Walmik Karad: वाल्मीक कराडवरील आर्थिक आणि मानसिक दबाव वाढवला, सरेंडर करण्याशिवाय पर्यायच उरला नाही

Beed Crime: बँकेचं खातं गोठवलं, संपत्तीही जप्त होण्याची चिन्हं, आर्थिक नाकेबंदीमुळे वाल्मीक कराड याच्यासमोर कोणताही पर्याय उरला नसल्याचे सांगितले जाते.

Walmik Karad

Source : ABPLIVE AI

बीड: पवनचक्की मालकाकडून खंडणी मागितल्याचा आरोप आणि संतोष देशमुख प्रकरणात रडारवर असलेल्या वाल्मीक कराड यांच्या अडचणी वाढल्या आहेत. संतोष देशमुख हत्याप्रकरणी सीआयडीकडून सध्या वेगाने तपास सुरु आहे. सीआयडीच्या अधिकाऱ्यांनी रविवारी वाल्मीक कराड यांच्याशी संबंधित महिलांची विविध पोलीस ठाण्यात बसवून चौकशी केली. याप्रकरणात आतापर्यंत 100 जणांची चौकशी करण्यात आली आहे. यामध्ये वाल्मीक कराडच्या अनेक निकटवर्तीयांचा समावेश आहे. या सगळ्यामुळे वाल्मीक कराड याच्यावरील दबाव वाढला असून तो कोणत्याही क्षणी पोलिसांसमोर शरणागती पत्कारेल, असे सांगितले जात आहे. 

संतोष देशमुख यांची हत्या होऊन आता 21 दिवस उलटले आहेत. तेव्हापासून वाल्मीक कराड फरार आहेत. मात्र, सीआयडी पथकाने अलीकडेच वाल्मीक कराड यांचे बँक खाते गोठवले होते. याशिवाय, वाल्मीक कराड यांची संपत्ती जप्त करण्यासाठी न्यायालायकडून परवानगी मिळवण्याच्या हालचालीही सुरु झाल्या होत्या. तसेच वाल्मीक कराड यांच्याकडे पासपोर्ट नाही. त्यामुळे त्यांना देशाबाहेर पळून जाणेही शक्य नाही. सीआयडीच्या पथकांनी कराड यांच्या निकटवर्तीयांची चौकशी सुरु केल्याने त्यांच्यावरील मानसिक दबावही वाढला आहे. याशिवाय, बँक खाती गोठवून केलेल्या आर्थिक नाकेबंदीमुळे वाल्मीक कराड याच्यासमोर आता कोणताही पर्याय उरला नसल्याचे सांगितले जाते. त्यामुळेच आता वाल्मीक कराड सोमवारी संध्याकाळी किंवा मंगळवारी सकाळपर्यंत पोलिसांना शरण येईल, असे सांगितले जात आहे. 

वाल्मीक कराड हा राष्ट्रवादी काँग्रेसचे मंत्री धनंजय मुंडे यांना कार्यकर्ता आहे. धनंजय मुंडे यांच्या विधानसभा निवडणुकीची सर्व सूत्रे वाल्मीक कराड यानेच हाताळल्याचे सांगितले जाते. वाल्मीक कराड याच्या सांगण्यावरुनच सरपंच संतोष देशमुख यांची हत्या झाली, असा आरोप होत आहे. बीडमधील सर्वपक्षीय नेत्यांनी वाल्मीक कराड याच्यावर थेट आरोप केले आहेत. त्यामुळे धनंजय मुंडे हेदेखील अडचणीत आले आहेत. वाल्मीक कराड कनेक्शनमुळे धनंजय मुंडे यांनी मंत्रि‍पदाचा राजीनामा द्यावा, अशी मागणी केली जात आहे. 

CID पथक आज कोणाला चौकशीला बोलावणार? 

बीड येथील सरपंच संतोष देशमुख हत्या प्रकरण आणि पवन ऊर्जा कंपनीला खंडणी मागितल्याप्रकरणी सीआयडीचे पथक वेगाने तपास करत आहे. सीआयडीचे एकूण नऊ पथकं या प्रकरणाचा तपास करत आहेत. सूत्रांच्या माहितीनुसार आतापर्यंत शंभरहून अधिक लोकांची चौकशी सीआयडीच्या पथकाने केली आहे. यामध्ये प्रामुख्याने मनी प्रकरणातील आरोपी वाल्मीक कराड यांच्या पत्नीची देखील चौकशी करण्यात आली आहे. तर वाल्मीक कराड यांच्याशी संबंधित असलेल्या आणखी दोन महिलांची देखील काल सीआयडीच्या पथकाने चौकशी केली. आज देखील चौकशीचे हे सत्र सुरू राहणार असल्याची शक्यता आहे. 

आणखी वाचा