समीर वानखेडे आणि क्रांती रेडकर यांची सोशल मीडियाविरोधात कोर्टात याचिका
समाज माध्यमांवर पसरणाऱ्या खोट्या आणि द्वेषयुक्त वक्त्व्य आणि मजकूरावर कायमस्वरूपी मनाई करण्यात यावी, अशी मागणी करत मुंबईतील दिंडोशी दिवाणी सत्र न्यायालयात वानखेडे दांपत्यानं धाव घेतली आहे.
मुंबई : नार्कोटिक्स कंट्रोल ब्युरो (एनसीबी)चे विभागीय संचालक समीर वानखेडे आणि त्यांची पत्नी अभिनेत्री क्रांती रेडकर यांनी आता सोशल मीडियाविरोधात कोर्टात धाव घेतली आहे. फेसबुक, ट्विटर आणि गुगल ही माध्यमं आपली जबाबदारी विसरून केवळ आपला व्यवसाय वाढवण्याकडे भर देत असल्याची वानखेडे कुटुंबियांनी तक्रार दिली आहे. वानखेडेंविरोधात समाज माध्यमांवर पसरणाऱ्या खोट्या आणि द्वेषयुक्त वक्त्व्य आणि मजकूरावर कायमस्वरूपी मनाई करण्यात यावी, तसेच हे पसरवणा-यांची खाती बंद करावीत अशी मागणी करत मुंबईतील दिंडोशी दिवाणी सत्र न्यायालयात वानखेडे दांपत्यानं धाव घेतली आहे.
कॉर्डिलिया क्रुझ ड्रग्स प्रकरणी एनसीबीकडून सुपरस्टार शाहरुख खानचा मुलगा आर्यन खानला अटक करण्यात आल्यानंतर एनसीबीचे संचालक समीर वानखेडे यांच्यासह त्यांच्या कुटुबियांवरही सर्वसामान्य जनतेपासून राजकीय नेत्यांपर्यंत अनेकांकडनं वैयक्तिक दावे, विधानं आणि टीका टिप्पणी करण्यात आली. त्याचे तीव्र पडसाद हे सोशल मीडियावरही उमटले. फेसबूक, ट्विटर आणि इन्स्टाग्राम सारख्या सोशल मीडियावरून समीर वानखेडे आणि त्यंच्या पत्नी अभिनेत्री क्रांती रेडकर यांच्यावर वैयक्तिकरित्या टीकेसह त्यांना जीवे मारण्याची धमकीही देण्यात आली. त्याविरोधात समीर आणि क्रांती यांनी आता दिंडोशी दिवाणी सत्र न्यायालयात धाव घेतली आहे.
विविध वृत्तवाहिन्यांचे सोशल मीडिया हँडल कोणत्याही निर्बंधाशिवाय कामं करतात आणि त्यांचा वापर करून चुकीची माहिती पसरविली जात असल्याचा दावा त्यांनी या याचिकेतून केला आहे. तर दुसरीकडे, एनसीबीच्यावतीने वानखेडे करत असलेल्या तपासामुळे प्रभावित झालेल्या लोकांकडून त्यांच्याविरोधात खोटी आणि चुकीची माहिती पसरविण्यात येत असल्याचंही या याचिकेतही म्हटलेलं आहे. अश्या लोकांविरोधात कडक पावलं उचलण्यात सोशल मीडिया कंपन्या अयशस्वी ठरल्याचा आरोपही त्यांनी या याचिकेतून केला आहे. अशी चुकीची वक्तव्य सोशल मीडियावर करत काही राजकीय लोकांनी आपली नागरी भावना, विवेक आणि नैतिकता गहाण ठेवल्या आहेत. त्यामुळे सोशल मीडिया कंपन्यांनी या लोकांना त्यांच्या प्लॅटफॉमवर अशा प्रकारच्या निराधार पोस्ट करण्यापासून रोखावं, अशी मागणीही या याचिकेतून करण्यात आली असून त्यावर 17 डिसेंबर रोजी सुनावणी पार पडणार आहे.
Sameer Wankhede : एक माणूस, दोन धर्म... तीन दाखले! समीर दाऊद वानखेडे की समीर ज्ञानदेव वानखेडे?
संबंधित बातम्या :
महत्त्वाच्या बातम्या
