महाराष्ट्र सदन घोटाळा : लोकसभा निवडणुकीसाठी शड्डू ठोकलेल्या भुजबळांच्या अडचणीत वाढ होण्याची शक्यता!
छगन भुजबळ, पंकज भुजबळ आणि समीर भुजबळ यांना मनी लाँड्रींग प्रकरणातून निर्दोष सोडल्याविरोधात अंजली दमानिया यांनी हायकोर्टात धाव घेत दाद मागितली होती.
मुंबई : महाराष्ट्र सदन घोटाळा प्रकरणी निर्दोष सुटका झालेले राज्याचे अन्न व नागरी पुरवठा मंत्री छगन भुजबळ हे याच प्रकरणी पुन्हा एकदा अडचणीत येण्याची शक्यता निर्माण झाली आहे. छगन भुजबळांसह निर्दोषमुक्त केलेल्या इतर आरोपींना हायकोर्टाकडून नोटीस जारी करण्यात आली असून चार आठवड्यांत भूमिका स्पष्ट करण्याचे निर्देश देण्यात आले आहेत. छगन भुजबळ, पंकज भुजबळ आणि समीर भुजबळ यांना मनी लाँड्रींग प्रकरणातून निर्दोष सोडल्याविरोधात अंजली दमानिया यांनी हायकोर्टात धाव घेत दाद मागितली होती.
एसीबीच्या मूळ केसमध्ये आरोपींना डिस्चार्ज
मुंबई विशेष सत्र न्यायाधीश सातभाई यांनी पुराव्यांकडे दुर्लक्ष करून भुजबळांना दिलासा दिल्याचा आरोप अंजली दमानियांकडून करण्यात आला आहे. 2021 मध्ये मुंबई सत्र न्यायालयातील विशेष कोर्टानं ठराविक आरोपींना डिस्चार्ज केल्याविरोधात याचिका दाखल करण्यात आली आहे.
या संदर्भात अँटी करप्शन ब्युरोमध्ये जी केस दाखल ती अंजली दमानिया आम आदमी पार्टीत असताना दाखल झालेल्या जनहित याचिकेवर आधारावर होती. याच प्रकरणांत कोर्टाने एसआटी चौकशीचे आदेश दिले होते. या प्रकरणी एसआयटी स्थापन झाल्यानंतर गुन्हा नोंदवला गेला होता. नंतर ईडीकडून देखील ईसीआयआर दाखल करण्यात आला होता. याच एसीबीच्या मूळ केसमध्ये आरोपींना डिस्चार्ज करण्यात आलं आहे.
अंजली दमानियांकडून पुनर्विचार याचिका दाखल
या निर्णयाविरोधात मूळ याचिकाकर्ता असल्याने अंजली दमानिया यांनी पुनर्विचार याचिका दाखल केली आहे. यानंतर हायकोर्टानं यावर आता भुजबळंसह इतर सर्व आरोपींना नोटीस जारी केली आहे. याचप्रकरणी सहआरोपी दीपक देशपांडेंना अद्याप दोषमुक्त केलेलं नाही. देशपांडे तत्कालीन बांधकाम विभाग सचिव होते. त्यांनी दाखल केलेल्या दोषमुक्तीच्या याचिकेवर दोन आठवड्यात सुनावणी होणार आहे.
छगन भुजबळ सार्वजनिक बांधकाम मंत्री असताना जारी करण्यात आलेल्या विविध कंत्राटामधून भुजबळ कुटुंबीयांच्या कंपन्यांना रोख रक्कम लाचेच्या स्वरुपात मिळाल्याचा आरोप होता. महाराष्ट्र सदन व इंडिया बुल्स प्रकरणात राज्याच्या लाचलुचपत प्रतिबंधक विभागाने स्वतंत्र गुन्हे दाखल केल्यानंतर सक्तवसुली संचालनालयाने भुजबळांविरोधात काळा पैसा प्रतिबंधक कायदान्वये दोन गुन्हे दाखल केले होते.
लाचलुचपत प्रतिबंधक विभागाच्या न्यायालयाकडे दोषमुक्त करण्यासाठी छगन भुजबळांनी अर्ज दाखल केला होता. त्यांच्यासोबत त्यांचे पुतणे समीर भुजबळ यांनी देखील दोषमुक्त करण्यासाठी अर्ज दाखल केला होता. त्यानंतर न्यायालयाने भुजबळांची निर्दोष मुक्तता केली होती.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
