Sanjay Raut : ठाकरे गट BMC निवडणुकीपूर्वी मविआतून बाहेर पडणार का? संजय राऊतांचं महत्त्वाचं वक्तव्य, म्हणाले...
Sanjay Raut : शिवसेना ठाकरे गट बीएमसी निवडणुकीपूर्वी महाविकास आघाडीतून बाहेर पडणार, अशा चर्चांना उधाण आले आहे.
नवी दिल्ली : महाराष्ट्र विधानसभा निवडणुकीत (Maharashtra Vidhan Sabha Election Result 2024) महायुतीला (Mahayuti) मोठे यश मिळाले तर महाविकास आघाडीला (Mahavikas Aghadi) मोठा फटका बसला. यानंतर शिवसेना ठाकरे गट (Shiv Sena UBT) बीएमसी निवडणुकीपूर्वी (BMC Election) महाविकास आघाडीपासून वेगळा होणार, अशा चर्चांना उधाण आले आहे. आता यावर ठाकरे गटाचे खासदार संजय राऊत (Sanjay Raut) यांनी महत्त्वाचं वक्तव्य केलंय.
संजय राऊत म्हणाले की, अजिबात नाही, आत्ताच निकाल लागलेला आहे. निकालासंदर्भात सगळ्याच पक्षांचे चिंतन, मंथन, अभ्यास सुरू आहे. तिन्ही पक्षांना धक्का बसलेला आहे. याबाबत कारणे शोधण्याचे प्रयत्न सुरू आहेत. कारणांची दिशा पाहिली तर ती ईव्हीएमच्या दिशेने जात आहे. ज्या पद्धतीने पैसे वापरले, त्या पद्धतीने जात आहे. त्यामुळे आम्हाला तिघांना एकत्र बसून त्या संदर्भात चर्चा करावी लागेल.
राजकारणात इतक्या घाईने निर्णय घ्यायचे नसतात
राहुल गांधी यांच्याशी काल आम्ही चर्चा केली. काही कार्यकर्त्यांची भूमिका असते, निवडणुकीत पराभव झाल्यावर त्यांना वाटतं की, आपण स्वतंत्रपणे लढायला हवं होतं. पण, आता मुंबई महापालिकेच्या निवडणुका आहेत. राज्यातल्या 14 महानगरपालिकांच्या निवडणुका आहेत. त्या संदर्भातला एक निर्णय घ्यावा लागतो. राजकारणात इतक्या घाईने निर्णय घ्यायचे नसतात. आम्ही लोकसभा निवडणुका एकत्र लढलो, त्याचा आम्हाला चांगला फायदा झाला.
कार्यकर्त्यांच्या व्यक्तिगत भावना असतात
विधानसभेला दुर्दैवाने आम्हाला यश मिळालं नाही. अपयशाची कारणे आम्ही एकत्र बसून शोधू. ती कारणे आम्हाला माहिती असली तरी आम्हाला एकत्र बसावे लागेल. स्वतंत्रपणे लढण्याच्या भूमिका त्या त्या कार्यकर्त्यांच्या व्यक्तिगत भावना असतात. अशा प्रकारच्या बातम्या सध्या तरी विश्वास ठेवावा, अशा नाहीत. काहीही झालं तरी 288 मतदार संघामध्ये आम्हाला यापुढे लक्ष घालावे लागणार आहे. जिल्हा परिषद, पंचायती, महानगरपालिका, नगरपालिका या निवडणुका आम्हाला लढायच्याच आहेत. त्यामुळे भविष्यात बघू काय होतं, असे संजय राऊत यांनी म्हटले.
शिंदेंनी यापुढे बाळासाहेब ठाकरेंचं नाव घेऊ नये
मुख्यमंत्रीपदाबाबत पंतप्रधान नरेंद्र मोदी आणि केंद्रीय गृहमंत्री अमित शाह जो निर्णय घेतील, त्यास माझा आणि शिवसेनेचा पाठींबा असेल, अशी भूमिका काळजीवाहू मुख्यमंत्री एकनाथ शिंदे यांनी जाहीर केली. यावरून संजय राऊत यांनी एकनाथ शिंदेंना टोला लगावलाय. त्यांनी त्यांच्या पक्षाचा निर्णय घेण्याचे अधिकार जर दिल्लीतल्या मोदी आणि शाह यांना दिले असतील तर त्यांनी यापुढे त्यांनी बाळासाहेब ठाकरे यांचे नाव घेऊ नये. हिंदुहृदयसम्राट बाळासाहेब ठाकरे यांचे स्वाभिमान, महाराष्ट्राचा अभिमान, असे शब्द यापुढे न वापरलेले बरे, असे म्हणत संजय राऊत यांनी एकनाथ शिंदे यांच्यावर निशाणा साधला.
आणखी वाचा
महत्त्वाच्या बातम्या
ट्रेंडिंग न्यूज
