RCB साठी आनंदाची बातमी, करो या मरो सामन्यात डेथ ओव्हर स्पेशालिस्ट परतला 

RCB, IPL 2022 Update : क्वालिफायर 1 च्या सामन्यात गुजरातने राजस्थानचा पराभव करत फायनलमध्ये धडक मारली.. आज लखनौ आणि आरसीबी यांच्यामध्ये एलिमिनेटरचा सामना रंगणार आहे.

rcb

RCB, IPL 2022 Update : आयपीएलच्या पहिल्या क्वालिफायर 1 च्या सामन्यात गुजरातने राजस्थानचा पराभव करत फायनलमध्ये धडक मारली.. आज लखनौ आणि आरसीबी यांच्यामध्ये एलिमिनेटरचा सामना रंगणार आहे. हरणारा संघाचे आव्हान संपुष्टात येणार आहे, तर जिंकणारा संघ क्वालिफायर 2 मध्ये राजस्थानविरोधात भिडणार आहे. एलिमिनेटरसामन्यापूर्वी आरसीबीसाठी दिलासादायक बातमी समोर आली आहे. आरसीबीचा डेथ ओव्हर स्पेशालिस्ट गोलंदाजाचे पुनरागमन झालेय. 

होय... आरसीबीचा हुकमी एक्का हर्षल पटेल तंदुरुस्त असून एलिमिनेटरमध्ये खेळण्यास सज्ज आहे. आरसीबीच्या अखेरच्या साखळी सामन्यात हर्षल पटेल दुखापतग्रस्त झाला होता. त्यामुळे हर्षल पटेलला अर्ध्यातून मैदान सोडावे लागले होते... त्याला चार षटकेही गोलंदाजी करता आली नव्हती. पण आता हर्षल पटेल तंदुरुस्त झाला असून संघात परतण्यास सज्ज झाला... हर्षल पटेल परतल्यामुळे आरसीबीची ताकद नक्कीच वाढणार आहे. 

गतवर्षी हर्षल पटेलने पर्पल कॅपवर कब्जा मिळवला होता. 2021 मध्ये हर्षल पटेलने 12 सामन्यात 32 विकेट घेतल्या होत्या. यंदाही हर्षल पटेल याने भेदक मारा केलाय. 13 सामन्यात हर्षल पटेलने 18 विकेट घेतल्या आहेत. डेथ ओव्हरमध्ये हर्षल पटेल भेदक मारा करतो.. सचिन तेंडुलकरनेही हर्षलची स्तुती केलीआहे. 

आयपीएलच्या पंधराव्या हंगामातील एलिमिनेटर सामन्यात लखनौ सुपर जायंट्स आणि रॉयल चॅलेंजर्स बंगळुरू (Lucknow Super Giants vs Royal Challengers Bangalore) आमने सामने येणार आहेत. कोलकात्याच्या (Kolkata) ईडन गार्डनवर (Eden Gardens) हा सामना खेळला जाणार आहे. आजच्या सामन्यात विजय मिळवणारा संघ क्वालीफायरमध्ये पराभूत झालेल्या राजस्थान रॉयल्सशी (Rajasthan Royals) भिडणार आहे. तर, पराभूत झालेल्या संघाचा प्रवास इथेच संपेल. यामुळं आयपीएल 2022 मधील आपलं आव्हान टिकवण्यासाठी दोन्ही संघ मैदानात उतरतील. लखनौच्या संघाचं नेतृत्व केएल राहुल (KL Rahul) करत आहे. तर, आरसीबीच्या संघाचं कर्णधारपदाची जबाबदारी फाफ डू प्लेसिस (Faf du Plessis) संभाळत आहे.

लखनौची दमदार कामगिरी
लखनौ सुपर जायंट्सचा आयपीएलमधील पहिलाच हंगाम खेळत आहे. या हंगामात राहुलच्या नेतृत्वात लखनौने प्लेऑफमध्ये धडक मारली आहे. लखनौने 14 सामन्यात नऊ विजय मिळवले आहेत. गुणतालिकेत लखनौचा संघ तिसऱ्या क्रमांकावर आहे. राहुलनं कर्णधाराला साजेशी फलंदाजी केली. राहुलने लखनौकडून सर्वाधिक धावा चोपल्या आहेत. त्याशिवाय  क्विंटन डिकॉक, युवा आयुष बदोनी, दीपक हुड्डा यांनीही मोलाची कामगिरी केली. फलंदाजीप्रमाणे लखनौचा संघ गोलंदाजीतही तगडा अशल्याचे दिसले. आवेश खान, मोहसीन खान या भारतीय गोलंदाजांसोबतच  जेसन होल्डर चांगली कामगिरी करत आहे. 

आरसीबीचा आयपीएल 2022 मधील प्रवास
आरसीबीनं सलग तिसऱ्या मोसमात प्लेऑफमध्ये स्थान मिळवलं आहे. परंतु, आरसीबीचा संघा त्यांच्या पहिल्या विजेतेपदाच्या प्रतीक्षेत आहेत. आयपीएलमध्ये आरसीबीच्या संघानं आतापर्यंत तीन वेळा अंतिम फेरीत प्रवेश केला. परंतु, या तिन्ही सामन्यात त्यांना पराभव स्वीकारावा लागला. आरसीबीनं 2009, 2011 आणि 2016 मध्ये अंतिम फेरीत प्रवेश केला होता. एवढेच नव्हेतर, आरसीबीच्या संघात अनेक स्टार फलंदाज असूनही ते  2017 आणि 2019 मध्ये गुणतालिकेत तळाशी होते.