Amol Mitkari Vidhan Bhavan : अमोल मिटकरींचे ठिय्या आंदोलन, PA ला अडवल्याने संताप

अमोल मिटकरींच्या स्वीय सहायकाला (PA) विधानभवनात प्रवेश नाकारल्याने आमदार अमोल मिटकरींनी ठिय्या आंदोलन सुरू केले आहे. विधानभवनाच्या बाहेर पास तपासणी केली जात असताना, ग्रीन पास असलेल्यांनाच आत सोडले जात आहे. येलो पास असलेल्यांना प्रवेश दिला जात नाहीये. यावर अमोल मिटकरींनी सुरक्षा व्यवस्थेवर प्रश्नचिन्ह उपस्थित केले आहे. "काल दिवसभर मोक्यामधले आरोपी, तडीपार असलेले आरोपी, क्रिमिनल असलेले आरोपी यांनी विनापास मोकाट सोडले," असे मिटकरींनी म्हटले आहे. आज अधिवेशनाचा शेवटचा दिवस असताना, पास असूनही स्वीय सहायकाला अडवून ठेवल्याने ही अपमानास्पद वागणूक असल्याचे त्यांनी नमूद केले. लोकप्रतिनिधींसोबत त्यांचा स्वीय सहायक असतो आणि त्यांचे अधिकृत कागदपत्रे स्वीय सहायकाकडे असतात, असे मिटकरींनी सांगितले. जोपर्यंत स्वीय सहायकाला सोडले जात नाही, तोपर्यंत आंदोलन सुरू ठेवण्याची भूमिका त्यांनी घेतली आहे. काल जितेंद्र आव्हाड आणि गोपीचंद पडळकर यांच्या कार्यकर्त्यांमध्ये झालेल्या गोंधळानंतर सुरक्षा नियम कडक करण्यात आले आहेत. सत्ताधारी पक्षाचे आमदार असूनही त्यांना अशा परिस्थितीचा सामना करावा लागत असल्याने त्यांनी नाराजी व्यक्त केली आहे.