Pune Accident News: वाढदिवसाची मिरवणूक; डीजेच्या गाडीचा ब्रेक फेल अन्..., चिरडून एका तरूणाचा मृत्यू, सहा जण गंभीर

Pune Accident News: डीजेच्या गाडीचा ब्रेक फेल होऊन ढोल पथकातील सात जणांना गाडीने चिरडले यात एका तरूणाचा मृत्यू झाला असून सहा जण गंभीर रित्या जखमी झालेत.

Pune Accident News

पुणे जिल्हा परिषदेचे माजी अध्यक्ष देव राम लांडे यांच्या वाढदिवसानिमित्त जुन्नर शहरात काढण्यात आलेल्या मिरवणुकी दरम्यान डीजेच्या गाडीचा ब्रेक फेल झाला.

या घटनेत ढोल पथकातील सात जणांना गाडीने चिरडले यात एका व्यक्तीचा मृत्यू झाला असून सहा जण गंभीर रित्या जखमी झालेत.

या प्रकरणी पोलिसांनी चार जणांवर गुन्हा दाखल करत पुणे जिल्हा परिषदेचे माजी अध्यक्ष आयोजक देवराम लांडे आणि चालकाला अटक करण्यात आली आहे.

ही घटना काल (बुधवारी दि.10) दुपारी 3 वाजण्याच्या सुमारास जुन्नरमध्ये घडली. याप्रकरणी आयोजक देवराम लांडे, अमोल लांडे, डीजे मालक सौरभ शेखरे आणि चालक नामदेव रोकडे यांच्यावर जुन्नर पोलिस ठाण्यात गुन्हा दाखल करण्यात आला आहे.

मिळालेल्या माहितीनुसार, देवराम लांडे यांच्या वाढदिवसाच्या निमित्ताने जुन्नर शहरात बुधवारी शोभायात्रेचे आयोजन करण्यात आले होते. या शोभायात्रेत डीजे वाहन, ढोल-ताशा पथक आणि गोफनृत्य पथक सहभागी झाले होते.

खामगावजवळील शिवेचीवाडी येथील आदिवासी ठाकर समाजाच्या मुक्तादेवी तरुण मंडळाचे ढोल-ताशा पथक देखील या शोभायात्रेत सहभागी होते.

शोभायात्रा जुन्नर बाजार समितीतून धान्य बाजाराकडे येत असताना उतारावरती असतानाच डीजे वाहन ढोल-ताशा पथकातील युवकांच्या अंगावर आले. वाद्याच्या आवाजामुळे काहींना वाहन येत असल्याचं समजलं नाही.

त्यामुळे आदित्य काळेला डीजे वाहनाने फरफटत नेलं, तर गोविंद काळे, विजय केदारी, सागर केदारी, बाळू काळे आणि किशोर घोगरे हे या घटनेमध्ये जखमी झाले आहेत.

या घटनेची भीषणता या फोटोच्या माध्यमातून दिसून येत आहे, त्याचबरोबर तरूणाच्या मृत्यूने हळहळ व्यक्त होत आहे.