Gadchiroli : गडचिरोलीत जहाल महिला नक्षलवाद्याचे पोलिसांसमोर आत्मसमर्पण, दोन लाखांचे होते बक्षीस

Gadchiroli Woman Naxal Surrender : तारा ऊर्फ शारदा या महिला नक्षलवाद्याने आतापर्यंत तीन खून केल्याची नोंद आहे. तिच्यावर दोन लाखांचे बक्षीस होतं.

Gadchiroli Woman Naxal Surrender

Source : abp majha

गडचिरोली: नक्षल सप्ताह दरम्यान जहाल महिला माओवाद्याने गडचिरोली पोलीस व सीआरपीएफ दलासमोर आत्मसमर्पण केलं. या महिला नक्षलवाद्यावर शासनाने 2 लाख रुपयांचे बक्षीस जाहीर केले होते. तारा ऊर्फ शारदा ऊर्फ ज्योती दस्सा कुळमेथे (वय 28 वर्ष, रा. नैनेर, ता. अहेरी, जि. गडचिरोली) असं या महिला नक्षलवाद्याचं नाव असून तिने आत्मसमर्पण केलं आहे.

शासनाने सन 2005 पासून जाहीर केलेल्या आत्मसमर्पण योजनेमुळे तसेच हिंसाचाराच्या जीवनाला कंटाळून वरिष्ठ माओवाद्यांसह अनेक जहाल माओवाद्यांनी आजपर्यंत पोलिसांसमोर आत्मसमर्पण केलेले आहे. त्याचबरोबर आत्मसमर्पित माओवाद्यांचे पोलिस दलाने पुनर्वसन घडवून आणल्यामुळे आजपर्यंत एकूण 679 माओवाद्यांनी गडचिरोली पोलीस दलासमोर आत्मसमर्पण केले आहे..

आत्मसमर्पित महिला माओवादी सदस्याबाबत माहिती

नाव - तारा ऊर्फ शारदा ऊर्फ ज्योती दस्सा कुळमेथे 

दलममधील कार्यकाळ - सन 2016 मध्ये अहेरी दलममध्ये सदस्य पदावर भरती होऊन सन 2018 पर्यंत कार्यरत होती. सन 2018 पासून आजपर्यंत भामरागड दलममध्ये कार्यरत होती.

कार्यकाळात केलेले गुन्हे

चकमक-08

खून-03

इतर गुन्हे -01 

गडचिरोली पोलिस अधीक्षक नीलोत्पल यांनी आवाहन केलं आहे की, विकासकामांना आडकाठी निर्माण करणा­ऱ्या माओवाद्यांवर पोलिस दल सक्षमपणे कारवाई करण्यास तत्पर आहेत. जे माओवादी विकासाच्या प्रवाहात सामील होण्यास इच्छुक असतील त्यांना विकासाच्या मुख्य प्रवाहात आणण्यासाठी तसेच लोकशाहीतील सन्मानाचे जीवन जगण्यासाठी गडचिरोली पोलीस दल सर्वतोपरी मदत करेल. तसेच त्यांनी हिंसेचा त्याग करुन शांततेचा मार्ग स्वीकारावा असं आवाहन त्यांनी केलं. 

ही बातमी वाचा: