थरारक... शेतात काम करताना दबा धरून बसलेल्या बिबट्यानं डाव साधला; वृद्ध महिलेनं जागेवर जीव सोडला

मात्र, वनविभागाने अद्याप कोणतीही ठोस कारवाई केली नसल्यामुळे ग्रामस्थांमध्ये भीतीचं वातावरण पसरलं आहे.

jalgaon news

जळगाव जिल्ह्यातील देवगाव शिवारात सोमवारी सकाळी बिबट्याच्या हल्ल्यात ६० वर्षीय वृद्ध महिलेला जीव गमवावा लागला.

इंदुबाई वसंत पाटील असं मृत महिलेचं नाव असून, त्या शेतात काम करत असताना हा हल्ला झाला.

दबा धरून बसलेल्या बिबट्याने अचानक त्यांच्या मागून येत डोक्यावर आणि चेहऱ्यावर जबरदस्त हल्ला केला. या प्राणघातक हल्ल्यात त्या गंभीर जखमी झाल्या होत्या.

घटनेनंतर गावकऱ्यांनी तत्काळ इंदुबाई यांना जळगावच्या जिल्हा शासकीय व वैद्यकीय रुग्णालयात दाखल केलं. मात्र, डॉक्टरांनी त्यांना मृत घोषित केलं.

गेल्या काही दिवसांपासून या भागात बिबट्याचा वावर वाढल्याचं ग्रामस्थांचे म्हणणं आहे. अनेक वेळा बिबट्याचे हलक्या झाडीत वा शेतात वावरताना फोटोही काढण्यात आले आहेत.

मात्र, वनविभागाने अद्याप कोणतीही ठोस कारवाई केली नसल्यामुळे ग्रामस्थांमध्ये भीतीचं वातावरण पसरलं आहे.

ग्रामस्थांनी वनविभागाकडे तातडीने पिंजरा लावण्याची आणि बिबट्याचा बंदोबस्त करण्याची मागणी केली असून, पुढे आणखी जीवितहानी होऊ नये यासाठी योग्य ती खबरदारी घेण्याचे आवाहन करण्यात येत आहे.