एकतर्फी प्रेमातून तरुणीची हत्या; युपी, एमपी फिरला, नावही बदललं; टॅटूचा क्लू मिळताच पोलिसांनी धरला

भिवंडीच्या भादवड परिसरातील तरे चाळीत राहत असलेल्या नितू भानसिंग (23) या तरुणीवर आरोपी राजू मागील दोन वर्षांपासून एकतर्फी प्रेम करत होता.

bhiwandi tanvi bhansing crime news

Source : Abp

ठाणे : जिल्ह्यातील भिवंडी (bhiwandi) शहर हादरवून टाकणाऱ्या एका खळबळजनक घटनेचं गूढ तब्बल 10 महिन्यानंतर उलगडलं असून आरोपीला अटक करण्यात आली आहे. एकतर्फी प्रेमातून तरुणीची निर्घृण हत्या केल्याची धक्कादायक घटना घडली होती. याप्रकरणी, तब्बल 10 महिन्यांनंतर आरोपी राजू महेंद्र सिंह (24) याला पोलिसांनी अटक केली असून हातावरील टॅटूमुळे या हत्याकांडाचे गूढ उलगडले आहे. पोलीस (Police) चौकशीत राजूने नितूच्या खुनाची कबुली दिली असून त्याला आश्रय व मदत करणाऱ्या दोघांनाही अटक करण्यात आली आहे.

भिवंडीच्या भादवड परिसरातील तरे चाळीत राहत असलेल्या नितू भानसिंग (23) या तरुणीवर आरोपी राजू मागील दोन वर्षांपासून एकतर्फी प्रेम करत होता. त्याने नितूला अनेकदा लग्नाची मागणी देखील घातली होती. मात्र, नितूने ठामपणे नकार दिला. एवढंच नव्हे तर तिचं लग्न ठरल्याची माहिती मिळाल्यानंतर नितूने त्याच्याशी बोलणंही बंद केलं. या गोष्टीचा राग मनात धरून, 28 ऑक्टोबरच्या रात्री सव्वा अकराच्या सुमारास राजूने नितूच्या घरी घुसून धारदार चाकूने तिच्या गळ्यावर वार करत तिची हत्या केली. नितूवर हल्ला होत असताना तिची लहान बहीण ऋतु घरी आली. तिने बहिणीला वाचवण्याचा प्रयत्न केला मात्र संतापलेल्या आरोपीने तिच्यावरही वार केले. यात ऋतु देखील गंभीर जखमी झाली होती. या घटनेनंतर नितूला तात्काळ रुग्णालयात दाखल करण्यात आले. परंतु, नीतूचा दुर्दैवी मृत्यू झाला. या घटनेनंतर आरोपी राजू घटनास्थळावरून फरार झाला आणि पोलिसांना तब्बल दहा महिने चकवा देत होता.

घटनास्थळी जखमी झालेल्या ऋतूने पोलिसांना दिलेल्या जबाबात आरोपीच्या हातावर टॅटू असल्याचं सांगितलं होतं. हीच माहिती पोलिसांसाठी महत्त्वाची ठरली. काही दिवसांपूर्वी गुप्त बातमीदारामार्फत माहिती मिळाली की राजू इंदोरमध्ये ‘सुरज’ नावाने राहत असून नोकरी शोधत आहे. शांतीनगर पोलिसांनी इंदोर क्राईम ब्रांचच्या मदतीने सापळा रचला. राजूने स्वतःला सुरज असल्याचे सांगून पोलिसांची दिशाभूल करण्याचा प्रयत्न केला. मात्र, त्याच्या हातावरील टॅटूने त्याची खरी ओळख उघडकीस आली. हत्या केल्यानंतर राजूने भिवंडी सोडून उत्तर प्रदेश, प्रयागराज, इंदूर अशा विविध भागांत आपलं नाव बदलून वास्तव्य केलं. तो मोबाईल बंद ठेवायचा, नाव बदलून परिसरात हिंडायचा आणि सतत ठिकाणं बदलत राहायचा. यामुळे शांतीनगर पोलिसांना त्याला पकडणं अवघड जात होतं. अखेर, टॅटूमुळे ओळख पटल्यावर पोलिसांनी त्याला जेरबंद केलं.

दरम्यान, याप्रकरणी पोलीस चौकशीत राजूने नितूच्या खुनाची कबुली दिली. त्याला आश्रय व मदत करणाऱ्या दोघांनाही अटक करण्यात आली आहे. नितू भानसिंगची निर्दयी हत्या आणि बहिणीवरचा हल्ला या घटनेमुळे संपूर्ण भिवंडी हादरली होती. तब्बल 10 महिन्यांनंतर आरोपी गजाआड झाल्याने पीडित कुटुंबाला अर्धा न्याय मिळाला आहे. एकतर्फी प्रेमातून निर्घुण हत्या करणाऱ्याला फाशीची शिक्षा व्हावी, अशी मागणी कुटुंबीयांनी केली आहे.

हेही वाचा