खुशखबर! ब्रिटनच्या शाही घराण्यात होणार नव्या पाहुण्याचं आगमन...

प्रिन्स हॅरी (Prince Harry) आणि मेगन (Meghan Markle) या शाही जोडप्याच्या घरी एका नवीन पाहुण्याचं आगमन होणार असल्याची बातमी आहे. या जोडप्याचं हे दुसरं अपत्य असणार आहे. त्यांच्या पहिल्या अपत्याचं नाव आर्च हॅरिसन माऊंटबॅटन-विंडसर असं आहे.

लंडन: प्रिन्स हॅरी आणि मेगन मर्केल हे आपल्या दुसऱ्या अपत्याच्या स्वागताच्या तयारीत असल्याचं खात्रीलायक वृत्त आहे. बकिंगहॅम पॅलेसच्या प्रवक्त्याने ही बातमी दिली आहे. या शाही जोडप्याला या आधी एक अपत्य असून त्याचं नाव आर्च हॅरिसन माऊंटबॅटन-विंडसर असं आहे. त्याचं वय दीड वर्ष आहे.

बकिंगहॅम पॅलेसच्या प्रवक्त्याने सांगितलंय की ब्रिटनच्या शाही घराण्यात या नवीन पाहुण्याचे आगमन होणार असल्याने सर्वच शाही परिवार आनंदात असून त्यांनी एकमेकांना शुभेच्छा दिल्या आहेत.

प्रिन्स हॅरी आणि मेगन मर्केल या जोडप्याने आपला एक ब्लॅक आणि व्हाईट फोटो शेअर केला आहे. त्यामध्ये हे दोघे एका झाडाखाली बसल्याचं बसले आहेत. या फोटोत मेगन गर्भवती असल्याचं दिसतंय. या जोडप्याचं हे दुसरं अपत्य ब्रिटनच्या राजगादीच्या वारसदारांच्या यादीत आठव्या क्रमांकावर असेल.

या जोडप्याचा एक जवळचा मित्र असलेला फोटोग्राफर मित्र, मिसान हॅरिमनने प्रिन्स हॅरी आणि मेगन मर्केल यांचा फोटो शेअर केलाय. त्यामध्ये डचेस ऑफ सस्सेक्स मेगन मर्कल ही गर्भवती असल्याचं स्पष्ट दिसतंय. हा फोटो शेअर करत त्याने लिहलं आहे की, "मेग, तुमच्या या प्रेमकथेची सुरुवात होताना मी त्याचा साक्षीदार होतो. आता हा क्षण मला कॅमेरात टिपायला मिळतोय हे माझे भाग्यच आहे. या आनंददायक बातमीसाठी ड्यूक आणि डचेस ऑफ सस्सेक्स, तुम्हाला दोघांनाही शुभेच्छा."

Meg, I was there at your wedding to witness this love story begin, and my friend, I am honoured to capture it grow. Congratulations to The Duke and Duchess of Sussex on this joyous news!#remoteshoot #shotonipad #shotbymisan pic.twitter.com/3iSYjydVj9

— Misan Harriman (@misanharriman) February 14, 2021

गेल्या वर्षीच्या नोव्हेंबरमध्ये न्यूयॉर्क टाईम्समध्ये 'द लॉस वी शेअर' या मथळ्याखाली लिहलेल्या एका लेखात डचेस ऑफ सस्सेक्स मेगन मर्कलने आपल्याला गर्भपातामुळे मुल गमवावं लागल्याचे सांगितलं होतं. तो अनुभव आपल्यासाठी असह्य शोक असल्याची भावना तिने व्यक्त केली.