कार नाल्यात बुडाली, पाणी नाकातोंडात शिरलं, बाहेर येण्याची धडपड व्यर्थ ठरली; दिंडोरीतील अपघातात 7 जणांचा मृत्यू

Nashik Dindori Accident: अल्टो कारमधील प्रवासी हे नाशिकहून नातेवाईकांच्या मुलाच्या वाढदिवसाच्या कार्यक्रमातून परतत होते.

Nashik Accident

दिंडोरी कृषी उत्पन्न बाजार समिती समोर झालेल्या अपघातात 7 जणांचा मृत्यू झाल्याची धक्कादायक घटना घडली आहे

अल्टो कार आणि मोटारसायकल यांच्यात झालेल्या अपघातामुळे कार रस्त्याच्या बाजूला असलेल्या खोल नाल्यात कोसळली आणि या दुर्घटनेत कारमधील 7 प्रवाशांचा मृत्यू झाल्याची धक्कादायक माहिती समोर आली आहे.

मिळालेल्या प्राथमिक माहितीनुसार, अल्टो कारमधील प्रवासी हे नाशिकहून नातेवाईकांच्या मुलाच्या वाढदिवसाच्या कार्यक्रमातून परतत होते.

त्यावेळी दिंडोरी बाजार समितीच्या जवळ कार आणि समोरून येणाऱ्या दुचाकीची जोरदार धडक झाली. धडकेनंतर कार चालकाचे वाहनावरील नियंत्रण सुटले आणि ती थेट नाल्यात जाऊन पडली.

या अपघातात कारमधील सातही जणांचा मृत्यू झाला असून, दुचाकीस्वार गंभीर जखमी झाला आहे. स्थानिक नागरिकांनी घटनास्थळी धाव घेऊन बचावकार्य सुरू केलं.

मात्र, चारचाकीमधून बाहेर पडता न आल्यामुळे गाडीतील लोकांचे नाका-तोंडात पाणी जाऊन मृत्यू झाल्याचं प्राथमिक तपासातून समोर आलं आहे.

अपघातानंतर परिसरात एकच खळबळ उडाली असून, पोलिसांनी घटनास्थळी धाव घेतली आहे. मृतांची ओळख पटवण्याचे काम सुरू असून जखमी दुचाकीस्वारावर उपचार सुरू आहेत.