Girish bapat death : मैत्री जपावी तर गिरीश बापटांसारखी; राष्ट्रवादीच्या नेत्यांनाही अश्रू अनावर
सर्वसमावेशक अशी ओळख असलेले खासदार गिरीश बापट यांचं दीर्घ आजाराने निधन झालं. भाजपचा किंगमेकर गेल्याने भाजपला मोठा धक्का बसला आहे. त्याचबरोबर विरोध पक्षातील नेत्यांनाही अश्रु अनावर झाले आहे.
Girish bapat death : सर्वसमावेशक अशी ओळख असलेले खासदार गिरीश बापट (Girish bapat) यांचं दीर्घ आजाराने निधन झालं. भाजपचा किंगमेकर गेल्याने भाजपला मोठा धक्का बसला आहे. त्याचबरोबर विरोध पक्षातील नेत्यांनाही अश्रू अनावर झाले आहे. राष्ट्रवादीच्या नेत्यांनी त्यांना पाणावलेल्या डोळ्यांनी श्रद्धांजली वाहिली आहे. मैत्री जपावी तर गिरीश बापट यांच्यासारखी, अशा भावना राष्ट्रवादीच्या नेत्यांनी व्यक्त केल्या आहेत. त्यांच्या या एक्झिटमुळे राजकीय वर्तुळात शोककळा पसरली आहे. सगळीकडून दु:ख व्यक्त केलं जात आहे.
राष्ट्रवादीचे सर्वेसर्वा शरद पवारांनी ट्विट करत गिरीश बापट यांना श्रद्धांजली वाहिली आहे. पुणे लोकसभा मतदारसंघाचे खासदार गिरीश बापट यांच्या निधनाचे वृत्त अत्यंत दुःखद आहे. चार दशकांच्या प्रदीर्घ कारकीर्दीत गिरीश बापट यांनी नेहमीच सर्वसमावेशक भूमिका घेत राजकीय प्रवास केला. पुण्यातील लोकांच्या मनात पक्के स्थान निर्माण करत त्यांनी पुणेकरांच्या व कामगारांच्या प्रश्नांसाठी नेहमीच काम केले. त्यांच्या निधनाने महाराष्ट्रातील एक सर्वपक्षीय जनसंपर्क जोपासणारे राजकीय नेते आपण गमावले आहेत. गिरीश बापट यांना भावपूर्ण श्रद्धांजली, असं त्यांनी ट्विटमध्ये लिहिलं आहे.
माझे लोकसभेतील सहकारी...!-सुप्रिया सुळे
राष्ट्रवादीच्या खासदार सुप्रिया सुळे यांनीदेखील त्यांना श्रद्धांजली अर्पण केली आहे. माझे लोकसभेतील सहकारी आणि पुणे लोकसभा मतदारसंघाचे खासदार गिरीश बापट यांचे निधन झाले. ही बातमी अतिशय दुःखद आहे. सलग पाच वेळा पुण्यातून ते आमदार म्हणून विधानसभेत निवडून गेले. त्यांना काही काळ राज्य मंत्रिमंडळातही काम करण्याची संधी लाभली होती. त्यांच्या निधनामुळे एक मनमिळाऊ स्वभावाचे नेतृत्व काळाच्या पडद्याआड गेले. भावपूर्ण श्रद्धांजली, अशा शब्दांत त्यांनी शोक व्यक्त केला आहे.
आम्ही ज्येष्ठ सहकारी, सुहृदय मित्र गमावला-अजित पवार
महाराष्ट्राचं सर्वसमावेशक, सुसंस्कृत राजकारणाचा चेहरा म्हणून गिरीशभाऊंकडे पाहिले जायचं. राष्ट्रीय स्वयंसेवक संघाच्या मुशीत तयार झालेल्या गिरीशभाऊंनी जात, धर्म, पंथ, प्रांत, भाषा, पक्षभेदांच्या भिंती ओलांडून समाजकार्य, विकासाचं राजकारण केलं. टेल्को कंपनीतल्या कामगार नेत्यापासून सुरु झालेला त्यांचा प्रवास पुणे महापालिकेचे नगरसेवक, स्थायी समिती अध्यक्ष, आमदार, मंत्री, खासदार पदापर्यंत पोहचला. चार दशकांच्या प्रदीर्घ राजकीय वाटचालीत गिरीशभाऊंना पुणेकरांचं अलोट प्रेम मिळालं. 1995 पासून 2014 पर्यंत सलग पाच वेळा ते आमदार झाले. 2019 ला खासदार झाले. राज्याचे मंत्री, पुणे जिल्ह्याचे पालकमंत्री म्हणून पुणे शहर, जिल्ह्याच्या विकासातलं त्यांच योगदान कायम स्मरणात राहील. काही महिन्यांपासून त्यांची प्रकृती ठिक नव्हती. आजाराशी ते निर्धारनं लढत होतं. बरे होऊन सार्वजनिक जीवनात ते पुन्हा सक्रीय होतील, हा विश्वास आम्हा सगळ्यांना होता. तो विश्वास खोटा ठरला. गिरीशभाऊंच्या निधनानं पुणे जिल्ह्याचं सर्वसमावेशक नेतृत्वं हरपलं आहे. आम्ही ज्येष्ठ सहकारी, सुहृदय मित्र गमावला आहे. पुणे जिल्ह्याला, राज्याला गिरीशभाऊंची उणीव कायम जाणवेल, त्यांची आठवण कायम येत राहील. मी त्यांना भावपूर्ण श्रद्धांजली अर्पण करतो. गिरीशभाऊंच्या कुटुंबियांच्या, कार्यकर्त्यांबद्दल सहसंवेदना व्यक्त करतो," अशा शब्दात विधानसभेचे विरोधी पक्षनेते अजित पवार यांनी खासदार गिरीश बापट यांच्या निधनाबद्दल तीव्र दु:ख व्यक्त करुन श्रद्धांजली वाहिली आहे.
अंकुश काकडे यांना अश्रू अनावर...
पुण्याचे राष्ट्रवादीचे नेते अंकुश काकडे यांना अश्रू अनावर झाले आहे. मैत्री असावी आणि जपावी तर गिरीश बापट यांच्या सारखी. त्यांच्या जाण्याने पुण्याने चांगला नेता गमावला असं म्हणत त्यांच्या अश्रूचा बांध फुटला.
महत्त्वाच्या बातम्या
ट्रेंडिंग न्यूज
