Amravati Crime : बहिणीच्या प्रियकराला दारु पाजून रेल्वे ट्रॅकवर फेकले, दोन्ही पाय कापल्याने तरुण गंभीर जखमी

Amravati Crime : बहिणीसोबत असलेल्या प्रेमसंबंधाचा राग मनात धरुन तरुणाने मित्रांच्या मदतीने प्रियकराला दारु पाजून रेल्वे रुळावर फेकून दिलं. या घटनेत रेल्वे अंगावरुन जाऊन गुडघ्याखालील पाय कापल्याने बहिणीचा प्रियकर गंभीर जखमी झाला आहे.

Chandur Railway Police Station Amravati

Amravati Crime : बहिणीसोबत असलेल्या प्रेमसंबंधाचा राग मनात धरुन तरुणाने मित्रांच्या मदतीने प्रियकराला (Boyfriend) दारु पाजून रेल्वे रुळावर फेकून दिलं. या घटनेत रेल्वे अंगावरुन जाऊन गुडघ्याखालील पाय कापल्याने बहिणीचा प्रियकर गंभीर जखमी झाला आहे. अमरावती (Amravati) जिल्ह्यातील चांदूर रेल्वे (Chandur Railway) शहरालगत असलेल्या राजना रोडवरील रेल्वे ट्रॅकवर (Railway Track) सोमवारी (5 जून) मध्यरात्रीच्या दरम्यान ही धक्कादायक घटना घडली. या प्रकरणी पोलिसांनी अवघ्या दोन तासात दोन आरोपींना अटक केली तर एका आरोपीचा शोध सुरु आहे.
   
अजय पुंडलिकराव ठोंबरे (वय 27 वर्षे) असं जखमी तरुणाचं नाव आहे. त्याच्यावर नागपूरमधील रुग्णालयात उपचार सुरु आहेत. तर रोहन वासुदेव यादव (वय 22 वर्ष), गणेश बाबाराव मोरे (वय 23 वर्ष) आणि धनंजय उर्फ सोनू विजय बाबर (वय 24 वर्ष) (सर्व रा. शिवाजी नगर, चांदूर रेल्वे) अशी आरोपींची नावे आहेत. यापैकी रोहन यादव हा आरोपी पसार झाला आहे.

आधी दारु पाजून लाथाबुक्क्यांनी मारहाण, मग रेल्वे रुळावर फेकलं

जखमी अजय ठोंबरे याचे एका आरोपीच्या बहिणीसोबत प्रेमसंबंध आहेत. परंतु हे प्रेमसंबंध आरोपीला मान्य नव्हते. याचा राग मनात धरुन त्या आरोपीने इतर दोन आरोपींसोबत संगणमत करुन अजय ठोंबरले शिवाजी पार्क, चांदूर रेल्वे इथे बोलावून दारु पाजली आणि त्याला लाथाबुक्याने मारहाण केली. यानंतर अजय ठोंबरे हा बेशुद्ध झाल्यानंतर तिन्ही आरोपींनी त्याला जीवे मारण्याच्या उद्देशाने जवळच असलेल्या रेल्वे रुळावर फेकले. रेल्वे ट्रॅकवर पडलेल्या अजयचे गुडघ्याखालील पाय रेल्वेमुळे कापल्याने तो गंभीर जखमी झाला.

दोन तासात दोन आरोपींना बेड्या, तिसऱ्याचा शोध सुरु

हा युवक जखमी अवस्थेत पडलेला असल्याचं बकऱ्या चारणाऱ्याला मंगळवारी सकाळी दिसला. याची माहिती चांदूर रेल्वे पोलिसांना देण्यात आली. यानंतर जखमी तरुणाला पुढील उपचारासाठी नागपूरमधील रुग्णालयात रेफर करण्यात आले. चांदूर रेल्वे पोलिसांनी या प्रकरणाची खोलात जाऊन चौकशी केली आणि वेगाने तपास चक्रे फिरवली. अवघ्या दोन तासात आरोपी गणेश मोरे आणि धनंजय उर्फ सोनू बाबर या दोघांना ताब्यात घेतलं. या दोन्ही आरोपींनी संबंधित गुन्ह्याच्या कबुली दिली आणि संपूर्ण माहिती पोलिसांना सांगितली. तर याची तिसरा आरोपी पसार झाला असून पोलीस त्याचा शोध घेत आहेत.

हेही वाचा