अजित पवारांचा पाय आणखी खोलात? पुण्यातील जमीन खरेदीची चौकशी होणारच, शासन आदेश जारी

शासनाने यासंदर्भात शासन आदेश जारी केला असून पुढील महिनाभरात समितीकडून अहवाल सादर करण्यात येईल.

Parth pawar Pune land committee

Source : Abp

मुंबई : पुण्यातील मुंढवा (Mundhwa) परिसरातील सर्वे नंबर 88 मधील दस्ताची अवैधरित्या नोंदणी झाली आहे आणि त्यामध्ये मोठ्या प्रमाणावर महसूलाची हानी झाली असल्याचे विविध माध्यमांतून वृत्त प्रसारित झाले आहे. प्रस्तुत बातमीच्या अनुषंगाने सदर प्रकरणी सविस्तर चौकशी होणे आवश्यक असल्याने, चौकशी करण्यासाठी चौकशी समिती नियुक्त करण्याचा शासनाच्या विचाराधीन होता. त्यानुसार, महसूल, मुद्रांक व नोंदणी विभागाचे अपर मुख्य सचिव विकास खारगे (Vikas Kharge) यांच्या अध्यक्षतेखाली समिती नेमण्यात आली आहे. शासनाने यासंदर्भात शासन आदेश जारी केला असून पुढील महिनाभरात समितीकडून अहवाल सादर करण्यात येईल.

पार्थ पवार (Parth Pawar) यांच्या कंपनीने खरेदी केलेल्या जमीन व्यवहार प्रकरणी सविस्तर चौकशीच्या अनुषंगाने, अपर मुख्य सचिव (महसूल) यांच्या अध्यक्षतेखाली खालीलप्रमाणे चौकशी समिती नियुक्त करण्यात येत आहे, असे शासन आदेशात म्हटले आहे. तसेच, अध्यक्षांसह 6 जणांचा या समितीत समावेश असणार असून त्यामध्ये विभागीय आयुक्त आणि पुण्याचे जिल्हाधिकारी देखील चौकशी करणार आहेत. दरम्यान, पार्थ पवार यांच्याकडून सदरील जमिनीचा व्यवहार रद्द करण्यात येणार असून ती जमीन शासनाला परत दिली जाईल, अशी सूत्रांची माहिती आहे. मात्र, चौकशी समितीकडून संबंधित प्रकरणात ज्या अधिकारी व कर्मचाऱ्यांनी काळाबाजार केला त्यांच्यावर कारवाई होणार आहे. 

चौकशी समितीकडून खालील मुद्द्यांवर होणार चौकशी (Points to be Investigated by the Committee)

1. प्रस्तुत प्रकरणात अनियमितता झाली आहे का, याबाबत चौकशी करणे.

2. जर अनियमितता झाली असल्याचे आढळले, तर संबंधितांवर जबाबदारी निश्चित करून त्यांच्या विरुद्ध कारवाईची शिफारस करणे.

3. जर अनियमितता झालेली आढळली, तर सदरील जमीन पूर्वस्थितीवर आणण्यासाठी उपाययोजना सुचविणे.

4. भविष्यात अशा प्रकारची प्रकरणे पुन्हा उद्भवू नयेत यासाठी उपाययोजना सुचविणे.

---

समितीमध्ये कोण कोण? (Who Are the Members of the Committee?)

1. अपर मुख्य सचिव (महसूल, मुद्रांक व नोंदणी) — अध्यक्ष

2. विभागीय आयुक्त, पुणे विभाग, पुणे (Divisional Commissioner, Pune Division, Pune) — सदस्य

3. जमाबंदी आयुक्त आणि संचालक भूमी अभिलेख, पुणे (Settlement Commissioner & Director of Land Records, Pune) — सदस्य

4. नोंदणी महानिरीक्षक व मुद्रांक नियंत्रक, पुणे (Inspector General of Registration & Controller of Stamps, Pune) — सदस्य

5. जिल्हाधिकारी, पुणे (District Collector, Pune) — सदस्य

6. सह सचिव (मुद्रांक), महसूल व वन विभाग, मुंबई (Deputy Secretary, Stamps – Revenue & Forest Department, Mumbai) — सदस्य सचिव

हेही वाचा