Laal Singh Chaddha Box Office Collection:  आमिर खानच्या ‘लाल सिंह चड्ढा’कडे प्रेक्षकांनी फिरवली पाठ, तिसऱ्या दिवशी जमवला ‘इतका’ गल्ला!

Laal Singh Chaddha :  बॉलिवूड अभिनेता आमिर खान आणि त्याचा ‘लाल सिंह चड्ढा’ (Laal Singh Chaddha) हा चित्रपट बऱ्याच दिवसांपासून चर्चेत आहे.

Laal Singh Chaddha

Laal Singh Chaddha Box Office Collection: बॉलिवूड अभिनेता आमिर खान (Aamir Khan) आणि त्याचा ‘लाल सिंह चड्ढा’ (Laal Singh Chaddha) हा चित्रपट बऱ्याच दिवसांपासून चर्चेत आहे. प्रदर्शित होण्यापूर्वीच या चित्रपटाला विरोध होत असताना, प्रदर्शित झाल्यानंतरही हा चित्रपट वादाच्या भोवऱ्यात सापडला आहे. भारतीय लष्कराचा अपमान आणि धार्मिक भावना दुखावल्यासारखे अनेक गंभीर आरोपही या चित्रपटावर करण्यात आले आहेत. या सगळ्याचा परिणाम चित्रपटाच्या कलेक्शनवरही होताना दिसत आहे. वादाच्या भोवऱ्यात सापडलेला हा चित्रपट रिलीज होऊन तीन दिवस उलटले आहेत. नुकतेच या चित्रपटाच्या तिसऱ्या दिवसाच्या कमाईचे आकडे समोर आले आहेत.

चित्रपटगृहांमध्ये प्रदर्शित झालेला ‘लाल सिंग चड्ढा’ हा चित्रपट काही विशेष जादू दाखवू शकलेला नाही. ‘लाल सिंह चड्ढा’ या चित्रपटात आमिरसोबत करीना कपूर (Kareena Kapoor-Khan) मुख्य भूमिकेत दिसली आहे. या चित्रपटाने सुरुवातीचे दोन दिवस फारच कमी कमाई केली आहे. आता या चित्रपटाचे तिसऱ्या दिवसाचे कलेक्शन समोर आले आहे. शनिवारी देखील या चित्रपटाच्या कलेक्शनमध्ये घट झाली आहे.

किती झाले कलेक्शन?

पिंकविलाच्या अहवालानुसार, ‘लाल सिंह चड्ढा’ चित्रपटाच्या कलेक्शनमध्ये तिसऱ्या दिवशी किंचितशी वाढ झाली असली, तरी पहिल्या दिवसाच्या तुलनेत हे आकडे कमीच आहेत. रिपोर्टनुसार, चित्रपटाने तिसऱ्या दिवशी सुमारे 8.50 कोटींचा व्यवसाय केला आहे. त्यानंतर चित्रपटाची एकूण कमाई 27 कोटींच्या घरात पोहोचली आहे. या चित्रपटाने पहिल्या दिवशी 11.70 कोटी आणि दुसऱ्या दिवशी 7.26 कोटींचा व्यवसाय केला होता. रिलीज झाल्यापासून हा चित्रपट बॉक्स ऑफिसवर विशेष कामगिरी दाखवू शकलेला नाही. केवळ आमिर खानच नाही, तर त्याच्या चाहत्यांनाही या चित्रपटाकडून खूप आशा होत्या. मात्र, चित्रपटाचे दिवसेंदिवस कमी होत जाणारे कलेक्शन पाहता अभिनेता आणि त्याच्या चाहत्यांच्या अपेक्षा धुळीला मिळाल्याचे लक्षात येते.

'फॉरेस्ट गंप’चा रिमेक

'लाल सिंह चड्ढा' हा चित्रपट 1994 साली प्रदर्शित झालेल्या 'फॉरेस्ट गंप’चा रिमेक आहे. त्यामुळे 'फॉरेस्ट गंप' आणि 'लाल सिंह चड्ढा' या चित्रपटातील काही दृश्यांचा व्हिडीओ 'द अकॅडमी' (The Academy) या ऑस्करच्या अधिकृत सोशल मीडिया पेजवर शेअर करण्यात आला आहे. 'फॉरेस्ट गंप' या चित्रपटाला ऑस्करमध्ये 13 नामांकन मिळाली होती. तर, सहा ऑस्कर पुरस्कारवर या चित्रपटाने आपली नाव कोरले होते. आमिरचा हा चित्रपट प्रदर्शित होण्यापूर्वीच या चित्रपटाला खूप विरोध झाला असला, तरी आमिर आणि करीनाचे चाहते ‘लाल सिंह चड्ढा’ आवर्जून पाहत आहेत. अनेक विरोधानंतर अखेर हा चित्रपट पाहण्यासाठी काही लोक चित्रपटगृहात पोहोचले होते.

वाचा इतर बातम्या: