Stree 2 Box office collection: 'स्त्री-2'चा बॉक्स ऑफिसवर धुमाकूळ, पाचव्या दिवशीच पार केला कोट्यवधींचा टप्पा

Stree 2 Box office collection Day 5: राजकुमार राव आणि श्रद्धा कपूर यांच्या 'स्त्री 2' चित्रपटाने रक्षाबंधनाच्या दिवशी 200 कोटींचा टप्पा पार केला आहे.

Written By : जयदीप मेढे | Updated at : 19 Aug 2024 11:55 PM (IST)

Stree 2 Box office collection Day 5

Source : instagram

Stree 2 Box Office collection Day 5: राजकुमार राव (Rajkumar Rao) आणि श्रद्धा कपूर (Shraddha Kapoor) यांच्या 'स्त्री 2' (Stree 2) या सिनेमाने बॉक्स ऑफिसवर अक्षरश: धुमाकूळ घातला आहे. हा सिनेमा 15 ऑगस्ट रोजी प्रदर्शित करण्यात आला. पहिल्याच दिवसापासून सिनेमाला तुफान प्रतिसाद मिळत असल्याचं चित्र बॉक्स ऑफिसवर पाहायला मिळालं.

पाचव्या दिवशीही या सिनेमाची बॉक्स ऑफिसवर यशस्वी घोडदौड सुरुच आहे. रक्षाबंधनाच्या दिवशीही प्रेक्षकांनी या सिनेमाला तुफान प्रतिसाद दिला. पण मागील चार दिवसांचा विचार केला असता सोमवारच्या बॉक्स ऑफिस कलेक्शनमध्ये घट झाल्याचं पाहायला मिळतंय. या सिनेमाच्या बॉक्स ऑफिस कलेक्शनविषयी जाणून घेऊयात.

स्त्री 2 ने पार केला 200 कोटींचा टप्पा

पहिल्या दिवशीच 50 कोटींहून अधिक कमाई करणाऱ्या 'स्त्री 2'ने रविवारी चौथ्या दिवशी 50 कोटींहून अधिक कमाई केली. सोमवारी या चित्रपटाच्या एकूण कलेक्शनने 200 कोटींचा आकडा पार केला आहे. सॅनसिल्कच्या अहवालानुसार स्त्री 2 ने सोमवारी रात्री 10:30 वाजेपर्यंत 37 कोटींची कमाई केली आहे. चित्रपटाचे आतापर्यंत एकूण कलेक्शन 228.45 कोटी रुपये झाले आहे.

'स्त्री 2' चं चार दिवसांचं बॉक्स ऑफिस कलेक्शन

15 ऑगस्ट रोजी प्रदर्शित झालेल्या स्त्री 2 ने पहिल्या दिवशी 51.8 कोटी रुपयांची कमाई केली होती. त्याचप्रमाणे अॅडव्हान्स बुकींगमध्येच या सिनेमाने 8.5 कोटींची कमाई केली आहे. यानुसार स्त्री 2 ने पहिल्याच दिवशी 60.1 कोटींची कमाई केली होती.दुसऱ्या दिवशी म्हणजेच शुक्रवारी 16 ऑगस्ट रोजी स्त्री 2 ने बॉक्स ऑफिसवर 31.4 कोटींची कमाई केली होती.

तिसऱ्या दिवशी, स्त्री 2 ने शुक्रवारपासून सर्वोत्तम कलेक्शन केले. शनिवारी 17 ऑगस्ट रोजी राजकुमार आणि श्रद्धाच्या चित्रपटाने 43.85 कोटी रुपयांची कमाई केली. रविवारी, त्याच्या रिलीजच्या चौथ्या दिवशी, चित्रपटाने चमकदार कामगिरी केली आणि बॉक्स ऑफिसवर 55.9 कोटी रुपयांचे रेकॉर्डब्रेक कलेक्शन केले.

2024 मध्ये सर्वाधिक कमाई करणारा दुसरा चित्रपट

'स्त्री 2' तिसऱ्या दिवसाच्या कलेक्शनसह वर्षातील तिसरा सर्वाधिक कमाई करणारा चित्रपट ठरला आहे. आता चौथ्या दिवसाच्या कमाईने या चित्रपटाने अजय देवगणच्या 'शैतान' चित्रपटाला मागे टाकले आहे. 'शैतान'ने भारतात 176.05 कोटी रुपयांची कमाई केली होती आणि वर्षातील दुसऱ्या क्रमांकाची सर्वाधिक कमाई करणाऱ्या चित्रपटाचा विक्रम त्याच्या नावावर होता. 'फायटर' या बॉलिवूडपटाने यंदाच्या वर्षात सर्वाधिक कमाई केली.