New Delhi Lok Sabha Election Result : नवी दिल्लीत भाजपची 7 जागांवर जोरदार मुसंडी, आप अन् काँग्रेस पिछाडीवर

New Delhi Lok Sabha Election Result : नवी दिल्लीत भाजपचे उमेदवार सर्व 7 जागांवर आघाडीवर आहेत. आप आणि काँग्रेसला नवी दिल्लीत अपेक्षित यश मिळालेलं नाही.

अरविंद केजरीवाल, नरेंद्र मोदी

Source : PTI

नवी दिल्ली : लोकसभा निवडणुकीची (Lok Sabha Election Result) मतमोजणी सुरु झाल्यानंतर आता चार तास पूर्ण झालेले आहेत. भाजपला (BJP) मध्य प्रदेश, छत्तीसगड, गुजरात आणि नवी दिल्ली, उत्तराखंड, हिमाचल प्रदेश या राज्यांनी एकतर्फी पाठिंबा दिल्याचं चित्र पाहायला मिळतं आहे. नवी दिल्लीमध्ये (New Delhi) आम आदमी पार्टीचे राष्ट्रीय संयोजक अरविंद केजरीवाल (Arvind Kejriwal ) यांनी जामिनावर बाहेर येऊन प्रचार केल्यानंतरही आप आणि काँग्रेसला फायदा होताना दिसत नाही. भाजपनं नवी दिल्लीतील सात जागांवर आघाडी घेतली आहे. 

नवी दिल्ली पुन्हा एकदा भाजपकडे

नवी दिल्लीतील सात लोकसभा मतदारसंघात भाजपचे उमेदवार आघाडीवर आहेत. चांदणी चौक लोकसभा मतदारसंघात भाजपचे प्रवीण खंडेलवाल  हे काँग्रेसच्या जय प्रकाश अग्रवाल यांच्यापेक्षा पुढं आहेत. उत्तर पूर्व दिल्लीत मनोज तिवारी आणि कन्हैय्या कुमार यांच्यात लढत होती. इथं मनोज तिवारी आघाडीवर आहेत. दिल्ली पूर्व लोकसभा मतदारसंघात भाजपचे हर्ष मल्होत्रा आघाडीवर आहेत. त्यांच्या विरोधात आम आदमी पार्टीचे कुलदीप कुमार लढत होते. 

नवी दिल्ली लोकसभा मतदारसंघात भाजपच्या बांसुरु स्वराज आघाडीवर असून त्यांच्याविरोधात लढत असलेले सोमनाथ भारती पिछाडीवर आहेत. 

उत्तर पश्चिम दिल्ली लोकसभा मतदारसंघात भाजपचे योगेंद्र चंदोलिया आणि काँग्रेसचे उदित राज यांच्यात लढत होती. इथं योगेंद्र चंदोलिया आघाडीवर आहेत. 

पश्चिम दिल्ली लोकसभा मतदारसंघात भाजपच्या कमलजीत सेहरावत यांनी आघाडी घेतली आहे. इथं आम आदमी पार्टीचे महाबल मिश्रा यांच्यात लढत होती. 

अरविंद केजरीवाल यांची जादू चाललीच नाही?

नवी दिल्लीचे मुख्यमंत्री आणि आम आदमी पार्टीचे राष्ट्रीय संयोजक अरविंद केजरीवाल यांना कथित मद्य धोरण प्रकरणी ईडीनं अटक केली होती. या अटकेच्या कारवाईनंतर अरविंद केजरीवाल यांनी सुप्रीम कोर्टातून जामीन मिळवत प्रचार केला होता. मात्र, नवी दिल्लीत पुन्हा एकदा भाजपनं वर्चस्व मिळवल्याचं चित्र आहे.  नवी दिल्लीतील सात जागांवर भाजपनं पुन्हा एकदा आप आणि काँग्रेसवर आघाडी मिळवली आहे. 

दिल्लीत पुन्हा भाजप येणार?

नवी दिल्लीतील मतदारांनी विधानसभा निवडणुकीत आणि दिल्ली महापालिका निवडणुकीत आम आदमी पार्टीला पाठिंबा दिला होता. मात्र, लोकसभा निवडणुकीत गेल्या वेळी प्रमाणं यावेळी देखील दिल्लीच्या मतदारांनी लोकसभा निवडणुकीसाठी भाजपला पाठिंबा दिल्याचं सुरुवातीच्या मतमोजणीतून दिसून येत आहे. 
 
दरम्यान, लोकसभा निवडणुकीच्या मतमोजणीत कांटे की टक्कर पाहायला मिळत आहे. देशात एनडीए 270 जागांवर आघाडीवर आहे. तर, इंडिया आघाडी 251 जागांवर आघाडीवर आहेत. 

पाहा व्हिडीओ :

संबंधित बातम्या: