Sangli News : बैलाला काय उत्तर द्यायचं? हा एकच सवाल अन् डबल महाराष्ट्र केसरी चंद्रहार पाटील चितपट! घेतला मोठा निर्णय
चंद्रहार पाटलांनी गोवंश संवर्धन डोळ्यासमोर ठेवत दोन्ही बैलांना एक-एक थार देण्याचा निर्णय जाहीर केला आणि सांगलीमध्ये बकासूर आणि महिब्याच्या मालकांना थार गाडी बुकिंगच्या पावत्या प्रदान केल्या.
Sangli News : "एक अनार, दो बिमार' ही म्हण आपल्या सर्वांनाच माहित आहे, पण एक शर्यत पार पडल्यानंतर बक्षीसाच्या वाटपावरून असाच काहीसा प्रकार सांगलीमध्ये घडला. देशातील सगळ्यात मोठ्या रुस्तम-ए-हिंद बैलगाडी शर्यतीमध्ये बकासूर आणि महिब्या बैलजोडीने मैदान मारत थार गाडी जिंकली. मात्र, यानंतर थार गाडी कोण घेणार? यावरून तिढा निर्माण झाला होता. अखेर आयोजक असणाऱ्या डबल महाराष्ट्र केसरी चंद्रहार पाटलांनी थेट दोन्ही मालकांना प्रत्येकी एक-एक थार गाडी देऊन टाकली आहे.
सांगलीच्या भाळवणीमध्ये नुकतीच देशातील सगळ्यात मोठी बैलगाडा शर्यत पार पडली. या शर्यतीत पुण्याच्या मुळशीमधील बकासूर आणि कराडच्या रेठरेमधील महीब्या बैलजोडीनं पहिला क्रमांक पटकावला. लाखो बैलगाडा शौकिनांच्या उपस्थितीत थरार पार पडला. अभूतपूर्व उत्साहात आणि थरारक अशा या बैलगाडी शर्यतीला महाराष्ट्रभरातील 2 लाखांच्या आसपास बैलगाडा शर्यत प्रेमींनी हजेरी लावली होती.
शर्यत होऊन सहा दिवस उलटूनही थार गाडीचं वाटप नाही
शर्यतीत बकासूर आणि महिब्या या बैलजोडीने पहिल्या क्रमांकाचे थार गाडीचे पटकावले होते. मात्र, थार गाडी कोणी घ्यायची? असा तिढा निर्माण झाला होता. शेवटी चंद्रहार पाटील यांनी दोन्ही बैल मालकात थार गाडीवरून वाद होऊ नये म्हणून बकासूर आणि महिब्या या दोन्ही बैलं मालकांना थार गाडी देण्याचा निर्णय घेत दिलदारपणा दाखवला. बैलगाडी शर्यतीमध्ये थार गाडीसाठी बकासूर आणि महिब्या ही बैल जोडी पळाली आणि दोघांनीही थार गाडी आपल्या पदरात पाडली. मात्र, दोन्ही बैलांची मालक वेगवेगळे असल्याने थार गाडी कोणाला मिळणार? किंवा कोण घ्यायची? हा तिढा निर्माण झाला होता. शर्यत होऊन सहा दिवस उलटूनही थार गाडीचं वाटप होऊ न शकल्याने अखेर बैलगाडी शर्यतीचे आयोजक डबल महाराष्ट्र केसरी चंद्रहार पाटलांनी दोन्ही बैल मालकांना बोलवून चर्चा केली.
सुमारे चार तास थार गाडी कोणाला द्यायची याबाबत चर्चा सुरू होती. मात्र, कोणाला गाडी मिळणार? यावर एकमत होत नव्हतं. यामुळे चंद्रहार पाटलांनी मग बकासूरच्या मालकाला थार गाडी द्यायचा निर्णय घेतला, पण महिब्या बैल मालक असणाऱ्या सदाशिव मास्तरने आपण आपल्या बैलाला काय उत्तर द्यायचं? हा सवाल केला आणि या भावनिक प्रश्नावर डबल महाराष्ट्र केसरी चंद्रहार पाटील चितपट झाले. मग चंद्रहार पाटलांनी गोवंश संवर्धन डोळ्यासमोर ठेवत दोन्ही बैलांना एक-एक थार देण्याचा निर्णय जाहीर केला आणि सांगलीमध्ये बकासूर आणि महिब्याच्या मालकांना थार गाडी बुकिंगच्या पावत्या प्रदान केल्या. त्यामुळे थार गाडी कोणाला मिळणार? निर्माण झालेला तिढा, तर सुटलाच, शिवाय प्रत्येक बैलाला एक- एक थार गाडी इतके भले मोठं बक्षीस देखील मिळाले आहे.
इतर महत्वाच्या बातम्या
महत्त्वाच्या बातम्या
