरु आहेत. त्यामध्ये कोणताही तांत्रिक दोष नाही. तसेच सदर बसेस या बंद करण्याचा एसटी महामंडळाचा कोणताही विचार नाही", असं स्पष्टीकरण एसटी महामंडळाकडून देण्यात आलं आहे. 

शिवशाही बसेसची सेवा अविरतपणे सुरु राहणार 

सध्या एसटी महामंडळाच्या ताफ्यात एकूण 792 शिवशाही बस आहेत. त्यापैकी 500 बस धावत असून उर्वरित 392 बस कार्यशाळेत विविध कारणांसाठी दाखल झाल्या आहेत. शिवशाही बस या वातानुकूलित असतात. मात्र आता त्याचे लालपरीत रुपांतर करण्यासाठी वातानुकूलित यंत्रणा काढण्यात येणार असल्याची चर्चा सुरु होती.. शिवशाहीचे रूपांतर साध्या बसमध्ये केले जाणार असल्याचेही बोलले जात होते. मात्र, एसटी महामंडळाकडून याबाबत स्पष्टीकरण दिले आहे. शिवशाही बसेसची सेवा अविरतपणे सुरु राहणार आहे. त्यामध्ये कोणताही बदल करण्यात आलेला नाही. 

कधी सुरु झाली होती शिवशाहीची बस सेवा?

शिवशाही ही बस प्रथम 10 जून 2017 रोजी मुंबई-राजगिरी मार्गावर धावली होती. तत्कालीन परिवहनमंत्री व एसटी महामंडळाचे अध्यक्ष दिवाकर रावते यांच्या संकल्पनेतून शिवशाही बस सुरू करण्यात आली होती. त्यानंतर राज्यभरात शिवशाही बसेस धाऊ लागल्या. त्यात महिलांना निम्म्या तिकीटाची सुविधा मिळू लागल्याने शिवशाही बस जोरात धाऊ लागल्या. निम्मा दरात वातानुकूलित बसची सुविधा मिळत असल्याने महिला  शिवशाही बसचा मोठ्या प्रमाणात वापर करताना दिसत आहेत. 

गोंदियामध्ये झाला होता शिवशाही बसचा मोठा अपघात 

गोंदिया जिल्ह्यातील सडक अर्जुनी तालुक्यात 29 नोव्हेंबर रोजी भंडारा डेपोच्या शिवशाही बसचा भीषण अपघात झाला होता. दरम्यान, शिवशाहीच्या या अपघातात 11 जणांना आपला जीव गमवावा लागला होता. दरम्यान गेल्या काही दिवसांमध्ये शिवशाही बसच्या अपघाताच्या अनेक घटना समोर आल्या होत्या. गोदिंया अपघात प्रकरणी एसटी महामंडळाच्या भंडारा विभागीय अधिकाऱ्यांनी चालकाला निलंबित केले होते.  

इतर महत्त्वाच्या बातम्या