कोल्हापूरकरांचा नाद खुळा! लग्न सोहळ्यासाठी अनोखी शक्कल; सोशल डिस्टन्ससह सर्व नातेवाईकांची हजेरी

कोरोना व्हायरसमुळे कोल्हापूरमध्ये एक लग्न अनोख्या पद्धतीने पार पडले. या विवाह सोहळ्याचं कौतुक आता सर्वच थरातून होत आहे.

कोल्हापूर : कोरोना महामारीमुळे संपूर्ण देशात लॉकडाऊन जाहीर करण्यात आले आहे. याचा फटका सर्वांनाच बसत आहे. यंदा होणारी अनेक लग्नही पुढं ढकललीत. मात्र, अशा परिस्थितीत अनोखी शक्कल लढवत कोल्हापूर जिल्ह्यातील अर्जुनवाडीत एक लग्न झालं. या विवाहाला प्रत्यक्षात जरी कमी लोक उपस्थित असले तरी तंत्रज्ञानाच्या मदतीने अनेक नातेवाईकांनी या कार्यक्रमाला हजेरी लावली. विशेष म्हणजे ज्यांना आहेर करायचा आहे, त्यांनी मुख्यमंत्री सहायता निधीला मदत करण्याचे आवाहन नवदाम्पत्याकडून करण्यात आले. त्यामुळे या विवाहाचे सर्वच थरातून कौतुक होत आहे.

सीआरपीएफमध्ये नोकरी करत असलेल्या अभिजीत दोरगुडे याचं लग्न रूपाली निर्मळकर हिच्याशी ठरलं होत. मात्र, लॉकडाऊन असल्यामुळे सगळीच अडचण. मात्र, त्यावर अनोखी शक्कल लढवत अगदी कमी लोकांमध्ये हा विवाह सोहळा उरकला. त्यासाठी पै पाहुण्यांना निमंत्रण व्हाट्सअॅपवर देण्यात आलं. तर त्यांना फेसबुक लाईव्हवर विवाहात सहभागी होण्याचा आग्रह केला. नातेवाईकही आनंदाने सहभागी झाले. फेसबुकवरच शुभेच्छाही दिल्या अन् मोबाईलवर अक्षताही टाकल्या. या विवाह सोहळ्यासाठी ज्यांना आहेर करायचे होते त्यांना मुख्यमंत्री सहाय्यता निधीचा अकांऊट नंबर देण्यात आला होता. या माध्यमातून कोरोनाशी लढाईला हातभारही लावला. या अनोख्या लग्नाने गर्दी करणाऱ्यांना नवीन आदर्श घालून दिला.

कोरोनामुळे घरगुती विवाह कोरोना विषाणूचा संसर्ग रोखण्यासाठी संपूर्ण देशभरात लॉकडाऊन जाहीर करण्यात आलं आहे. याचा फटका विवाह सोहळ्यांना बसत असून अनेक कार्यक्रम रद्द करण्यात आले आहे. यवतमाळमध्ये अशीच एक घटना समोर आलीय. संचारबंदीमुळे दोनवेळा लग्नाची मुहूर्त चुकल्याने लग्नाच्या तिसऱ्या वेळी नववधु थेट दुचाकी चालवत नवरदेवाच्या घरी पोहचली. वधूच्या आई वडिलांच्या अनुपस्थितीत हे लग्न पार पडले. या लग्नाला मोजकेच चारपाच लोक उपस्थित होते. हा विवाह दोन एप्रिलला पार पडला.

यवतमाळ शहरातील संकटमोचन परिसरात राहणाऱ्या सुकेशनी दडांजे या मुलीचा विवाह बाबुळगाव तालुक्यातील अंतरगाव येथील एका तरुणा सोबत नऊ मार्चला ठरला होता. मुला मुलीकडच्या मंडळींनी जोरदार तयारी केली. लग्नपत्रिका छापल्या मात्र दरम्यान कोरोनाचा विळखा वाढतात चालला असल्याचे लक्षात आल्याने अशा परिस्थितीत कोणाला कोरोना संसर्ग होऊ नये, म्हणून दोन्हीकडच्या मंडळींनी समंजस भूमिकेतून 9 मार्च या तारखेचा विवाह पुढे ढकलण्याचा निर्णय घेतला. पुढे कोरोना संसर्ग कमी होईल, अशी आशा करून तो विवाह 31 मार्चला करण्याचे ठरवले. मात्र, दुसऱ्या वेळी सुध्दा नियोजित विवाह कोरोनामुळे झाला नाही. त्यामुळे शेवटी नवरदेवाच्या दारातच हा विवाह सोहळा पूर्ण झाला.

Maharashtra Corona | महाराष्ट्रात कोरोनाबाधितांची संख्या तीन हजारांच्या पुढे, बारा तासात 165 नवे कोरोना रुग्ण