महाविकास आघाडी सरकार 'अमर, अकबर, अँथनी' प्रमाणे हिट, नाना पटोलेंचे भाजपला उत्तर

अमर, अकबर, अँथनी हे अन्याय, अत्याचाराविरोधात होते. लोकांना न्याय देणारे होते. म्हणून तो सिनेमा हिट झाला होता. तसेच हे सरकार त्याच पद्धतीने जनतेमध्ये हिट होणार असल्याचे नाना पटोलेंनी म्हटलं.

Nana_Patole

जालना : महाविकास आघाडी सरकारमध्ये समन्वय नसल्याची टीका सातत्याने भाजपच्या नेत्यांकडून होत आहे. हे सरकार फार काळ टिकणार नाही असंही भाजपकडून सांगितलं जातं. मात्र महाविकास आघाडी सरकार म्हणजे अमर, अकबर, अँथनी असल्याचं नाना पटोले यांनी भाजपला प्रत्युत्तर दिलं आहे. 

अमर, अकबर, अँथनी हा सिनेमा त्यांनी बघितला नसेल. अमर, अकबर, अँथनी हे अन्याय, अत्याचाराविरोधात होते. लोकांना न्याय देणारे होते. म्हणून तो सिनेमा हिट झाला होता. तसेच हे सरकार त्याच पद्धतीने जनतेमध्ये हिट होणार असल्याचे त्यांनी म्हटलं आहे. भाजपचे नेते रेल्वे राज्यमंत्री  रावसाहेब दानवे यांनी राज्यातील महाविकास आघाडी सरकार अमर, अकबर, अँथनी असे तीन तोंड असलेलं सरकार असल्याची टीका केली होती. यावेळी त्यांना हा प्रश्न विचारण्यात आला असता त्यांनी आपल्या खास शब्दात प्रत्युत्तर दिले. 

दरम्यान यावेळी त्यांनी देशाला आर्थिक खाईत लोटणारे सरकार पाण्याखाली डुबणार असल्याचं देखील म्हटलं. जालना येथे काँग्रेस कार्यकर्ते आणि पदाधिकारी मेळावा घेण्यात आला जालना शहरातील अंबड चौफुली येथील एका लॉन्सवर आयोजित करण्यात आलेल्या कार्यक्रमानंतर पत्रकारांशी ते बोलत होते. 

नाना पटोलेंच्या कार्यक्रमात सोशल डिस्टन्सिंगचा फज्जा

जालना जिल्ह्यातील मंठा येथे काँगेस आपल्या दारी या उपक्रमाचे काँग्रेस प्रदेशाध्यक्ष नाना पटोले आणि काँग्रेस आमदार राजेश राठोड यांच्या उपस्थितीमध्ये उदघाटन करण्यात आले. यावेळी  भाजपच्या 40 कार्यकर्त्यानी नाना पटोले यांच्या उपस्थितीमध्ये काँग्रेसमध्ये प्रवेश केला. यावेळी नाना पटोले यांचे कलरफुल स्वागत करण्यात आले. नाना पटोले यांनी हलगी वाजवत बंजारा समाजातील महिलांसोबत परंपरिक नृत्यावर ठेका देखील धरलेला पाहायला मिळाला. येथे मोठ्या प्रमाणावर गर्दी जमली होती. त्यामुळे सर्व कार्यक्रमात कोरोनाच्या नियमांचे उल्लंघन झाल्याचे पाहायला मिळाले.  

इतर बातम्या