![ABP Premium](https://cdn.abplive.com/imagebank/Premium-ad-Icon.png)
भाषणात अडथळा आणल्यानं अजितदादांचा संताप; म्हणाले, तू कुणाची सुपारी घेऊन आलाय का? असं चालणार नाही
उपमुख्यमंत्री अजित पवार यांचे भाषण सुरु असताना एका व्यक्तीने भाषणात अडथळा आणला. यावेळी अजित पवार चांगलेच चिडल्याचे पाहायला मिळाले.
![भाषणात अडथळा आणल्यानं अजितदादांचा संताप; म्हणाले, तू कुणाची सुपारी घेऊन आलाय का? असं चालणार नाही Shiv Jayanti 2022 deputy cm Ajit Pawar got angry at one person for interrupting his speech maratha reservation at shivneri भाषणात अडथळा आणल्यानं अजितदादांचा संताप; म्हणाले, तू कुणाची सुपारी घेऊन आलाय का? असं चालणार नाही](https://feeds.abplive.com/onecms/images/uploaded-images/2022/02/19/09896b2b1f7a7545865b64949868c720_original.jpg?impolicy=abp_cdn&imwidth=1200&height=675)
Shiv Jayanti 2022 : गडांचे संवर्धन करण्यासाठी आम्ही प्रयत्नशील आहोत. हे संवर्धन करताना गडाच्या हेरीटेज स्ट्रक्चरला कुठेही धक्का लागणार नाही याची दक्षता घेण्यात येईल, असे वक्तव्य उपमुख्यमंत्री अजित पवार यांनी केले. दरम्यान, अजित पवार यांचे भाषण सुरु असताना एका व्यक्तीने भाषणात अडथळा आणला. यावेळी अजित पवार चांगलेच चिडल्याचे पाहायला मिळाले. तू कोणाची सुपारी घेऊन आलाय का? असे त्या व्यक्तीला अजित पवारांनी खडसावले. आज शिवजयंती आहे. असे चालणार नाही, असेही अजित पवार म्हणाले.
अजित पवार बोलण्यास उभे राहिल्यावर प्रेक्षकांमधील एका व्यक्तीकडून मराठा आरक्षणासाठी श्वेतपत्रिका काढण्याची मागणी करण्यात आली. त्यानंतर अजित पवारांनी त्या व्यक्तीला खाली बसायला सांगितले. तसेच त्या व्यक्तीवर अजित पवार संतापल्याचे पाहायला मिळाले. तू कोणाची सुपारी घेऊन आलाय का? असे त्या व्यक्तीला खडसावत अजित पवार यांनी संताप व्यक्त केला आहे. मराठा सामाजाला आरक्षण मिळालं पाहिजे हीच आमची भुमिका आहे. मात्र, प्रश्न न्यायालयात अडकला आहे. नियमात बदल करून आरक्षण द्यायचे असेल तर केंद्र सरकारकडून नियमातच बदल करावा लागेल असेही अजित पवार यावेळी म्हणाले. त्याचबरोबर शिवनेरी आंब्याला जी आय मानांकन मिळवण्यासाठी प्रयत्न सुरू असल्याचेही अजित पवार यांनी सांगितले.
मराठा आरक्षणाच्या मुद्यावरुन अजित पवार चांगलेच संतापल्याचे पाहयला मिळाले. मी, बाळासाहेब थोरात, दिलीप वळसे पाटील आम्ही काही मराठ्यांच्या पोटचे नाहीत का? आम्हाला आमच्या जातीचा अभिमान नाही का ? पण शिवाजी महाराजांनी काय शिकवलंय? सर्वांना सोबत घेऊन जायलाच शिकवलंय ना ? इतर कुठल्या समाजाच्या आरक्षणाला धक्का न लागता मराठा समाजाला आरक्षण मिळाले पाहिजे हीच आमची भुमिका असल्याचे यावेळी अजित पवार म्हणाले.
महाराष्ट्राचे आराध्य दैवत छत्रपती शिवाजी महाराज यांची आज जयंती आहे. त्यानिमित्त राज्यभर विविध कार्यक्रमाचे आयोजन करण्यात आले आहे. शिवाजी महाराज यांचे जन्मस्थळ असलेल्या शिवनेरी किल्ल्यावर देखील शिवजयंती मोठ्या उत्साहात ढोल ताश्यांची गजरात साजरी करण्यात आली. शिवनेरी गडावर शासकीय कार्यक्रम आयोजीत करण्यात आला होता. यावेळी राज्याचे उपमुख्यमंत्री अजित पवार, महसूलमंत्री बाळासाहेब थोरात, पर्यावरणमंत्री आदित्य ठाकरे उपस्थित होते.
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)
![उमेश अलोणे, एबीपी माझा](https://feeds.abplive.com/onecms/images/author/edf3be0fff591493dbcd992552913783.jpeg?impolicy=abp_cdn&imwidth=70)