Night Life | मुंबईत आज मध्यरात्रीपासून 'नाईट लाईफ'ला सुरूवात

आज मध्यरात्रीपासून मुंबईत नाईट लाईफ सुरु होणार आहे. त्यामुळे खऱ्या अर्थाने मुंबई आजपासून जागी राहणार आहे.

मुंबई : मुंबईत आज मध्यरात्रीपासून नाईट लाईफ सुरु होणार आहे. ज्यामध्ये रात्रभर मॉल, हॉटेल्स, थिएटर्स चालू राहणार आहेत. त्यामुळे आता मुंबईकरांना अगदी मध्यरात्रीही शॉपिंग आणि जेवण्याची हौस भागवता येणार आहे. दरम्यान मुंबईच्या नाईट लाईफमध्ये पब आणि बारचा समावेश नाही. पब आणि बार यांना रात्री दीडपर्यंतच मद्यविक्रीची परवानगी असून यामध्ये कुठलाही बदल केलेला नाही.

नाईट लाईफवर प्रतिक्रिया देताना आदित्य ठाकरेंनी म्हटलं की, रात्रीसुद्धा जीवाची मुंबई व्हायचीच आता जेवायची मुंबई होईल. मुंबई 24 तास हा कायदा आपण उपलब्ध करुन दिला आहे. लगेच काही सगळं एकत्र सुरु होऊ शकणार नाही. काही नियम आपण घालून दिले आहेत. सुरक्षाव्यवस्था, कामगारांच्या तीन शिफ्ट, कचरा वर्गीकरण यांसारख्या बाबी पूर्ण झाल्यानंतर सर्व सुरळीत सुरु होऊ शकेल. त्यासाठी कदाचित एक महिनाही लागेल. पुढचे कितीतरी वर्षे आता ही लाईफस्टाईल असेल. हा कुठला एक दिवसाचा फेस्टिवल नाही. ऑनलाईन 24 तास शॉपिंग करतो, ती संधी रिटेलर्सला उपलब्ध करुन देत आहोत.

नाईट लाईफचे नियम काय असणार?

पोलीस, मुंबई महापालिका, उत्पादन शुल्क विभाग, कामगार विभाग, पर्यटन विभाग यांची काय काय जबाबदारी असणार याचे नियम आहेत. नाईट लाईफमध्ये सहभागी मॉल, रेस्टॉरंट यांनी कुठले नियम पाळणे गरजेचे आहे, याची विस्तृत नियमावली महापालिकेने बनवली आहे. रात्री दीड वाजेनंतर दारु बंद असणार आहे. रात्री दीड वाजेपर्यंतच मद्यविक्रीस परवानगी असणार आहे. रात्री दीड वाजेनंतर दारु विकताना आढळल्यास संबंधितांचा परवाना दोन वर्षांसाठी रद्द केला जाईल. तसेच तेथील मॉल किंवा मिलला नाईट लाईफ सुरू ठेवण्यास परवानगी नाकारली जाईल. कामगार कायद्याची पूर्णपणे अंमलबजावणी केली जाईल.

जुहू चौपाटी, गिरगाव चौपाटी, बीकेसी, वरळी सी फेस, वांद्रे बँडस्टँड, नरिमन पॉईंट रोड आणि एनसीपीए कॉर्नर या ठिकाणी फूड ट्रक म्हणजे वाहनावरील उपहारगृह लावण्यास परवानगी दिली जाईल. परंतु एका ठिकाणी पाच फूड ट्रक उभे राहतील, जे रात्री 10 ते सकाळी 6 वाजेपर्यंत सुरू राहतील.