Pune News: दोन लाखांची पैज ठरली टर्निंग पॉईंट; 54 वर्षीय राजेंद्र गायकवाड यांनी बॉडी बिल्डिंग स्पर्धेत पटकावले मेडल
Pune News: शारीरिक कस लागल्याने त्यांनी 2018 मध्ये जिमला सुरुवात केली आणि आरोग्याकडे नवीन दृष्टीने पाहू लागले.
पुणे : जिद्द, चिकाटी आणि स्वतःवरचा प्रबळ विश्वास असेल तर कोणतेही उद्दिष्ट गाठणे अशक्य नाही, याचा जिवंत पुरावा ठरले आहेत लोणी काळभोर (ता. हवेली) येथील 54 वर्षीय राजेंद्र परशुराम गायकवाड. आरोग्याच्या गंभीर अडचणी, वाढलेले वजन आणि औषधांवर अवलंबून असलेले दैनंदिन आयुष्य या साऱ्या परिस्थितीतून बाहेर पडत त्यांनी थेट आंतरराष्ट्रीय बॉडी बिल्डिंग स्पर्धेत मेडल जिंकत नवा इतिहास रचला आहे.(Pune News)
दोन लाखांची पैज ठरली टर्निंग पॉईंट
2017 मध्ये गायकवाड यांचे वजन तब्बल 97 किलो होते. सततची डोकेदुखी, बी.पी., शुगर आणि पेनकिलर्सवर जगण्याची वेळ आली होती. त्याच काळात मित्रांच्या आग्रहाने त्यांनी ट्रेकिंगला सुरुवात केली. सचिन तात्या तुपे यांनी त्यांना ट्रेकिंगची ओळख करून दिल्यानंतर गायकवाड यांच्या आयुष्यात सकारात्मक बदल सुरू झाला. शारीरिक कस लागल्याने त्यांनी 2018 मध्ये जिमला सुरुवात केली आणि आरोग्याकडे नवीन दृष्टीने पाहू लागले.
पैजेतून प्रेरणा, मेहनतीतून मेडल!
दरम्यानच एका मित्रासोबत झालेल्या “सिक्स-पॅक काढलास तर दोन लाख!” या पैजेने त्यांची जिद्द अधिकच पेटली. स्वतःला सिद्ध करण्याच्या निर्धाराने त्यांनी जिम ट्रेनर ओंकार जाधव यांच्या मार्गदर्शनाखाली साडेतीन महिन्यांचा कठोर वर्कआउट आणि डाएट प्लॅन स्वीकारला. त्यांच्यावर असलेल्या सचिन तुपे यांच्या विश्वासाने त्यांना अधिक बळ दिले.
बॉडी बिल्डिंग स्पर्धेत पटकावले मेडल
या शिस्तबद्ध परिश्रमांचे फळ म्हणून गायकवाड यांनी यावर्षी ICN नॅचरल गोवा आंतरराष्ट्रीय स्पर्धेत दोन कॅटेगरीत सहभाग घेतला. यापैकी एका कॅटेगरीत त्यांनी सिल्वर मेडल तर दुसऱ्यात तृतीय क्रमांक पटकावला. याआधी तीनवेळा सहभाग घेतल्यानंतर अखेर यंदा त्यांनी मेडल जिंकत आंतरराष्ट्रीय पातळीवर आपले नाव उज्ज्वल केले. वयाच्या पन्नाशी ओलांडल्यानंतर मिळवलेले हे यश केवळ त्यांच्यासाठी नाही, तर फिटनेसच्या मार्गावर निघू इच्छिणाऱ्या असंख्यांसाठी प्रेरणादायी ठरत आहे.
ICN नॅचरल गोवा आंतरराष्ट्रीय स्पर्धा नक्की काय आहे?
खरंतर, देशभरातील तसेच परदेशातील फिटनेसप्रेमी आणि बॉडी बिल्डर्ससाठी प्रतिष्ठेची मानली जाणारी ICN नॅचरल गोवा आंतरराष्ट्रीय स्पर्धा दरवर्षी उत्साहात पार पडते. ‘I Compete Natural’ (ICN) या जागतिक संघटनेतर्फे आयोजित करण्यात येणारी ही स्पर्धा पूर्णपणे नॅचरल बॉडी बिल्डिंगला प्रोत्साहन देणारी असल्याने जगभरातील खेळाडूंमध्ये तिचे वेगळे स्थान आहे. या स्पर्धेची सर्वात मोठी खासियत म्हणजे कडक ड्रग टेस्टिंग. WADA-मान्य पद्धतीनुसार स्पर्धकांची तपासणी केली जाते. स्टेरॉइड्स किंवा कोणत्याही प्रकारचे परफॉर्मन्स वाढवणारे औषध वापरल्यास स्पर्धकाला तत्काळ अपात्र ठरवले जाते. यामुळे ही स्पर्धा बॉडी बिल्डिंगमधील नैसर्गिक आणि प्रामाणिक खेळाडूपणा जपणारी स्पर्धा म्हणून ओळखली जाते.
ICN गोवा आंतरराष्ट्रीय स्पर्धेत मेन्स फिजीक, बॉडी बिल्डिंग, स्पोर्ट्स मॉडेल, क्लासिक फिजीक, फिटनेस मॉडेल तसेच 40+, 50+ अशा मास्टर्स कॅटेगरींसह विविध विभागांचा समावेश असतो. प्रत्येक कॅटेगरीमध्ये स्पर्धकांचे मूल्यमापन शरीराची सिमेट्री, मसल डेफिनिशन, स्टेजवरील प्रेझेन्स, पोझिंग आणि फिटनेस लेव्हल या निकषांवर केले जाते. भारतातील खेळाडूंसाठी ही स्पर्धा आंतरराष्ट्रीय स्तरावर स्वतःची ओळख निर्माण करण्याची मोठी संधी ठरते. अनेक भारतीय अॅथलीट्स येथे मेडल जिंकून पुढील जागतिक स्पर्धांमध्ये भाग घेण्याचा मार्ग मोकळा करतात. याचमुळे ICN नॅचरल गोवा स्पर्धा भारतीय फिटनेस क्षेत्रातील सर्वात महत्त्वाच्या नॅचरल बॉडी बिल्डिंग इव्हेंट्सपैकी एक बनली आहे.
महत्त्वाच्या बातम्या
