Nagpur Covid Update : दिवसभरातील कोरोना बाधितसंख्या शंभरीपार, 105 नव्या रुग्णांची नोंद
दिवसांपासून कोरोना रुग्णांच्या संख्येत घट होत असताना रविवारी प्राप्त चाचणी अहवालानुसार आज जिल्ह्यात 105 रुग्ण आढळल्याने प्रशासनात चिंतेचे वातावरण आहे. नागरिकांनीही खबरदारी घ्यायची गरज आहे.
नागपूरः जिल्ह्यात बऱ्याच दिवसानंतर कोरोना बाधितांच्या संख्येने तीन अंकी आकडा गाठला आहे. आज दिवसभरात जिल्ह्यात 105 नव्या कोरोना बाधितांची नोंद झाली. यात शहरातील 80 तर ग्रामीणमधील 25 बाधितांचा समावेश आहे. आजच्या बाधितांसह जिल्ह्यातील अ‍ॅक्टिव्ह रुग्णसंक्या 515 वर पोहोचली आहे.
गेल्या काही दिवसांपासून कोरोना रुग्णांच्या संख्येत घट होत असताना रविवारी प्राप्त चाचणी अहवालानुसार आज जिल्ह्यात 105 रुग्ण आढळल्याने प्रशासनात चिंतेचे वातावरण आहे. दुसरीकडे नागरिकांनीही खबरदारी घ्यायची गरज आहे. रविवारी दिवसभरात 58 बाधितांनी कोरोनावर मात केली. यात शहरातील 30 आणि ग्रामीणमधील 28 जणांचा समावेश आहे.
सध्या स्थितीत जिल्ह्यात अ‍ॅक्टिव्ह कोरोना रुग्णांमध्ये शहरातील 360 तर ग्रामीणमधील 155 रुग्णांचा समावेश आहे. आज ग्रामीणमध्ये 320 तर 1239 असे एकूण 1559 जणांची आरटीपीसीआर चाचणी करण्यात आली. तर ग्रामीणमधून 52 आणि शहरातून 203 असे 255 जणांची रॅपिड अ‍ॅन्टीजेन चाचणी करण्यात आली. सध्या रुग्णालयात भरती असलेल्या 13 रुग्णांमध्ये शासकीय वैद्यकीय रुग्णालयात 7, किंग्सवेमधील 3, रेल्वे रुग्णालयात 1, सनफ्लावर हॉस्पिटलमध्ये 1 आणि ऑरेंज सिटी हॉस्पिटलमध्ये एक रुग्ण उपचार घेत आहे. तर 502 रुग्ण गृहविलगीकरणात आहे.
लसीकरणाचा लाभ घ्या
नागपूर : नागपूर महानगरपालिका क्षेत्रातील लसीकरण केंद्रांवर आता दिवसनिहाय वेगवेगळी लस देण्यात येत आहे. लस सकाळी 9 ते दुपारी 2 वाजेपर्यंत देण्यात येणार आहे. लसीकरणसाठी ऑनलाईन आणि ऑफलाईन अशा दोन्ही पद्धतीने नोंदणी करता येईल. तसेच लस घेण्यासाठी जाताना सोबत नोंदणी केलेला मोबाईल आणि ओळखपत्र बाळगावे, असे आवाहन मनपाच्या आरोग्य विभागातर्फे करण्यात आलेले आहे. मनपा केन्द्रात 60 वर्षावरील ज्येष्ठ नागरिकांना तथा आरोग्य सेवकांना बुस्टर डोज दिल्या जाईल. तसेच 18 ते 59 वर्ष वयोगटातील नागरिकांना खाजगी रुग्णालयात बुस्टर डोज शासकीय दराप्रमाणे दिल्या जाईल.
मनपाच्या सर्व दहा झोनमधील केंद्रांवर लस
मनपाच्या झोन क्र. 1 लक्ष्मीनगर झोन, झोन क्र. 2 धरमपेठ झोन, झोन क्र. 3 हनुमाननगर झोन, झोन क्र. 4 धंतोली झोन, झोन क्र. 5 नेहरूनगर झोन, झोन क्र. 6 गांधीबाग झोन, झोन क्र. 7 सतरंजीपुरा झोन, झोन क्र. 8 लकडगंज झोन, झोन क्र. 9 आशीनगर झोन, झोन क्र. 10 मंगळवारी झोन या सर्व झोनमदील केंद्रांवर लसीकरण उपलब्ध आहे.
महत्त्वाच्या बातम्या
ट्रेंडिंग न्यूज
