Drugs News : देशातील 7 टक्के लोकसंख्या ड्रग्जच्या आहारी, अमित शांहाची माहिती, ड्रग्जच्या विरोधात लढण्याचं आवाहन
Amit Shah On Illegal Narcotics : अवैध मार्गाने देशात ड्रग्ज मोठ्या प्रमाणात येत असून त्याविरोधात आपण सर्वांनी लढलं पाहिजे, ही संधी पुन्हा मिळणार नाही असं अमित शांहांनी म्हटलंय.
नवी दिल्ली : देशातील 7 टक्के लोकसंख्या ही ड्रग्ज म्हणजे अमली पदार्थांच्या आहारी गेल्याचं आकडेवारीतून समोर आल्याची माहिती केंद्रीय गृहमंत्री अमित शाह यांनी सांगितली. ड्रग्जच्या वाढत्या धोक्याविरोधात लढण्याचं मोठं आव्हान असून तपास यंत्रणांनी त्यासाठी वेगवेगळ्या मार्गाची पडताळणी करण्याचे निर्देशही शाहांनी दिले. नवी दिल्लीतील विज्ञान भवनमध्ये 'ड्रग ट्रॅफिकिंग अँड नॅशनल सिक्युरिटी' या परिषदेचं आयोजन करण्यात आलं होतं. त्यामध्ये बोलताना अमित शाहांनी ही माहिती दिली.
अमित शाह म्हणाले की, देशातील 7 टक्के लोकसंख्या ही अवैध ड्रग्जच्या आहारी गेली आहे. ड्रग्ज हे एक प्रकारचे कॅन्सर असून त्यामुळे देशातील एक पीढी नष्ठ होऊ शकते. ड्रग्जच्या विरोधात कठोर भूमिका घेण्याची हीच ती योग्य वेळ आहे. ड्रग्जच्या विरोधात लढण्याची ही संधी जर आपण आज वाया घालवली तर त्यामुळे मोठं नुकसान होऊ शकेल.
पुढच्या 10 दिवसात ड्रग्ज नष्ट करणार
गेल्या वर्षी देशात अवैध मार्गाने येणारे 16,914 कोटींचे ड्रग्ज पकडण्यात यश आल्याची माहिती अमित शाहांनी दिली. स्वातंत्र्यानंतरची ही सर्वात मोठी कारवाई असल्याचंही ते म्हणाले. 'ड्रग डिस्पोजल फोर्नाईट' या कार्यक्रमाची घोषणाही अमित शाहांनी यावेळी केली. त्या माध्यमातून येत्या 10 दिवसात सुमारे 8,600 रुपये किमतीचे ड्रग्ज हे नष्ट केले जाणार आहे.
ड्रग्जविरोधातील कारवाईत सात पटींनी वाढ
सन 2004 ते 2014 या दरम्यान एकूण 3.63 लाख किलो इतके ड्रग्ज पकडण्यात आले होते. पण 2014 ते 2024 या दरम्यान त्या कारवाईत सात पटीने वाढ होऊन 24 लाख कोटी रुपयांचे ड्रग्ज पकडण्यात आल्याची माहिती अमित शाहांनी दिली. 2004 ते 2014 या दरम्यान नष्ट करण्यात आलेल्या ड्रग्जची किंमत ही 8,150 कोटी रुपये इतकी होती. तर 2014 ते 2024 या कालावधीत त्यामध्ये सात पटीने वाढ झाली. या काळात 56,861 कोटी रुपयांचे ड्रग्ज नष्ट करण्यात आल्याची माहिती अमित शाहांनी दिली.
भारत हा केमिकल्सचा जगातील मोठा निर्माता देश असल्याने ड्रग्जविरोधात कारवाई करण्यासाठी अडचणी येत असल्याचं अमित शाहांनी स्पष्ट केलं. काही केमिकल निर्मात्या कंपन्यामधून ड्रग्जची निर्मिती होत असल्याचं गेल्या काही काळात समोर आलं आहे. त्याच पार्श्वभूमीवर देशातील अवैधरित्या कार्यरत असलेल्या किमान 50 केमिकल कंपन्यांवर कारवाई करण्यात आल्याची माहिती अमित शाहांनी दिली.
महत्त्वाच्या बातम्या
