Sanjay Gaikwad:आमदार संजय गायकवाड यांची माफी, छत्रपती संभाजी महाराजांवरील विधानावर दिलगिरी

शिवसेनेचे आमदार संजय गायकवाड यांनी छत्रपती संभाजी महाराज आणि छत्रपती शिवाजी महाराज यांच्याबद्दल केलेल्या वादग्रस्त वक्तव्याबद्दल अखेर माफी मागितली आहे. त्रिभाषा सूत्राच्या प्रश्नावर प्रतिक्रिया देताना त्यांनी हे वक्तव्य केले होते. "तुम्हाला जगामध्ये टिकायचे असेल तर सगळ्या भाषा अवगत आल्या पाहिजे. मग छत्रपती संभाजी महाराजांनी सोळा भाषा शिकल्या मग ते मूर्ख होते?" असे त्यांनी म्हटले होते. छत्रपती शिवाजी महाराज बहुभाषिक होते, तसेच ताराराणी, येसूबाई, जिजाऊ मासाहेब या सगळ्यांनी हिंदी भाषेसह अनेक भाषा शिकल्या असेही त्यांनी नमूद केले. आपल्या वक्तव्याचा विरोधकांनी विपर्यास केला आणि त्याचा अनर्थ केला, असे गायकवाड यांनी स्पष्ट केले. शिवभक्तांच्या भावना दुखावल्याबद्दल त्यांनी दिलगिरी व्यक्त केली. छत्रपती संभाजी महाराज आणि शिवाजी महाराज हे आपल्या रक्तजाती आहेत, असे सांगत त्यांनी आपली शिवनिष्ठा व्यक्त केली. या विषयावरून वाद करून मतांचे राजकारण करणे चुकीचे आहे, असेही त्यांनी म्हटले. चुकून बाहेर पडलेल्या शब्दांबद्दल त्यांनी दिलगिरी व्यक्त केली.