Marathwada Weather: मराठवाड्यात पावसाची शक्यता विरली, आता पुढचे 7 दिवस उन्हाचा चटका, शेतकऱ्यांनी काय करावे ?
वसंतराव नाईक मराठवाडा कृषि विद्यापीठ, परभणी येथील ग्रामीण कृषि मौसम सेवा योजनेतील तज्ञ समितीने पुढील प्रमाणे कृषि हवामान आधारीत कृषि सल्ल्याची शिफारश केली आहे.
Marathwada Weather: गेल्या काही दिवसांपासून राज्यभरात थंडीचा जोर ओसरला असून पहाटे हलका गारवा आणि दुपारी उन्हाचा तडाखा वाढला आहे . मागील दोन दिवसांपासून मराठवाड्यात काही ठिकाणी ढगाळ वातावरण होते .उत्तर मराठवाड्यात पावसाची शक्यताही वर्तवण्यात आली होती .मात्र आता ही शक्यता विरली असून पुढील 7 दिवस मराठवाड्यात शुष्क व कोरडे वारे राहणार असून 24 तासात तापमानात दोन ते तीन अंशांची वाढ होण्याची शक्यता प्रादेशिक हवामान केंद्राने वर्तवली आहे . आधी ढगाळ वातावरण आता शुष्क कोरडे हवामान असल्याने तापमानात चढउतार होत आहे .अशा काळात शेतकऱ्यांनी काय करावे ?जनावरांची कशी काळजी घ्यावी ?याबाबत वसंतराव नाईक मराठवाडा कृषी विद्यापीठाने कृषी हवामान सल्ल्याची शिफारस केली आहे . (Marathwada Temperature)
मराठवाड्यात आठवडाभर हवामान कसे ?
प्रादेशिक हवामान केंद्र, मुंबई येथून प्राप्त झालेल्या अंदाजानुसार मराठवाडयात पुढील 7 दिवस हवामान कोरडे राहण्याची शक्यता आहे. मराठवाडयात पुढील दोन दिवसात कमाल तापमानात फारशी तफावत जाणवनार नाही व त्यानंरत हळूहळू 2 ते 3 अं.से. ने वाढ होण्याची शक्यता तर पुढील चार ते पाच दिवस कमाल तापमान सरासरीपेक्षा 3 ते 4 अं.से. ने जास्त राहण्याची शक्यता आहे. मराठवाडयातील उत्तर भागात किमान तापमानात पुढील चोविस तासात 1 ते 2 अं.से. ने घट होऊन त्यानंतर हळूहळू 2 ते 3 अं.से. ने वाढ होण्याची शक्यता आहे. (Weather)
उष्णतेपासून जनावरांना सांभाळा
जनावरे आजारी पडू नयेत म्हणून पशुवैद्यकाच्या सल्ल्याने जनावरांना जंतनाशक पाजावेत व लसीकरण करून घ्यावे तसेच दर पंधरा दिवसाला गोठा व गोठ्याचा परिसरात किटकनाशकाची फवारणी करावी व गोठ्यातील खड्डा व भेगा असतील तर त्या बुजवून घ्याव्यात व गोठा व गोठ्याचा परिसर स्वच्छ ठेवावा.
शेतकऱ्यांनी काय करावे?
- रब्बी ज्वारी पिकात कणसात दाणे भरण्याच्या अवस्थेत (पेरणी नंतर 90 ते 95 दिवस) पाणी द्यावे. दाणे भरण्याच्या अवस्थेत असलेल्या रब्बी ज्वारी पिकाचे पक्षांपासून संरक्षणासाठी उपाय योजना कराव्यात.
- रब्बी ज्वारी पिकात लष्करी अळीचा प्रादुर्भाव दिसून येत असल्यास याच्या व्यवस्थापनासाठी इमामेक्टीन बेन्झोएट 5 टक्के 4 ग्रॅम किंवा स्पिनेटोरम 11.7 एससी 4 मिली प्रति 10 लिटर पाण्यात मिसळून वरील किटकनाशकांची आलटून पालटून फवारणी करावी.
- फवारणी करत असतांना किटकनाशक पोंग्यात पडेल अशाप्रकारे फवारणी करावी. गहू पिक फुलावर असतांना (पेरणीनंतर 65 ते 70 दिवस) पाणी द्यावे व दुधाळ पीक अवस्था (पेरणी नंतर 80 ते 85 दिवस) व दाणे भरताना (पेरणीनंतर 90 ते 95 दिवस) पाणी द्यावे.
- गहू पिकात खोड किडीचा प्रादूर्भाव दिसून येत असल्यास याच्या व्यवस्थापनासाठी पाच टक्के निंबोळी अर्क किंवा प्रादूर्भाव जास्त असल्यास सायपरमेथ्रीन 10% ईसी 10 मिली किंवा क्विनॉलफॉस 25% ईसी 20 मिली प्रति 10 लिटर पाण्यात मिसळुन फवारणी करावी.
- उन्हाळी भुईमूग पिकाची पेरणी 8 फेब्रुवारी पर्यंत करता येते. उन्हाळी भुईमूग पिकात पेरणी पूर्वी पुढील प्रमाणे बीजप्रक्रिया करावी.
i. थायरम 3 ग्रॅम किंवा बाविस्टीन 2 ग्रॅम किंवा ट्रायकोडर्मा 5 ग्रॅम प्रति किलो बियाणे.
ii. प्रति 10 किलो बियाण्यास रायझोबियम व पी.एस.बी. प्रतयेकी 250 ग्राम किंवा द्रव स्वरूपात असेल तर प्रत्येकी 60 मिली. - मका पिकास आवश्यकतेनूसार पाणी द्यावे. वेळेवर पेरणी केलेल्या मका पिकात लष्करी अळीचा प्रादुर्भाव दिसून येत असल्यास याच्या व्यवस्थापनासाठी इमामेक्टीन बेन्झोऐट 5 टक्के 4 ग्रॅम किंवा स्पिनेटोरम 11.7 एससी 4 मिली प्रति 10 लिटर पाण्यात मिसळून वरील किटकनाशकांची आलटून पालटून फवारणी करावी. फवारणी करत असतांना किटकनाशक पोंग्यात पडेल अशाप्रकारे फवारणी करावी.
हेही वाचा:
महत्त्वाच्या बातम्या
