Ratan Tata Passed Away : भारताचा कोहिनूर! रतन टाटांच्या निधनाने देश गहिवरला, कोट्यवधी भारतीयांच्या डोळ्यात पाणी
कट्टर देशभक्त आणि समाजसेवेचा आदर्श जगासमोर उभे करणारे उद्योगपती रतन टाटा यांच्या निधनानंतर देश शोकसागरात बुडाला आहे.
Ratan Tata Passed Away News : कट्टर देशभक्त आणि समाजसेवेचा आदर्श जगासमोर उभे करणारे उद्योगपती रतन टाटा यांच्या निधनानंतर देश शोकसागरात बुडाला आहे. रतन टाटा यांच्या निधनाचे वृत्त येताच, सोशल मीडियातून त्यांना श्रद्धांजली अर्पित केली जात आहे. भारताचा कोहिनुर, एन्ड ऑफ इरा, प्राईड ऑफ इंडिया, वुई मिस, द ग्रेटेस्ट... या हॅशटॅगसह सोशल मीडिया भावुक झाला आहे. फेसबुक, इन्स्टाग्राम आणि ट्विटरवरून रतन टाटा यांचे फोटो आणि आठवणी शेअर केल्या जात आहेत.
रतन टाटा यांच्या उद्योगपती आयुष्यात दडलेला साधा, सरळ आणि समाजाच्या मदतीला धावून जाणारा असामान्य व्यक्ती प्रत्येकजण आपल्या अनुभवातून उलगडत आहे. ट्विटरवर काही क्षणातच लाखो ट्विट्समधू रतन टाटांच्या व्यक्तिमत्वाचे पैलू उलगडले जात आहेत. द्रष्टा, दानशूर, दयाळू, दिलदार, देशप्रमी, नफा -तोटा न पाहणारे रतन टाटा सांगण्याचा प्रयन्त नेटिझन्सकडून होत आहेत.
रतन टाटा यांनी कोरोना काळात देशासाठी केलेली मदत आणि कोविड योध्दासाठी खुले केलेलं ताज हॉटेल, या आठवणींनी आज भारतीय नागरिक गहिवरला आहे. रतन टाटा यांच्यासोबत वेगळाच भावनिक बंध प्रत्येक भारतीयांचा होता, म्हणूनच आज टाटांच्या निधनानंतर भारतीयांच्या डोळ्यात नकळत पाणी येतंय. उद्योगविश्वात एवढा आपलेपणा आणि देशवासीयांचे प्रेम मिळालेले रतन टाटा एकमेव उद्योगपती.
पंतप्रधान नरेंद्र मोदी यांनी एक्स पोस्ट करत रतन टाटा यांना श्रद्धांजली वाहिली आहे. पंतप्रधान मोदी यांनी ट्विट करत म्हटलं की, श्री रतन टाटा एक दूरदर्शी व्यापारी नेते, दयाळू व्यक्तीमत्त्व आणि विलक्षण व्यक्ती होते. त्यांनी भारतामधील सर्वात जुन्या आणि प्रतिष्ठित व्यावसायिक घराण्यांना नेतृत्व प्रदान केलं. त्यांच्या निधनाने अत्यंत दु:ख झाले आहेत. ओम शांती!
पद्मविभूषण आणि पद्मभूषण पुरस्काराने सन्मानित
रतन टाटा यांचा जन्म 1937 मध्ये झाला. 1962 मध्ये ते टाटा समूहात रुजू झाले. 1991 मध्ये त्यांची टाटा सन्सच्या अध्यक्षपदी नियुक्ती झाली. भारत सरकारने रतन टाटा यांना पद्मविभूषण आणि पद्मभूषण या देशातील दोन सर्वोच्च सन्मानांनी सन्मानित केले. राष्ट्र उभारणीतील अतुलनीय योगदानाबद्दल त्यांना हा सन्मान देण्यात आला.
हे ही वाचा -
Ratan Tata Passed Away : उद्योगपती रतन टाटा यांचे निधन, वयाच्या 86 व्या वर्षी घेतला अखेरचा श्वास
महत्त्वाच्या बातम्या
ट्रेंडिंग न्यूज
