Khelo India Youth Games 2022 : खो-खोमध्ये महाराष्ट्रच अव्वल, मुलांसह मुलींनी पटकावलं सुवर्णपदक

Khelo india : हरियाणा येथे सुरु असलेल्या खेलो इंडिया युथ गेम्समध्ये महाराष्ट्राच्या खो-खो संघाने अप्रतिम कामगिरी करत सुवर्णपदकावर नाव कोरलं आहे.

खेलो इंडिया युथ गेम्स

Khelo india Games : महाराष्ट्राच्या खेळाडूंनी खेलो इंडिया स्पर्धेत अप्रतिम कामगिरी करत कांस्य आणि रौप्य पदकांसह सुवर्ण पदकांना देखील गवसणी घातली आहे. खेलो इंडिया 2022 स्पर्धा (Khelo India Youth Games 2022) ही स्पर्धा हरियाणा येथील पंचकुला या ठिकाणी सुरु आहे. या स्पर्धेत महाराष्ट्राच्या खेळाडूंनी दमदार कामगिरी सुरु ठेवली असून आज देखील महाराष्ट्राच्या मुलांसह मुलींच्या खो-खो संघाने सुवर्णपदक पटकावलं आहे. 
विशेष म्हणजे दोन्ही संघानी अंतिम सामन्यात ओरिसाच्या संघाला पराभूत केलं. मुलींच्या स्पर्धेत तिसऱ्या स्थानावर पंजाब आणि पश्चिम बंगाल राहिला. तर मुलांमध्ये पश्चिम बंगाल आणि दिल्लीला कांस्यपदक मिळाले. स्पर्धेच्या अखेरच्या दिवशी महाराष्ट्राच्या खो-खो संघांनी सुवर्ण पदक पटकावत स्पर्धेचा शेवट गोड केला.

मुलींचा अंतिम सामना ओरिसासोबत झाला. अत्यंत उत्कंष्ठावर्धक झालेला सामना महाराष्ट्राने 8-6, 7-9,  6-5 अशा फरकाने 21 विरूद्ध 20 च्या गुणांनी विजय मिळवला. ओरिसाने सुरूवातीपासून महाराष्ट्राला चांगली लढत दिली. पण शेवटच्या 20 सेकंदात महाराष्ट्राच्या मुलींनी कमाल केली. सामना संपण्यासाठी एक मिनिट बाकी असताना श्रेया पाटीलने नाबाद खेळी केली. अगदी 20 सेकंद उरली असताना अटीतटीचा प्रसंग ओढावला होता. परंतु तिने उत्कृष्टपणे नाबाद खेळी करून महाराष्ट्राला सुवर्णपदक मिळवून दिले. व्यवस्थापक सुधीर चपळगावकर, चीफ कोच राजेंद्र साप्ते, प्रशांत पवार, सत्येन जाधव यांचे चांगले मार्गदर्शन मिळाले.

जय भवानी-जय शिवाजीचा जयघोष

महाराष्ट्राच्या दोन्ही संघांनी विजय मिळवल्यानंतर जय भवानी-जय शिवाजी असा जयघोष झाला. त्यानंतर महाराष्ट्राने आणलेल्या ढोलाच्या तालावर खेळाडूंनी नाच ही केला. त्यात ओरिसा आणि पश्चिम बंगालमधील खेळाडू देखील सहभागी झाले. त्यामुळे अगदी आनंदी माहोल त्याठिकाणी झाला होता.

हे देखील वाचा-