कोरोनाशी लढणाऱ्या आशा स्वयंसेविकांचं आंदोलन; सुरक्षा, वाढीव मोबदल्याची मागणी

राज्यभरात जवळपास 70 हजार आशा स्वयंसेविका आहेत. तर जवळपास साडेतीन हजार गटप्रवतर्क आहेत. या परिस्थितीत स्वयंसेविका जवळपास 80 प्रकारची कामे करत असतात.

Written By : आफताब शेख, एबीपी माझा | Updated at : 12 May 2020 12:39 AM (IST)

coronavirus, Asha workers protest for Security and demand for increased compensation कोरोनाशी लढणाऱ्या आशा स्वयंसेविकांचं आंदोलन; सुरक्षा, वाढीव मोबदल्याची मागणी

सोलापूर : कोरोनाच्या युद्धजन्य परिस्थितीत घराघरात जाऊन सर्व्हेक्षण करणाऱ्या आशा स्वयंसेविकांनी आजपासून काळ्या फिती लावून काम करण्याचा निर्णय घेतला आहे. सुरक्षा आणि वाढीव मोबदला मिळावा यासाठी आशा स्वयंसेविकांनी हे आंदोलन सुरु केलं आहे. महाराष्ट्र राज्य आशा-गटप्रवर्तक कर्मचारी कृती समितीतर्फे हे आंदोलन पुकारण्यात आलं आहे. 13 मे पर्यंत काम करत असताना हातावर काळ्या फिती लावून सरकारचे लक्ष वेधण्याचे प्रयत्न आशा स्वयंसेवक करत आहेत.

कोरोनाच्या काळात घराघरात जाऊन सर्व्हेक्षण करणे व यासारखी अनेक काम आशा स्वयंसेविका आणि गटप्रवर्तक करत आहेत. मात्र त्यांना मोबदला म्हणून अत्यंत तुटपुंजी रक्कम दिली जात असल्याचा आरोप आशा स्वयंसेविकांनी केला. स्वत:सह कुटुंबियांचे जीव धोक्यात घालून काम करत असताना कित्येक वेळा लोकांकाडून चुकीची वागणूक मिळते. अनेकांचे पती किंवा घरातील मंडळी मोलमजूरी करत काम करतात.

लॉकडॉऊनमुळे त्यांची कामे बंद आहेत. अशात संसाराचा गाडा हाकण्यासाठी मानधन न देता महिन्याकाठी ठराविक रक्कम देण्यात यावी. तसेच आरोग्य कर्मचाऱ्यांप्रमाणे विमा सरंक्षण देण्यात यावे, अशी मागणी आशा स्वयंसेवकांनी केली.

राज्यभरात जवळपास 70 हजार आशा स्वयंसेविका आहेत. तर जवळपास साडेतीन हजार गटप्रवतर्क आहेत. या परिस्थितीत स्वयंसेविका जवळपास 80 प्रकारची कामे करत असतात. त्या कामाच्या आधारवर त्यांना मोबदला दिला जातो. या मोबदल्याचा दर जुना असून तो आता वाढवण्याची गरज असल्याचे मत आशा स्वयंसेविकांनी व्यक्त केले. दरम्यान 13 मे पर्यंत हे आंदोलन सुरु राहणार असून सरकारने गांभीर्यांने या मागण्याचा विचार करावा अशी विनंती महाराष्ट्र राज्य आशा-गटप्रवर्तक कर्मचारी कृती समितीचे महासचिव सलीम पटेल यांनी केली.

संबंधित बातम्या

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.