Farmers Protest: 'मागण्या पूर्ण होत नसतील तर 4-5 मंत्र्यांना कापा', शेतकरी नेते Ravikant Tupkar यांची संतप्त भावना

शेतकरी नेते रविकांत तुपकर (Ravikant Tupkar) यांनी सरकारवर तीव्र शब्दात हल्ला चढवला असून, सोयाबीन (Soyabean) आणि कापसाला (Cotton) मिळणारा कमी भाव व कर्जमाफीच्या (Loan Waiver) मुद्द्यावरून आक्रमक भूमिका घेतली आहे. 'मी जे बोललो ही महाराष्ट्रातल्या संतप्त शेतकऱ्यांची भावना आहे, जर शेतकऱ्यांच्या मागण्या पूर्ण होत नसतील तर चारपाच मंत्र्यांना कापा,' असे खळबळजनक वक्तव्य तुपकर यांनी केले आहे. सोयाबीनचा उत्पादन खर्च आठ हजार रुपये असताना केवळ साडेतीन हजार रुपये भाव मिळत आहे, तर कापसालाही हमीभावापेक्षा कमी दर मिळत असल्याने जगायचे कसे, असा सवाल त्यांनी उपस्थित केला. निवडणुकीपूर्वी मुख्यमंत्र्यांनी सातबारा कोरा करण्याचे आश्वासन दिले होते, मात्र वर्ष उलटले तरी कर्जमाफी दिली नाही, त्यामुळे शेतकऱ्यांचा संयम सुटत चालला आहे, असेही ते म्हणाले. नेपाळप्रमाणे मंत्र्यांना देश सोडून जावे लागेल, अशी परिस्थिती निर्माण होऊ देऊ नका, असा थेट इशाराही तुपकर यांनी सरकारला दिला आहे.