Maharashtra Gram Panchayat Elections 2021 LIVE Updates: ग्रामपंचायत निवडणुकीचा धुरळा!

Maharashtra Gram Panchayat Elections 2021, Polling on 15 January 2021 LIVE Updates: राज्यातील जनतेचे लक्ष लागून असलेल्या 14 हजार गावांमध्ये राजकीय धुरळा उडणार आहे. राज्यातील 34 जिल्ह्यांतील सुमारे 14 हजार 234 ग्रामपंचायतींच्या सार्वत्रिक निवडणुकांसाठी 15 जानेवारी 2021 रोजी मतदान होणार आहे. तर 18 जानेवारीला मतमोजणी पार पडणार आहे.

Background

Maharashtra Gram Panchayat Elections 2021 LIVE Updates:  राज्यातील ग्रामपंचायत निवडणुकीचा प्रचार आज थांबला आहे. येत्या 15 जानेवारीला ग्रामपंचायत निवडणुकीसाठी मतदान होणार आहे. तर 18 जानेवारीला मतमोजणी पार पडणार आहे. राज्यात 34 जिल्ह्यातील 14, 234 ग्रामपंचायतींसाठी निवडणूक पार पडणार आहे. एप्रिल ते जून 2020 या कालावधीत मुदत संपलेल्या 1 हजार 566 ग्रामपंचायतींच्या सार्वत्रिक निवडणुकांसाठी 31 मार्च 2020 रोजी मतदान होणार होते. परंतु, कोविड-19 ची परिस्थिती उद्‌भवल्याने 17 मार्च 2020 रोजी हा निवडणूक कार्यक्रम स्थगित करण्यात आला होता. त्यानंतर तो पूर्णपणे रद्द करण्यात आला होता. यासह डिसेंबर 2020 अखेर मुदत संपणाऱ्या व नव्याने स्थापित होणाऱ्या सर्व ग्रामपंचायतींसाठी ही निवडणूक घेण्यात येत आहे.

 

मतदान 15 जानेवारी 2021 रोजी सकाळी 7.30 ते सायंकाळी 5.30 या वेळेत होईल. मतमोजणी 18 जानेवारी 2021 रोजी होईल. गडचिरोली जिल्हा आणि गोंदिया जिल्ह्यातील चार तालुके वगळता सर्व ठिकाणी सकाळी 7.30 ते सायंकाळी 5.30 या वेळेत मतदान होईल. गडचिरोली आणि गोंदियातील चार तालुक्यांमध्ये दुपारी 3.00 पर्यंत मतदानाची वेळ असेल.

 

कोरोनाबाधित रुग्णांना मतदानाची विशेष सुविधा

 

कोरोनाबाधित आणि विलगीकरण कक्षातील व्यक्ती; तसेच दोनदा तपासणीनंतरही शरीराचे तापमान विहित निकषांपेक्षा जास्त असलेल्या मतदारांना मतदानाची वेळ संपण्याच्या अर्धातास आधी प्रतिबंधात्मक उपायांचे काटेकोर पालन करून मतदान करता येईल, अशी माहिती राज्य निवडणूक आयुक्त यू. पी. एस. मदान यांनी दिली आहे.

 

कोल्हापुरात अंधश्रद्धेच्या नावावर लोकशाहीचा बाजार, शपथा घेऊन मतदान करण्यास दबाव

 

मतदानाच्या एक दिवस आधी मतदान केंद्राची जागा व साहित्य सॅनिटाईज केले जाईल. प्रत्येक मतदान केंद्राच्या प्रवेशाच्या ठिकाणी थर्मल स्कॅनिंगची व्यवस्था करण्यात येईल. एखाद्या मतदाराच्या शरीराचे तापमान विहित निकषापेक्षा जास्त असल्यास पुन्हा दुसऱ्यांदा तापमान घेतले जाईल. ते कायम असल्याचे आढळल्यास मतदारास टोकन दिले जाईल आणि त्यास मतदान संपण्याच्या अर्धा तास आधी बोलवण्यात येईल. सामाजिक अंतर राखण्याच्यादृष्टीने देखील दक्षता घेण्यात येईल. मतदाराची ओळख पटण्यासाठी मतदारांना आवश्यकतेनुसार फेसमास्क काढावा लागेल. यासह विविध मार्गदर्शक सूचनादेखील आधीच देण्यात आल्या आहेत, असेही मदान यांनी सांगितले.

 

निवडणूक होणाऱ्या ग्रामपंचायतींची जिल्हानिहाय संख्या
ठाणे- 158, पालघर- 3, रायगड- 88, रत्नागिरी- 479, सिंधुदुर्ग- 70, नाशिक- 621, धुळे- 218, जळगाव- 783, अहमनगर- 767, नंदुरबार- 87, पुणे- 748, सोलापूर- 658, सातारा- 879, सांगली- 152, कोल्हापूर- 433, औरंगाबाद- 618, बीड- 129, नांदेड- 1015, उस्मानाबाद- 428, परभणी- 566, जालना- 475, लातूर- 408, हिंगोली- 495, अमरावती- 553, अकोला- 225, यवतमाळ- 980, वाशीम- 163, बुलडाणा- 527, नागपूर- 130, वर्धा- 50, चंद्रपूर- 629, भंडारा- 148, गोंदिया- 189 आणि गडचिरोली- 362.

18:54 PM (IST)  •  15 Jan 2021

वर्धा - कारंजा (घाडगे) तालुक्यातील खैरी (पुनर्वसन) येथील नागरिकांचा ग्रामपंचायत मतदानावर बहिष्कार. मागण्यांची पूर्तता होईस्तोवर यापुढे प्रत्येक निवडणुकीवर बहिष्कार टाकण्याचा इशारा

18:53 PM (IST)  •  15 Jan 2021

नंदुरबार - नवापूर तालुक्यातील केळी ग्रामपंचायत मध्ये मतदानाचा हक्क बजावण्यासाठी नागरिकांना नागन प्रकल्पाच्या पाण्याखाली आलेल्या पुलावरून प्रवास करत मतदानाचा हक्क बजावावा लागला

18:54 PM (IST)  •  15 Jan 2021

जळगाव - ग्रामपंचायत निवडणूक प्रचाराच्या निमित्ताने मतदारांना पैसे वाटप करीत असल्याचा संशयावरून नेरी ग्रामस्थांनी एका व्यक्तीस चांगलाच चोप देत पोलिसांच्या ताब्यात दिल्याची घटना जामनेरतील नेरी गावात घडली होती.

18:53 PM (IST)  •  15 Jan 2021

यवतमाळ : 101 वयाच्या आज्जीने बजावला मतदानाचा हक्क. महागाव तालुक्यातील हिवरा संगम येथील सखुबाई मारोती जामकर या 101 वयाच्या आज्जीने मतदानाचा हक्क बजावला येथील वार्ड क्रमांक 1 साठी त्यांनी मतदान केले.

18:24 PM (IST)  •  15 Jan 2021

जालना जिल्ह्यातील भोकरदन तालुक्यातील कोठा दाभाडी या गावात हृदय विकाराच्या झटक्याने उमेदवाराचा मृत्यू झाल्याची दुर्दैवी घटना घडली आहे , त्यामुळे मतदान केंद्राच्या बाजूलाच मतदानाच्या दिवशी त्यांच्यावर अंत्यसंस्काराची दुर्दैवी वेळ नातेवाईक व समर्थकांवर आली. प्रभाकर शेजुळ (वय 60) असे निधन झालेल्या उमेदवाराचे नाव असून त्यांच्या निधनाने गावात हळहळ व्यक्त होतेय..