Satyendar Jain Arrested: आम आदमी पार्टीचे नेते सत्येंद्र जैन यांना एसीबीकडून अटक, मोदी सरकारचा अंत निश्चित, केजरीवालांचा आरोप, भाजपकडूनही पलटवार
Satyendar Jain Arrest: आम आदमी पार्टीचे नेते आणि दिल्लीचे माजी मंत्री सत्येंद्र जैन यांना एसीबीनं अटक केली आहे. अरविंद केजरीवाल यांनी याबाबत प्रतिक्रिया दिली आहे.
Satyendar Jain Arrest: नवी दिल्ली : आम आदमी पार्टीचे नेते सत्येंद्र जैन यांना एसीबीनं अटक केली आहे. मागील सरकारच्या काळातील दिल्ली जल बोर्डातील कथित भ्रष्टाचाराप्रकरणी एसीबीनं ही कारवाई केली आहे. आम आदमी पार्टीचे राष्ट्रीय संयोजक आणि माजी मंत्री अरविंद केजरीवाल यांनीी भाजपवर हल्लाबोल केला आहे. सत्येंद्र जैन यांना भाजपनं पुन्हा एकदा अटक केलं आहे. काही काळापूर्वी या लोकांनी जैन यांना तुरुंगात टाकून त्यांची जी परिस्थिती केली होती, ती सर्वांना माहिती आहे. पहिली केस खोटी होती, ही केस देखील खोटी सिद्ध होईल, असं केजरीवाल म्हणाले.
भाजपची हुकूमशाही कधीपर्यंत चालणार, केजरीवालांचा सवाल
अरविंद केजरीवाल म्हणाले की अखेर कधीपर्यंत भाजपची हुकूमशाही सुरु राहणार आहे? मनाला वाटेल तसे खोटे आरोप करुन तुरुंगात टाकतात. भाजपचा खोटेपणा पुन्हा देशासमोर येईल मात्र, तुरुंगात घालवलेला वेळ आणि मानसिक त्रास याची भरपाई कोण करणार? असा सवाल केजरीवाल यांनी केला. भाजपच्या पापाचा घडा आता भरला आहे, त्यांना कितीही हुकूमशाही करु द्यात, मोदी सरकारचा अंत निश्चित आहे. संपूर्ण आम आदमी पार्टी आणि देशातील जनता सत्येंद्र जैन यांच्यासोबत उभी असल्याचं अरविंद केजरीवाल यांनी म्हटलं.
आपचे नेते मनीष सिसोदिया यांनी देखील एक्सवर पोस्ट केली आहे. पंजाब निवडणुकीपूर्वी पंजाबचे सहप्रभारी सत्येंद्र जैन यांना अटक करण्यात आली आहे. यापूर्वी अडीच वर्षांपर्यंत खोट्या प्रकरणात सत्येंद्र जैन यांना तुरुंगात ठेवण्यात आलं. आता आणखी एक खोटं प्रकरण काढलं आहे, असं सिसोदिया म्हणाले. जेन झी आंदोलन, राम मंदिरातील दान चोरी आणि ई 20 च्या मुद्यांवरुन अडचणीत असलेली भाजप आता पुन्हा एकदा ईडी, एसीबी आणि सीबीआयच्या जुन्याच निवडणुकीतील फॉर्म्युल्याचा वापर करत असल्याचा आरोप सिसोदिया यांनी केला.
भाजपचा आपवर पलटवार
दिल्ली भाजपचे माजी अध्यक्ष वीरेंद्र सचदेवा यांनी आपवर पलटवार केला आहे. सोशल मीडिया एक्सवर पोस्ट करत ते म्हणाले की दिल्लीला लुटणाऱ्यांचा खरा चेहरा समोर आला आहे. आम आदमी पार्टीचे नेते आणि दिल्ली सरकारमधील माजी मंत्री सत्येंद्र जैन यांच्याविरोधात मोठी कारवाई, एसीबीनं दिल्ली जल बोर्डाच्या एसटीपी टेंडर घोटाळ्यातील अनियमितता आणि भ्रष्टाचार प्रकरणात सत्येंद्र जैन यांना अटक केलं असल्याचा दावा सचदेवा यांनी केला.
जनतेच्या पैशांवर टेंडरमधील हेराफेरी आणि कोट्यवधींची लाच, हेच आपचे ईमानदार मॉडेल असल्याचं वीरेंद्र सचदेवा यांनी म्हटलं. पाणी आणि स्वच्छतेच्या नावावर मतं मागितली, कमिशनखोरी केली गेल्याचा आरोप सचदेवांनी केला. दिल्लीच्या जनतेनं यांचं सत्य ओळखलं होतं, आता एका एका चोरीचं उत्तर देण्याची जबाबादरी आपची असल्याचा दावा सचदेवांनी केला. अरविंद केजरीवाल यांनी केलेली पापं जनतेसमोर आल्याचं देखील सचदेवा म्हणाले.
Before You Go
Maharashtra Weather Rain Updates: पावसाचं पॅटर्न बदललं? जुलैमध्ये धो धो कोसळला, ऑगस्टमध्ये गायब; पुढे काय, हवामान विभागाची A टू Z माहिती
महत्त्वाच्या बातम्या
