Earthquake In Iran: तो भूकंप नव्हता तर अणुबॉम्बचा स्फोट होता? अमेरिकेच्या हल्ल्यापूर्वीच इराणने न्युक्लिअर टेस्ट आटोपल्याच्या चर्चांना उधाण
Earthquake In Iran: इराण हा जगातील सर्वात भूकंपाच्या दृष्टीने सक्रिय देशांपैकी एक आहे, कारण तो अल्पाइन-हिमालयीन भूकंपाच्या पट्ट्याजवळ आहे, जिथे अरबी आणि युरेशियन टेक्टोनिक प्लेट्स एकत्र येतात.
Earthquake In Iran: इराण आणि इस्रायलमधील युद्धात (Israel-Iran conflict) आता अमेरिकेनेही (US Strikes on Iran) उडी घेतल्याने या संघर्षाला नवं वळण लागले आहे.अशातच इस्रायलशी युद्ध सुरू असताना शुक्रवारी (20 जून 2025) इराणला भूकंपाचा धक्का बसलाय. शनिवारी इराण आणि इस्रायलने पुन्हा एकमेकांवर हल्ला केला. त्याच्या एक दिवस आधीच तेहरानने म्हटले होते की धोक्याच्या काळात ते त्यांच्या अणुकार्यक्रमावर वाटाघाटी करणार नाहीत. दरम्यान, युरोपीय देश दोन्ही पक्षांमध्ये शांतता चर्चेसाठी सतत प्रयत्न करत असल्याचे ही बोललं जात आहे.
उत्तर इराणमधील सेमनान प्रदेशात शुक्रवारी 5.1 तीव्रतेचा शक्तिशाली भूकंप झाला. तस्निम वृत्तसंस्थेच्या वृत्तानुसार, सेमनानच्या नैऋत्येस 27 किलोमीटर अंतरावर 10 किलोमीटर खोलीवर हा भूकंप झाला.
तेहरानने केलीय का कोणत्याही अण्वस्त्रांची चाचणी?
किंबहुना, या भूकंपामुळे आता तेहरानने कोणत्याही अण्वस्त्रांची चाचणी केली आहे का? याबद्दल नवीन अटकळ निर्माण झाली आहे. तर यामुळे नवीन चिंता निर्माण झाल्या आहेत. कारण हा भूकंप अंतराळ संकुल आणि क्षेपणास्त्र संकुल असलेल्या शहराजवळ झाला आहे.असे म्हटले जाते की इराणी सैन्याद्वारे चालवले जाणारे सेमनान स्पेस सेंटर आणि सेमनान मिसाईल कॉम्प्लेक्स परिसरातच आहे.
इराणमध्ये दरवर्षी होतात 2, 100 भूकंप
इराणी वृत्तसंस्थेने वृत्त दिले आहे की, यात कोणतीही जीवितहानी झाली नाही आणि फक्त किरकोळ नुकसान झाले आहे. हा संघर्षग्रस्त देश जगातील सर्वात भूकंपाच्या दृष्टीने सक्रिय देशांपैकी एक आहे, कारण तो अल्पाइन-हिमालयीन भूकंपाच्या पट्ट्यावर वसलेला आहे. जिथे अरबी आणि युरेशियन टेक्टोनिक प्लेट्स एकत्र येतात.
दरम्यान, इराणमध्ये दरवर्षी साधारणपणे सुमारे 2, 100 भूकंप होतात, ज्यात 15 ते 16 भूकंप 5.0 किंवा त्याहून अधिक तीव्रतेचे असतात. 2006 ते 2015 दरम्यान देशात 96, 000 भूकंप झाले. अणुऊर्जा उपक्रमांदरम्यान भूगर्भातील स्फोटांमुळे भूकंप होऊ शकतात.तसेच, भूकंपशास्त्रज्ञ भूकंपाच्या लाटांचा अभ्यास करून स्फोट आणि नैसर्गिक भूकंप यात फरक करू शकतात. भूकंपविषयक डेटावरून असे दिसून येते की भूकंप ही एक नैसर्गिक घटना होती. इंडिया टुडेच्या वृत्तानुसार, यूएस जिओलॉजिकल सर्व्हे (USGS) आणि कॉम्प्रिहेन्सिव्ह न्यूक्लियर-टेस्ट-बॅन ट्रीटी ऑर्गनायझेशन (CTBTO) आणि स्वतंत्र भूकंपशास्त्रज्ञांच्या विश्लेषणाने अणुचाचण्यांबद्दलच्या चर्चा खोडून काढल्या आहेत.
हे ही वाचा
महत्त्वाच्या बातम्या
