अॅम्बुलन्स न मिळाल्याने मृतदेह 20 किमी सायकलवर नेला

शहडोल (मध्य प्रदेश): अॅम्बुलन्स न मिळाल्यामुळे मृतदेह 20 किलोमीटरपर्यंत सायकलवर न्यावा लागल्याची घटना समोर आली आहे. मध्यप्रदेशमधील शहडोल जिल्ह्यातील ही माणुसकीला काळिमा फासणारी घटना आहे. कोणाचंही सहकार्य न मिळाल्यामुळे पीडित व्यक्तिवर ही वेळ ओढावली.   रामाबाई गौड या 70 वर्षीय महिलेचा मुलीच्या घरी मृत्यू झाला. त्यांचा मृतदेह मूळगावी नेण्यासाठी जावई गोरे सिंह यांनी वाहनाची व्यवस्था करण्याचा प्रयत्न केला.मात्र कोणीही येण्यास तयार न झाल्यामुळे सायकलवरुन मृतदेह नेण्याचा निर्णय घेतला. भर दुपारी गोरे सिंह यांनी मृतदेह सायकलवर बांधला आणि रामाबाईंच्या मूळगावी पोहचवला.   गोरे सिंह यांच्यासोबत त्यांची पत्नी आणि तीन मुलं होते. सर्वांनी आळीपाळीने सायकल चालवली. या घटनेत माणुसकीला काळिमा फासणारी गोष्ट म्हणजे गोरे सिंह यांना मदत करण्यासाठी सरकार तर दूरच मात्र त्यांचे शेजारी आणि इतर कोणाचेही हात धजावले नाही.