Akola News : कूलरचा शॉक लागून आणखी एका व्यक्तीचा मृत्यु; महिनाभरातील तिसरी घटना
Akola News : अकोल्यात (Akola) कुलरच्या (Cooler) विजेचा धक्का लागून आणखी एका व्यक्तीला आपला जिव गमवावा लागलाय. घरात लावलेल्या कूलरमधील विजेचा धक्का लागल्याने एका इसमाचा जागेवरच मृत्यू झाला आहे.
Akola News अकोला : आपण कुलरमध्ये पाणी भरताय? अथवा कूलर सुरू असताना त्याला हात लावताय? तर सतर्कता बाळगा. कारण अकोल्यात (Akola) कुलरच्या (Cooler) विजेचा धक्का लागून आणखी एका व्यक्तीला आपला जिव गमवावा लागलाय. घरात लावलेल्या कूलरमधील विजेचा धक्का लागल्याने या इसमाचा जागेवरच मृत्यू झाला आहे. नितीन गजानन वानखडे असं शॉक लागून मरण पावलेल्या व्यक्तिचं नाव आहे. अकोला (Akola News) जिल्ह्यातील मळसुर गावात ही दुःखद घटना घडली आहे. गेल्या महिनाभरातील ही सलग तिसरी घटना असल्याने कूलर उन्हाळ्यात दिलासादायक असला तरी, तो काही अंशी जीवघेणा तर ठरत नाहीये ना? असा प्रश्न या निमित्याने उपस्थीत केला जातोय. तर दुसरीकडे, या घटनेमुळे परिसरात एकच शोककळा पसरली आहे.
महिनाभरातील तिसरी घटना
नितीन गजानन वानखडे (वय.38 वर्ष) हे कामावरुन घरी परतले असता, घरातील कूलर बंद पडला म्हणून त्यांनी कूलर चालू करायचा प्रयत्न केला. कूलरला स्पर्श करताच त्यांना विजेचा धक्का बसला आणि कूलर त्यांच्या अंगावर पडला. दरम्यान त्यांना विजेचा जोरदार शॉक लागला. ही घटना त्यांचे वडील आणि त्यांच्या पत्नीच्या लक्षात येताच त्यांनी तात्काळ विद्युत पुरवठा खंडित केला. त्यानंतर त्यांनी ग्रामस्थांच्या मदतीच्या नितीन यांना उपचार्थ रुग्णालयात नेले, मात्र तेथे पोहोचण्यापूर्वी वाटेतच त्यांचा दुर्दैवी मृत्यू झाला होता. त्यांच्या पश्चात आई-वडील, पत्नी आणि दोन लहान मुले असा परिवार आहे.
कूलरचा शॉक लागून सात वर्षीय चिमुकलीचा दुर्दैवी मृत्यू
एकीकडे राज्यात अवकाळी पावसाने दमदार हजेरी लावली असली तरी उकाड्यात देखील वाढ झाली आहे. त्यामुळे नागरिक या वातावरणातील सततच्या बदलामुळे हैराण झाले आहे. अशातच प्रधान्य दिले जातंय ते कूलर सारख्या उपकरणांना. मात्र, गेल्या महिन्याभरात अकोला शहरात कूलरचा शॉक लागून वेगवेगळ्या अपघाताच्या घटना घडल्या आहेत. नुकतेच अकोला शहरातील माजी नगरसेवक अमोल गोगे यांची 7 वर्षीय मुलगी युक्ती ही घरात खेळत असताना कूलरजवळ गेली. दरम्यान, कूलरमधील विजेचा धक्का लागल्याने या मुलीचा जागेवरच मृत्यू झाला. युक्तीचे आईवडील आणि कुटुंबीय घरातच होते.
मात्र, त्यांच्या लक्षात येईपर्यंत युक्तीचा मृत्यू झाला होता. युक्तीला विजेचा धक्का लागल्याची माहिती मिळताच कुटुंबीय आणि परिसरातील नागरिकांनी तिला तातडीने रुग्णालयात उपचारासाठी नेले असता, डॉक्टरांनी तिचा मृत्यू झाल्याचे सांगितले. त्यानंतर मात्र गोगे कुटुंबीयांवर दुःखाचा डोंगरच कोसळला. दरम्यान कूलरला असलेल्या बटनांची एक वायर कटून त्यामधील करंट कूलरच्या जाळीला लागला. संपूर्ण कूलरमधून विजेचा प्रवाह सुरू असतानाच युक्तीचा हात कूलरला लागला होता. त्यातूनच ही दुर्घटना घडली असल्याचे स्पष्ट झाले होते.
काही दिवसांपूर्वीचं कुलरमुळे पोलिसाचा दुर्दैवी मृत्यू
काही दिवसांपूर्वी अशीच एक घटना अकोल्यात घडली होती. यात पाणी भरतांना भिंतीवरील वायरला स्पर्श झाल्यानं जोरदार विजेचा धक्का लागून पोलीस दलातील अंमलदार गणेश रामराव सोनोने (57, रा. अंबिका नगर, मलकापूर) यांचा दुर्दैवी मृत्यू झाला होता. या घटनेमुळे अकोला पोलीस दलात हळहळ व्यक्त केल्या गेली. आता पुन्हा नितीन वानखडे यांचा या घटनेत दुर्दैवी मृत्यु झाल्याने परिसरात शोककळा पसरली आहे.
इतर महत्वाच्या बातम्या
महत्त्वाच्या बातम्या
