कर्नाटकचे मुख्यमंत्री सिद्धरमय्या यांचा सांगलीत भव्य सत्कार; आगामी विधानसभा, लोकसभा निवडणुकीच्या दृष्टीनं काँग्रेसचं शक्तिप्रदर्शन
कर्नाटकचे मुख्यमंत्री सिद्धरमय्या यांचा सांगलीत भव्य सत्कार होणार आहे.
Maharashtra Sangli Politics: सांगलीत (Sangli News) लोकसभा निवडणुकीचे (Lok Sabha Election 2024) पडघम वाजायला सुरुवात झाली आहे. जिल्हा कॉंग्रेसनं (Congress) 25 जून रोजी कर्नाटकचे मुख्यमंत्री (Karnataka CM) सिद्धरमय्या (Siddaramaiah) यांच्या सत्कार कार्यक्रमाच्या निमित्तानं मोठं शक्तिप्रदर्शन करत आगामी लोकसभा आणि विधानसभा निवडणूकीचं रणशिंग फुकलं आहे. तर दुसरीकडे सांगली लोकसभा आणि सांगली विधानसभेच्या जागेवर राष्ट्रवादी अजून तरी अप्रत्यक्षपणे दावा सांगण्याचा प्रयत्न करतेय. यामध्ये सध्या भाजपचे (BJP) खासदार असलेले संजयकाका पाटील यांनी पुन्हा आपल्यालाच लोकसभा निवडणुकांचे तिकीट मिळेल, असं गृहीत धरून निवडणुकीच्या तयारीला लागले आहेत. तर दुसरीकडे मागील वेळी स्वाभिमानी शेतकरी संघटनेकडून लोकसभा लढवलेले विशाल पाटील कॉंग्रेसकडून तिकीट मिळवण्याच्या आशेवर पुन्हा सक्रिय होताना दिसत आहेत.
कर्नाटकमध्ये करिष्मा घडवत काँग्रेसनं भाजपची सत्ता उलथवून टाकून काँग्रेसचा मुख्यमंत्री बसवला. सिद्धरमया हे कर्नाटकातील काँग्रेसचे मुख्यमंत्री बनले. हाच चेहरा काँग्रेस आता महाराष्ट्रामध्ये वापरून आगामी विधानसभा आणि लोकसभा निवडणुका डोळ्यांसमोर ठेवून शक्ती प्रदर्शन करण्याच्या तयारीत आहे. त्यासाठीच सांगलीमध्ये 25 जून रोजी जिल्हा काँग्रेस कमिटी सिद्धरमय्या यांचा भव्य सत्कार केला जाणार आहे. त्यासोबतच भव्य शेतकरी आणि कार्यकर्ता मेळाव्याचंही आयोजन केलं जाणार आहे. नेहमीच नगरमधील कल्पद्रुम क्रीडांगणावर हा काँग्रेस पक्षाचा भव्य मेळावा पार पडणार आहे. यासाठी काँग्रेस पक्षाचे महाराष्ट्रातील सर्व नेते उपस्थित राहणार आहेत. काँग्रेसचे माजी मंत्री आणि आमदार विश्वजीत कदम हे या मेळाव्याचे आणि सत्कार समारंभाचे स्वागताध्यक्ष असणार आहेत.
मागील लोकसभा निवडणुकीत काँग्रेसऐवजी स्वाभिमानी शेतकरी संघटनेकडे लोकसभेची जागा गेली होती. विशाल पाटलांनी ही निवडणूक लढवली आणि दोन नंबरची मतं देखील मिळवली. आता मात्र काँग्रेसकडे ही जागा लोकसभेची राहावी यासाठी काँग्रेस प्रयत्नशील आहे. मात्र महाविकास आघाडीमध्ये घटक पक्ष असलेल्या राष्ट्रवादीची देखील या सांगली लोकसभा आणि सांगली विधानसभेवर नजर आहे. प्रत्यक्षपणे जरी या जागेची अजून राष्ट्रवादी मागणी करत नसली तरी कार्यकर्त्यांकडून राष्ट्रवादीकडे हे लोकसभा आणि विधानसभा मतदारसंघ जावेत, अशी इच्छा व्यक्त केली जात आहे. मात्र सांगलीची लोकसभेची जागा काँग्रेसचीच आहे. आमचा या जागेवर पूर्ण अधिकार आहे. ती कोणत्याही एका विशिष्ट गटाची नसून पूर्ण पक्षाची आहे, असे विश्वजित कदम म्हणाले आहेत. यावर जयंत पाटील यांनी मात्र जिल्ह्यात राष्ट्रवादीची ताकद वाढली आहे. मात्र लोकसभा किंवा विधानसभेच्या जागा वाटपाबाबत महाविकास आघाडीच्या बैठकीतच निर्णय घेतला जाईल, असं सांगत सावध भूमिका घेतली आहे.
दुसरीकडे सांगली लोकसभेवर पुन्हा भाजपकडून आपल्यालाच तिकीट मिळेल या आशेनं विद्यमान खासदार संजय काका पाटील पुन्हा सक्रिय झाले आहेत. मागील लोकसभा निवडणुकीत गोपीचंद पडळकर आपल्या विरोधात होते, पण आता गोपीचंद भाजपमध्ये आहेत. त्यामुळे त्यांची मतं देखील आपल्यालाच मिळतील असा देखील विश्वास संजय काका पाटील यांना आहे. तर जत्रा आली म्हणून सराव करणाऱ्यांमधला मी पैलवान नाही, निवडून येण्यासाठी कायम लोकांमध्ये राहावं लागतं, असं म्हणत संजयकाका पाटलांनी कॉंग्रेसचे लोकसभेसाठी पुन्हा इच्छुक असलेल्या विशाल पाटलांना टोला हाणला आहे. या टीकेला विशाल पाटील यांनी अजून तरी समोर न येता सोशल मीडियाद्वारे भाजपच्या खासदारांनी नऊ वर्षात काय केलं असा सवाल करत आहे. नाकी नऊ आलेले नऊ वर्ष असं कॅम्पेन राबवत खासदारांनी जिल्ह्यासाठी काय केलं, असा सवाल विचारत आहेत.
महत्त्वाच्या बातम्या
ट्रेंडिंग न्यूज
