Pune: हॉर्न का वाजवला? पुण्यात मद्यधुंद टोळक्याची जोडप्याला मारहाण, गाडीही फोडली; पुण्याच्या पाषाण सर्कलवर काय घडलं?

पुण्यात आजकाल किरकोळ कारणांवरून मारहाणीच्या घटना प्रचंड वाढल्या आहेत. पाषाण सर्कलमध्ये रात्री घडलेल्या घटनेमुळे मोठी खळबळ होती.

Pune Crime

पुण्याच्या पाषाण भागात नशेत धुंद असलेल्या पाच जणांच्या टोळक्याने केवळ हॉर्न वाजवला म्हणून एका पती-पत्नीला मारहाण केल्याची धक्कादायक घटना घडली आहे.

हा प्रकार पाषाण सर्कल येथे घडला असून, या प्रकरणी चतुर्शृंगी पोलीस ठाण्यात गुन्हा दाखल करण्यात आला आहे.

माहितीनुसार, पीडित दाम्पत्याने वाहतूक कोंडीमुळे वाहनाचा हॉर्न वाजवला होता. या गोष्टीवरून आरोपींनी त्यांच्याशी वाद घालून शिवीगाळ केली आणि त्यानंतर हातघाईवर येत दोघांना बेदम मारहाण केली.

पोलिसांनी दिलेल्या माहितीनुसार, या प्रकरणी तक्रार दाखल होताच तातडीने कारवाई करत तीन आरोपींना अटक करण्यात आली असून उर्वरित दोघांचा शोध सुरू आहे.

हॉर्न का वाजवला म्हणत टोळक्यांनी घातलेल्या राड्यात पती पत्नीला मार लागला असून त्यांच्या गाडीच्या काचा फूटल्या आहेत. टोळक्याने भररस्त्यात गाडीत घूसत हा प्रकार केल्याची माहिती आहे.

या घटनेमुळे परिसरात एकच खळबळ उडाली असून, नागरिकांमध्ये भीतीचं वातावरण निर्माण झालं आहे. पोलिसांकडून पुढील तपास सुरू आहे.